I Korintemiunut 14 - Labrador Inuttitut Heritage Bible

Nelautainerub ᴋanok atortaujuksauninganik.

¹ Naglingnek pinasuarsiuk. Tunergusiat, Anernerub pingit tussugisigik, tukkeᴋartitsinerle piluardlugo.

² Oᴋautsit tussarngartat atorlugit oᴋâlajok inungnut oᴋâlangimat Gûdemulle; tukkisijaujungnangimat kimut, anernikulle nelonartut oᴋautigivait.

³ Tukkeᴋartitsilunele oᴋâlajok inungnut oᴋâlavok, idluarsarlugit, ᴋaiblarlugillo nekoksitilugillo.

⁴ Oᴋautsit tussarngartat atorlugit oᴋâlajok nangminek idluarsivok; tukkeᴋartitsilunele oᴋâlajub illagêt idluarsitipait.

⁵ Oᴋautsit tussarngartat atorlugit oᴋâlajungnarᴋogalloarpapse ilûnase, anginersamigle tukkerᴋartitsiluse oᴋâlaᴋovapse. Tukkeᴋartitsilune oᴋâlajok anginersaungmat oᴋâlajomit oᴋautsit tussarngartat atorlugit; tâmna (mikinersaulungilak) kissiane tukkeᴋartitsiᴋassiutjigune, illagêt tamakkonunga idluarsartauᴋovlugit.

⁶ Tagvale ᴋatangutikka, oᴋâlajartoruma ilipsingnut, oᴋautsit tussarngartat atorlugit, suksaunajarᴋîk ilipsingnut, oᴋâlavigingikupse, sakᴋijâtsiartullônêt, illisimanartullônêt, tukkeᴋartitsinerlônêt, ajoᴋertûserlônêt atorlugît?

⁷ Sorlotauk ômajôngitut nipliajôrutit, nipjautaungmangâllônêt, harfeongmangâllônêt, ingmikôrtomik errinaᴋangipatta, ᴋanok ᴋaujimanarᴋâ, suna nipjausijautaungmangât, harfesijautaungmangâllônêt.

⁸ Tiptulautiblo nippinga nelonarpat, kina oppalungainajarᴋâ sorsungniarnermût?

⁹ Taimâktauk ilipse oᴋautsit tussarngartat atorlugit oᴋarupse, tukkisijaujungnangitunik oᴋauseᴋarluse, ᴋanok tagva ᴋaujijaujungnarᴋâ, suna oᴋautaungmangât? Maungatuinak oᴋâlaniarapse.

¹⁰ Oᴋautsit sunatuinaugalloarput silaksoarme, atautsillônêlle tukkeᴋangitoᴋangilat.

¹¹ Nippible tukkinga tussângikupko, oᴋâlajomut tukkisinarniangilanga; tâmnatauk oᴋâlajok tukkisinarniangilak uvamnut.

¹² Taimâktauk ilipse, Anernerub tunergutingit pinasuarvikkapsigik, anginerpângojomigle illagêt idluarsitiksanginik pinasuaritse, tamainik peᴋaluarᴋovluse.

¹³ Taimaimat, oᴋautsit tussarngartat atorlugit oᴋâlajok tuksiarle, oᴋautsine nelonarungnaititsomavlugittauk.

¹⁴ Oᴋautsit tussarngartat atorlugit tuksiaruma, anernipkut tuksiaralloarpunga, issumagijakkale atornangilat kimullônêt.

¹⁵ ᴋanorle tamanna ilingajuksauvâ? Imâgle: Tuksiaromavunga anernikut, tukkisinartomiglo tuksiaromavunga; nertordlerutiksanik imgeromavunga anernikut, tukkisinartuniktauk nertordlerutiksanik imgeromavunga.

¹⁶ Saimartitsiguville anernikut, ᴋanok illisimangitok tagvanêtok Amenemik oᴋarungnarᴋâ ᴋujalitiksatit pitjutigilugit, oᴋautsitit tukkisinginamigît?

¹⁷ Igvit ᴋujalitsiaralloarpotit, assingnulle idluarsititaujutiksaungilak.

¹⁸ Gûdiga ᴋujagivara, oᴋautsit tussarngartat atorlugit oᴋâlanersaugama ilûnapsingnit.

¹⁹ Ilagênele oᴋâlavlunga oᴋautsit tallimainait tukkisinartut atorlugit, assikka ajoᴋertoromavlugit, tamanna idluarinersarivara oᴋautsinit ten tausendinit tussarngartanit.

²⁰ ᴋatangutikka, sorutsititut silatuneᴋarniarase; ajortomulle nutakᴋatitun-ititse, inersimajutitulle silatuneᴋaritse.

²¹ Perᴋojane aglaksimavok: Inungnut ukkununga oᴋâlajomavunga oᴋautsinut tussarngartanut, takorngartallo ᴋaninginut; taimailioralloarumale, nâlengniangilânga.

²² Taimaimat oᴋautsit tussarngartat nalunaikutauvut okpertunu-ungitok, okpingitunulle; tukkeᴋartitsinerle okpingitunu-ungitok, okpertunulle.

²³ Ilagêt iluengarlutik atautsime katimalerunik ilûnatiglo oᴋautsit tussarngartat atorlugit oᴋâlakpatta; ilisimangitullo okpingitullônêt iterunik, tâpkonunga ilisimainerartaunajangilasê?

²⁴ Ilûnatigle tukkeᴋartitsilutik oᴋâlakpatta, okpingitorlo ilisimangitorlônêt iterune, ilûnainut tagva inertertaulerpok erᴋartortaulerlunelo ilûnainut.

²⁵ Taimaglo ômatingane ijersimajut sakᴋerajarput; pâmakterlunelo Gûde tuksiarviginajarivâ, kigligiutsinajarporlo Gûdemik nalâgut ilipsingnêtomik.

²⁶ ᴋanok tamanna ilingavâ, ᴋatangutikkâ? Katimalerangapse, ilûnase nelise imgerutiksaᴋarpok, ajoᴋertuitiksaᴋarpok, oᴋautsinut tussarngartanut oᴋalavok, sakᴋerviomajutiksaᴋarpok, nalonarungnaititsijutiksaᴋarpok. Tamakkoa tamaita ilingatitaulit âᴋiktaujutiksamut.

²⁷ Oᴋâlajoᴋarpat oᴋautsit tussarngartat atorlugit, Maggûglônêt pingasunillônêt ununersaungitut Nelliᴋârlutik pilît, atautsible nalonarungnaitiligit.

²⁸ Nalonarungnaititsijoᴋangipalle, ilagêktune (imna) nippangerle; ingminulle Gûdemullo oᴋarle.

²⁹ Tukkeᴋartitsijulle maggûglônêt pingasullônêt oᴋâlalit, assingillo kiglisiniarlit.

³⁰ Tagvanele iksivajut ilangat sakᴋerviomajutiksaᴋarpat, sivorlek nippangerle.

³¹ Ilûnase tukkeᴋartitsiluse oᴋâlatuinariaᴋarpose Nalliᴋârluse, ilûnatik ilinniarᴋovlugit, ilûnaitalo ᴋaiblartauᴋovlugit.

³² Nalautaijulle (tukkeᴋartitsijut) anerningita nelautaijut (assitik) nâlegarivait.

³³ Gûde idluangitomik perᴋojitsangimat, ulapirsaumigle, sorlo illagêktune ivjornaitune ilûnâne.

³⁴ Arnase nippangerlit katimavingme; oᴋâlanermik perᴋojautsangimatta, nâlektuksautuinarlutigle, sorlo perᴋojattauk oᴋarmatta.

³⁵ Sumigle ilinniaromagunik, uitik aperilitigik iglomingne. Oᴋâlanek katimavingme idluangimat arnanut.

³⁶ Ilipsingnillônêt Gûdib oᴋausingit pimavât? Ilipsingnullônêt kissipsingnut pititaumavât?

³⁷ Nelautaijônasugijoᴋarpat, anernelionasugijokarpallônêt, tâmna ᴋaujilerle, aglaktakka ilipsingnut Nâlekab perᴋojaringmagit.

³⁸ ᴋaujimangitoᴋarpalle, tâmna ᴋaujimangilerle.

³⁹ Taimaimat ᴋatangutikka, tukkeᴋartitsinermik pinasuaritse, Oᴋautsinullo tussarngartanut oᴋâlajut inerterniarasigik.

⁴⁰ Ilusitsiarikluselo, idluarsainiaritse tamainik.