I Korintemiunut 13 - Labrador Inuttitut Heritage Bible

Naglingnerub anginerpângoninganik.

¹ Inuit (ilûnatik) Engelillo oᴋausinginut oᴋâlajungnaruma, naglingneᴋarnangalo, ᴋaᴋorlertut sivanertotut, nipliajôrutitullônêt immiajotut inajarpunga.

² Nalautainerniglo oᴋarungnaruma, nalonartoᴋsuillo tamaita ᴋaujimagupkit, ilisimanartullo tamaita ilisimagupkit; okpernekarumalo tamainik, ᴋakᴋâluit aglât nukterungnarlugit, naglingneᴋarnangalo, suksaunajangilanga.

³ Pikkalo tamaita piliutigigalloarupkit aklujunut, timigalo ikomamut nungutautigalloarupko, naglingneᴋarnangalo, atorajangimarikpoᴋ uvamnut.

⁴ Naglingnek kamangitsertorlunelo pitsiartoᴋsôvok, naglingnek anâtûtingilak, naglingnek tapatongilak, piojorinanelo;

⁵ Iluserluktomik sakᴋertitsingilak, nangminiksarsiungilak, ningarosuktitaujungnaranelo, asseroinasuangilak.

⁶ Idluitulineᴋ ᴋuviasûtigingilâ, mikseᴋârnerle ᴋuviasûtigivâ.

⁷ Tamainik erᴋasungilak, tamainik okperpok, tamainik nerriukpok, tamainik ᴋenuersârpok.

⁸ Naglingnek sorairniangilak, nalautainerille sorairomârput, oᴋautsillo (ingmigôlingajut) sorairomârput, ilitarsinerlo sorairomârpok.

⁹ Ilainarnik ᴋaujimagapta, ilainarniktauk nelautaivluta.

¹⁰ Nâmaksinerle neliutikpat, ilainârnerit tâva sorairomârput.

¹¹ Sorusiolaurama, sorusertut oᴋâlalaukpunga, sorusertullo silatuneᴋalaukpunga, issumaᴋarlarmalo sorusertut; angutimarioleramale iperarpara sorutsib ilusinga.

¹² Mâna ᴋemergovogut sorlo tachartûtikut, erginaisiordluta, pijomârtomele kênarmit kênarmut. Mâna ilitarsivunga ilainarnik, pijomârtomele ilitarsijomârpunga, sorlo ilitarijaugama.

¹³ Mânale makkoa pingasut: okpernerlo, nerriungnerlo, naglingnerlo sokᴋoserniangilat. Naglingnerlo tamakkonangat anginerpauvok.