I Korintemiunut 16 - Labrador Inuttitut Heritage Bible

Pauluse ikajutiksanik, okpertunut ajoᴋsartunut ilingajunik katersortauᴋojivok

¹ Tujûtiksalle ivsornaitunut pivlugit, sorlo Galâtsiamiut perᴋolaurapkit, ilipsetauk taimailioritse.

² Sabbatine tamaine ilûnase atunit ilijititse ilipsingne, ᴋapsinik katersoiniarluse issumapsingnik tujûtiksanik; katersortaujariaᴋarᴋonagit tikikuma.

³ Tikikumale, nalît âtserᴋojase neksartitsomârpakka aglangnik, Jerusalemut âtserᴋovlugit tunergutipsingnik.

⁴ Pijariaᴋarpalle, uvangalo taikunga ainiaruma, illaujuksauvut uvamnut.

⁵ Mazedôniakulle ingergaleruma, tikitsomavapse; Mazedônia apᴋutigijomârapko.

⁶ Ilipsingne akunêlârpallukpunga, okkêniarpungalônêt, illagijaujomavlunga ilipsingnut, namut ainiaruma.

⁷ Apᴋosatuinardluse mâna takojomangilapse; nerriukpungale akkunêrtomik ilipsingnêniardlunga, Nâlekab perᴋokpanga.

⁸ Efêsusemêniarpungale Penteᴋoste tikidlugo.

⁹ Upkuamik angijomik sulitsiarvionartomik angmartaujoᴋarmat uvamnut, akkerartortullo unudlarput tagvane.

¹⁰ Timôteusele tikipat, kamatitse, sivôranane ilipsingneᴋovlugo; Nâlekab piniarninga kivgartoraksaringmago uvaptut.

¹¹ Tâmna kinamullônêt nachogijauniarane. Ulapirsaumulle illagisiuk uvamnut tikerᴋovlugo; nerriugigapko ᴋatangutigêt ilagivlugit.

¹² ᴋatangulle Apolluse pivlugo ᴋaujileritse, angijomik ᴋaiblalauralloarpara, ilipsingnut aiᴋovlugo ᴋatangutigêt ilagilugit; mânakulle tikitsomalaungilak, tikitsomârporle pitjutiksarsigune.

¹³ Pigâritse, okpernerme sôngotitse, ajugauniaritse, pitsartuniarluselo.

¹⁴ Piniarnise tamaita naglingnermut piniarutigisigik.

¹⁵ ᴋaiblarpapsele, ᴋatangutikka: Stefanasib iglomioᴋatingit ᴋaujimavase, tâpkoa okperᴋârtôngmatta Achâjame, ingmingniglo tunivut, ivjornaitut (okpertut) kivgartoromavlugit.

¹⁶ Ilipsetauk taimaitut nâlengniarsigik, ilûnaitalo ikajorᴋataujut, piniartullo.

¹⁷ ᴋuviasukpunga Stefanase, Fortunâtuselo, Achaikuselo tikingmatta; ajoᴋsarnera ilipsingnik tâpkoa, simertipse sorlo, pêjalaungmatsuk.

¹⁸ Uvangalo ilipselo anerniptigut nakoᴋsitilaukpâtigut. Taimaitut opigijaksarivase.

¹⁹ Illagêt Asiamêtut salutipâse. Akvilable Prisillablo angijomik salutipâse Nâlekame, okpertoᴋatigêt tâpkoa iglungangnêtut illagivlugit.

²⁰ ᴋatangutigêt ilûnatik salutipâse. Saluteᴋatigêgitse salutimut ivsornaitomut.

²¹ Salutipapsetauk, nangminek aglaklunga uvanga Pauluse.

²² Nâlekamik Jêsuse Kristûsemik naglingitok, tâmnauvok Anatema; Maran-ata (imaipok. Ôminarsile; Nâlegak tikkitsomârpok).

²³ Nâlekab Jêsusib Kristûsib saimarsautingata illagilise.

²⁴ Naglingnima ilaginiarpâse ilûnase Kristûse Jêsuseme. Amen. Aglait tamakkoa sivorlit Korintemiunut Filippime aglaktaumavut, Stefanasiblo Fortunatusiblo Achaikusiblo Timôteusiblo naksalaukpait.