I Korintemiunut 2 - Labrador Inuttitut Heritage Bible

Paulusib ajoᴋertuiningata kiblingnarninganik.

¹ Uvangalo ᴋatangutikka, tikinapse oᴋâlavigijartorluse Gûdib ajoᴋertûtânik, oᴋautsit sanamatsiartut silatojoᴋsuillônêt atulaungilakka.

² Sumiglônêt akunapsingne ᴋaujimanasugilaungilanga, Jêsuse Kristûsemik kikiaktorsimajomik kissianik.

³ Sangêtoksôvlungalo erᴋsilarmalo sajudlalarmalo najulaukpapse.

⁴ Oᴋautsimalo ajoᴋertûsimalo inuit illisimajut oᴋausingit kajungersarnartut atulaungilait, Anernermigle pitsartunermiglo sakᴋijârtitsilaukput.

⁵ Okpernise tunganilijauᴋonago inuit illisimaninginut, Gûdible pitsartuninganut.

⁶ Oᴋautigijavulle illisimaniogalloarpok nâmaksijunut; silaksûb mattoma illisimaningaungitok, silaksûb mattoma angajoᴋângitalônêt, nunguniartut.

⁷ Gûdible ilisimaninga ijersimajok nelonartorlo oᴋautigivavut; tamanna Gûdib silaksoaᴋarᴋârtinago perᴋolaukpâ ânanausijaujutiksaptingnut.

⁸ Silaksûb mattoma angajoᴋângita, atautsiblônêt, tamanna illitarilaungilât; illitarilaurunitsuk, Nâlegak ânanaujoksoak kikiaktorajalaungilât saningajolingmut.

⁹ Sorlole aglaksimangmat: Ijib atautsiblônêt takolaungitanga, siutiblo atautsiblônêt tussalaungitanga, inûblo atautsiblônêt ômatingata issumagilaungitanga, tamanna Gûdib âkiksulaukpâ nagliktiminut.

¹⁰ Uvaptingnulle Gûdib nellonaitilaukpâ Anernerminut. Anernerub kiglisiniarmagit tamaita, nalonartuttauk Gûdib itiningit aglât.

¹¹ Inuit naliat ᴋaujimavâ inûb iluanêtomîk? Inûb anerninga tâpsoma iluanêtok kissime (ᴋaujimavok). Taimâktauk ᴋaujimajokanginivok Gûdib iluanêtomik, Gûdib Anerninga kissime (ᴋaujimavok.)

¹² Uvagulle silaksûb anerninganik pingilagut, Anernermigle Gûdemit pijomik; ᴋaûjijungnarᴋovluta Gûdemit tunergusiaptingnik.

¹³ Tamakkoalo oᴋautigivavut, oᴋautsinu-ungitok inuit silatuningita ajoᴋertûsingit maliklugit; oᴋautsinulle Anernerub ajunginerub ajoᴋertûsingit maliklugit; Anernerub pingit oᴋautigivlugit oᴋautsinut anernilingnut.

¹⁴ Inûb ingergarme Gûdib Anerningata pingit tukkisingilait; silainasugilugillo illitarijungnangilait; kiglisiniartaujariaᴋarmatta anernikut.

¹⁵ Anerneliuble tamaita kiglisiniarpait, assiminut kiglisiniartaunane.

¹⁶ Kiale Nâlekab issumanga illisimavaûk? Kialônêt ajoᴋertorniarpaûk? Uvagulle Kristûsib issumanganik peᴋarpogut.