I Korintemiunut 15 - Labrador Inuttitut Heritage Bible

Kristûsib makininganik. Timiptalo makiningata ilinganinganik.

¹ Erᴋaitipapsele, ᴋatangutikka oᴋautsinik tussarnertunik, oᴋâlatigilauktamnik ilipsingnut; tâpkoa ilaliulaurapsigiktauk tungavigigapsigiglo.

² Tâpkonunga piulijauniarapsetauk, sorlo oᴋâlatigilaurapkit ilipsingnut; issumamiutarigupsigiglônêt; sulinase okperilaungikupsigik.

³ Nangminektauk tunergusiarilauktakka ilipsingnut oᴋautigilaukpakka, sivorliudlugit makkoa: Kristûse ajornivut pivlugit toᴋolaungmat, aglait maliklugit.

⁴ Ilijartortaungmallo, uvluglo pingajuangne makisimangmat, aglait maliklugit.

⁵ Takojaungmallo Kêfasemut, kingorngagut 12 inut.

⁶ Ama kingorngagut takojaulaukpok atautsikut ᴋatangutigênut 500 it unorᴋejanginut; sulle mâna unuktut tâpkonangat inôvut, ilangille sinisimanerput.

⁷ Ama takojaulaukpok Jâkobusemut, kingorngagut Apostelinut ilûnainut.

⁸ Ilûnainit kingorlerpângovlunga uvangatauk takolaukpara, erniangojotut innersimangitotut-idlunga.

⁹ Uvanga mingnerôvunga Apostelinit; nelopᴋotijunga taijaunermik Apostelemik; Gûdib ilagêktoᴋotingit unangmilaurapkit.

¹⁰ Gûdible saimarsaininganut ilinganera taimaipok; saimarsautâlo uvamnut pijok sulinane pimangilak, uvangale taipkonangat tamainit piniarnersaulaukpunga; uvangale pingitunga, Gûdible saimarsainingata ilagingmanga.

¹¹ Tagva uvangalônêt taipkoalônêt, taimâk oᴋâlavogut, taimaglo okpilaukpose.

¹² Kristûsele toᴋungajunit makisimajok oᴋautigijaungmat, ᴋanok tagva illapse ilangit oᴋauseᴋarᴋât, makinek toᴋungajunit sunaungimât?

¹³ Makinerle toᴋungajunit sunaungipat, Kristûsetauk makisimangilak.

¹⁴ Kristûsele makisimangipat, oᴋâlanivut sulingilak, okpernisetauk sulinginivok.

¹⁵ Uvagullo naipitaunajarpogut kigligiutsijutitut nelangaitutitut Gûdemik; tâmna Kristûsemik tupaktitsijok oᴋautigigaptigo, tupaktinajalaungitanganik, toᴋungajut makiviksaᴋangipatta.

¹⁶ Toᴋungajut makiviksaᴋangipatta, Kristûsetauk makisimanginivok.

¹⁷ Kristûsele makisimangipat, okpernise sunaungilak, suilelo ajornipsingnêpose.

¹⁸ Taimâktauk assiomavut Kristûseme sinisimajut.

¹⁹ Mâne kisiane inôtiluta Kristûse neriugilauruptigo, inungnit tamainit ajulernerpângovogut.

²⁰ Mânale Kristûse toᴋungajunit makisimavok, sivorlerpângovorlo sinisimajut akornganit.

²¹ Inungmut atautsemut toᴋo pingmat, inungmullo atautsemut makiviksak toᴋungajunit pivok.

²² Sorlo ilûnatik Adameme toᴋolermatta, taimâk Krîstuseme ilûnnatik ômartitaujomârput.

²³ Ilûnnatigle tuglerêtsiartuksaunitik maliklugo. Sivorliotijok Kristûse; kingorngagut Kristûsib inuᴋotingit, tikitsomârpat.

²⁴ Tamattoma kingorngagut naggatiksak, nâlegauvik pititsomârpago Gûdemut Atâtamut nâlegaunerillo, ataniotinerillo pitsartunerillo tamaita atorungnairᴋojomârunigit.

²⁵ Ataniotijariaᴋarporle, ômigijiminik ilûnnainik ilijerᴋârane itikame atânnut.

²⁶ Omisuktut kingorlerpângat pêjartaujomârtok tagva toᴋo.

²⁷ Tamaitaksuit ililaungmagit itigangita atânut. Tamaitaksuillo nâlektitaujut (tâpsomunga) oᴋautigingmagit, nalonangilak, tâpsomunga tamainik nâlektitsijok, tâmna pijaungilak.

²⁸ Tamaitale nâlegarilerpatsuk, tagva Ernerubtauk nangminek nâlegarijomârpâ nâlektitsijok tamainik tâpsomunga, Gûde kissime pitôᴋovlugo tamaine.

²⁹ Toᴋungajut makitsomângipatta, ᴋanok sulinajarᴋât baptitaulertut toᴋungajut pivlugît? Sôk baptitaujomavât toᴋungajut pivlugît?

³⁰ Sôklo uvagut nangianartomêtsainarᴋitâ?

³¹ Sorlo nalâgut nertornautigigapse Kristûseme Jêsuseme Nâlekame, uvlut tamaita toᴋolertotun-ipunga.

³² Inuktut iluseᴋarlunga, nergjutit nujuartut pâlaurapkit Efêsuseme, tamanna suksarinajarpigô, toᴋungajut makitsomângipattâ? “Nerrilerta imilutalo, ᴋaupat toᴋoniarapta.”

³³ Uivêrijauniarase. Oᴋausilungnerub asserortipait ilusit ajungitut.

³⁴ Tupatsialerluselo idluituliniarase; ilangit Gûdemik tukkisineᴋangimatta; kangusuᴋovluse taimâk oᴋarpunga.

³⁵ Oᴋartoᴋarajarpalle: ᴋanok toᴋungajut makitsomârᴋât? ᴋanorlo ilingajomik timeᴋarlutik sakᴋeromârᴋât?

³⁶ Silaidlartotit, karngarsortat ômarniangilak, toᴋogune kissiane.

³⁷ Karngarsortallo ilâ timeungilak pijomârtuksak; karngasûtetuinauvorle, sanaugaksarlônêt assialônêt.

³⁸ Gûdible timeᴋartipâ issumaminik karngasûtillo ilûnaita ingmikut timiksaᴋartipait.

³⁹ Uvinît ilûnatik adsigêngilat: inuit assianik uvineᴋarput, nergjutillo assianik, mingeritjattauk assianik tingmitjattauk assianik.

⁴⁰ Timeᴋarpok ᴋilangme, timeᴋarivok nuname. ᴋilangmêtut pinnarnarnekarput assianik nunamêtullo assianik.

⁴¹ Seᴋinek ᴋaumaneᴋarpok assianik, taᴋkek ᴋaumaneᴋarpok assianik, uvloritjat ᴋaumaneᴋarput assianik; uvloritjat ilangit ilamingnit ᴋaumanersaungmatta.

⁴² Taimaitsomârivoᴋtauk toᴋungajut makitsomârningat. Asseroraksak ilijaulerpok, asserojuitorlo makitsomârpok.

⁴³ Pinnarnaidlartok ilijaulerpok, ânanaulunelo makitsomârpok. Ajulertok ilijaulerpok, pitsartudlarlunelo makitsomârpok.

⁴⁴ Time uvinilik ilijaulerpok, makitsomârporlo time anernilik. Sorlo timeᴋarmat uvinilingmik, taimâktauk timeᴋarivoᴋ anernilingmik.

⁴⁵ Sorlo aglaksimangmat: Inuk sivorlerpâk Adame pingortitaulaukpok timeᴋardlune ômajomik tarnilingmik (uvinilingmik); Adamelo kingorlek anerneliotitauvok ômartitsijomik.

⁴⁶ Timele anernilik sivorliungilak; uviniligle, kingorngagut anernilik.

⁴⁷ Inuk sivorlek ivjomit pivok, uviniliovlune. Inûble aipanga Nâlegauvok ᴋilangmit pijok.

⁴⁸ Uviniliub ilinganingatut, taimainivuttauk ᴋilangmêtut.

⁴⁹ Sorlo uvinilik adsigilauraptigo, taimâktauk adsigijomârivavut ᴋilangmêtub ilinganinga.

⁵⁰ Mattomingale oᴋautjigivunga ᴋatangutikka, uvingub aublo Gûdib nâlegauvinga kingormgutijungnangilâk; asseroraksablo asserojuitok kingormgutinianginivâ.

⁵¹ Ahâk, nalonartomik oᴋautivapse: Ilûnata siningniangilagut, ilûnatale ablatsângortitaujomârpogut.

⁵² Tagvainak ijib sikkungilarningane tiptulautib kingorliksab naliuningane. Tiptulaut nipleromârmat; toᴋungajullo makitsomârput asserojuilutik, uvagullo ablatsângortitaujomârpogut.

⁵³ Asseroraksak tamanna asserojuitomik atiniariaᴋarmat, toᴋojuksarlo tamanna toᴋosuitomik atiniariaᴋarivok.

⁵⁴ Asseroraksarle tamanna atiniarpat asserojuitomik toᴋojuksarlo tamanna atiniarpat toᴋosuitomik tagva nalautsiniarput oᴋautsit aglaksimajut:

⁵⁵ Toᴋo êjauvok sâlaᴋarnermut. Toᴋo, kapputit naûk? Kappianartovik, sâlaᴋarnît naûk?

⁵⁶ Toᴋuble kapputâ tagva ajornek, ajorneruble pitsartuninga tagva perᴋojak.

⁵⁷ Gûde ᴋujagidlartaule, sâlaᴋartimattigut Nâlegaptigut Jêsuse Kristûsikut.

⁵⁸ Taimaimat nagliktakka ᴋatangutikka, Nâlekab piniarᴋojanginik pivalliatsainaritse, sôngoluse soᴋᴋosijuititse! Nalunginapse, piniarnise Nâlekame sulinase pinginapsigik.