I Korintemiunut 12 - Labrador Inuttitut Heritage Bible

Anernerub tunergutinginik adsigêngitunik.

¹ ᴋatangutikkale, neloᴋojomangilapse tunergutinik Anernerub pinginik.

² Nalungilase, nalojoᴋsôlaurapse, ailaurapselo Gûdingoanut oᴋajuitunut, sorlo tessiortaulaurapse.

³ Taimaimat ᴋaujitipapse Gûdib Anerningagut oᴋâlajub Jêsuse oᴋarnerlôtigitsangilâ; neliatalônêt Jêsuse Nâlekamik taijungnangilâ, Anernerub ajunginerub pitingipago.

⁴ Tunergutit sunatuinauvut, Anernerle tâmnautsainarpok.

⁵ Kivgartûtillo sunatuinauvut, Nâlegarle tâmnautsainarpok.

⁶ Pitsartunerillo sunatuinauvut, Gûdele tâmnautsainarpok, tamainik piniartitsijok tamaine.

⁷ Ilûnainelo Anernerub tunergutingit sakᴋerput assingita idluarᴋutiksanginut.

⁸ Ilangat illisimanartunik oᴋauseᴋarlune tunitjiviovoᴋ Anernermut; ilangalle ilitarsinermik oᴋauseᴋarlune, Anernermut tapsomungainak.

⁹ Ilangallo okpernermik (tunitjiviovok) Anernermut tâpsomungainak, ilangallo tunergumik inûliklernermut, Anernermut tâpsomungainak.

¹⁰ Ilangallo tatamnartulinermik; ilangallo nelautainermik oᴋâlavlune; ilangallo illitarsivlune anernernik; ilangallo oᴋautsinut tussarngartanut oᴋâlavlune; ilangallo oᴋautsit tussarngartat nelonairlugit.

¹¹ Tamakkoale tamaita Anernerub tâpsoma atausetôjub piniarpait, issumaminiglo ilûnaita atunit ilangiutitipait nangminerijaksanginik.

¹² Sorlo time atausiojok unuktunik avateᴋarmat, sorlolo timib tâpsoma atautsib avatingit ilûnatik, unugalloardlutik, atausek timigingmatsuk: Kristûsetauk taimainivok.

¹³ Tamapta Anernermut atautsemut baptisimagapta, atautsemik timeolerᴋovluta Jûdiongmangâptalônêt, Grîᴋiongmangâptalônêt, kivgaungmangâptalônêt, kivgaungimangâptalônêt; ilûnatalo imitauvogut Anernermut atautsemut.

¹⁴ Timelo atausênarmik avateᴋangimat, unuktunigle.

¹⁵ Itikat oᴋarajarpatta: aggaunginapta, tamanna pivlugo timib avatigingilâtigut; timib tagva avatiginajangilagît?

¹⁶ Siuttauk oᴋarajarpat: ijiunginama, tamanna pivlugo timib avatigingilânga; timib tagva avatiginajangilaûk?

¹⁷ Time ilûnane ijiokpat, tussarnek nanênajarᴋâ? Time ilûnane siutaukpat, naimanek nanênajarᴋâ?

¹⁸ Mânale Gûdib avatit tamaita ililaukpait ilûnaita ingmikôrtilugit timemut, issumaminik.

¹⁹ Avatille ilûnatik atausênak avateokpatta, time nanênajarᴋâ?

²⁰ Mânale avatit unudlarput, timele atausiovok.

²¹ Ije aggangnut oᴋarungnangilak: atoriaᴋangilapse; niaᴋorlônêt itikanut: atoriaᴋangilapse.

²² Imailuarporle: Timib avatingit sangênersaungasugijavut, tamakkoa atoriaᴋarnerpângovut.

²³ Kangunarluarasugijavut timeme, tâpkoa pinnarnarsitinersarivavut; pinnarnaitigijavullo, tâpkoa ânanausitinersarivavut.

²⁴ Ananausitigijavut pinarnarsititaujariaᴋangimatta. Gûdible time taimâk avatitârdlugo pivâ, avat ajoᴋsarnersak pinnarnarnersautilerdlugo;

²⁵ Akkerartortigêrᴋonagit timemêtut, ikajortigêrᴋovlugille avatit ingmingnut.

²⁶ Tagva avatit ilangallônêt ânialerpat, avatit ilûnatik âniaᴋatigivât; avatillônêt ilangat nertornartitaukpat, avatit ilûnatik ᴋuviasuᴋatigivât.

²⁷ Kristûsible timigivâse, avatigivâse ingmiᴋôrtiluse.

²⁸ Gûdiblo illagêktune kivgartorᴋolaukpait sivorlermik Apostelit, aipanganik nelautaijut, pingajuanik ajoᴋertuijut, tungâgut tatamnartulijut, tungâgut inûliklernermik tunergutilit, ikajortuksallo, ataniotijullo, oᴋautsiniglo (ingmigolingajunik) sunatuinarnik oᴋâlajut.

²⁹ Ilûnatik Aposteliovât? Ilûnatik nelautaijôvât? Ilûnatik tatamnartulijungnarᴋât?

³⁰ Ilûnatik inûliklernermik tunerguteᴋarᴋât? ilûnatik oᴋautsinik (ingmigôlingajunik) sunatuinarnik oᴋâlavât? Ilûnatik nalonarungnaititsijungnarᴋât?

³¹ Tunergutit saimanartut idluarnersat pinasuarsigik. Sullelo mâna unertôtijomavapse apᴋomik idluarnerpângojomik.