I Korintemiunut 11 - Labrador Inuttitut Heritage Bible

Arnat annorâᴋartuksauninginik ᴋanok. Komuniônib uvloᴋsiorutauninganik.

¹ Uvamnik malikteotitse, sorlo uvanga Kristûsemik.

² Nertorpapse ᴋatangutikka erᴋaumagapse (oᴋautsimnik) tamainik, maligaksallo perᴋojakka ilipsingnut atutsiarapsigik.

³ ᴋaujimaᴋovapsele, angutit naliatalônêt Kristûse niaᴋoringmago, arnable angut niaᴋorivâ, Kristûsible Gûde niaᴋorivâ.

⁴ Angutit naliat tuksiarangame, nalautaijarangamelônêt nessarsimavlune, niaᴋone nachonartipâ.

⁵ Arnalle naliat tuksiarangame, nalautaijarangamelônêt nessarsimanane, niaᴋone nachonartipâ; salimajotun-inajarame.

⁶ Arnak nessarsimajomangikune, kipjartaugilît nujangit. Arnarle nujaᴋarune kipjarsimajunik salimajuniglônêt nachonadlarmat, nessarsimavlune pile.

⁷ Angulle nessarsimajuksaungilak, adsiutaungmat Gûdemut, tâpsomalo nertornautigingmago: angutible arnak nertornautigivâ.

⁸ Angut arnamit pingimat, arnarle angumit pivok.

⁹ Angut pingortisimanginivok arnak pivlugo, arnarle angut pivlugo.

¹⁰ Taimaimat arnak nâlengnermut nessaᴋartuksauvok, Engelit pivlugit.

¹¹ Kisianele angullônêt arnamik ilaᴋangilungilak, arnarlônêt angumik ilaᴋangilungilak, Nâlekame.

¹² Sorlo arnak angumit pingmat, taimâktauk angut arnakut pigivok; tamaitale Gûdemit (pivut).

¹³ Nangminek issumatitse, takominarmangât, nessarsimanane arnak tuksiarangat Gûdemut.

¹⁴ Ingminiglônêt sakᴋijânginivâ ilipsingnut, angutib nujane takijorortiᴋunigit, nachonautigingmagît?

¹⁵ Arnable nujane takijorortikunigit, pinnarnautigingmagît? Nujarminik tunitjiviongmat ulliktaujutigivlugit.

¹⁶ Tamannale pivlugo akkerartorosuktoᴋarpat akunapsingne, tâmna ᴋaujilerle, uvagut taimaitomik iluseᴋanginapta, Gûdib illagêktoᴋotingillônêt.

¹⁷ Tamattomingale inerterijuksauvunga: Nertorluse ajulerpapse, idluarnersamik iluseᴋarase, idluanginersamigle iluseᴋarluse katimavakkapse.

¹⁸ Sivorlermik tussarpinga, katimalerangapse ilagêktutitut, akkerartortigêkapsegôk, ilangagullo okperivara.

¹⁹ Ingmingnut akkerartôtijoᴋariaᴋarmat ilipsingne, nelâgôrtut akunapsingne sakᴋijârᴋovlugit.

²⁰ Taimâk katimalerangapse, Nâlekab Komuniôninganik pijungnangilase.

²¹ Sivorngagut atunit ingmiᴋôrluse nerrivakkapse neksartapsingnik; illapselo ilangat kâkpok, aipanga nâmaksivok.

²² Igloᴋangilasê nerrimârviksapsingnîk imerviksapsingniglô? Ubvalo Gûdib ilagêktoᴋotingit nachogivisigîk, peᴋangitullo kangusuktilugît? Sumik ilipsingnut oᴋartuksauvîk? Ilipsingnik nertordlertuksauvîk? Tamanna pitjtigilugo nertungilapse.

²³ Nâlekamit pivara ilipsingnut unertûtigijara (imaitok): Nâlekab Jêsusib unnuarme taipsomane pititaugame, ᴋakᴋôjak tiguvâ,

²⁴ ᴋujalivlunelo avgorpâ oᴋarlunelo: Tigulugo nerrisiuk; tagva timiga, tunijauniartok pivluse: taimailioritse erᴋaumajauniksamnut.

²⁵ Taimâktauk ermgusiarsuk (tigugivâ), nerrijarêramik, oᴋarlunelo: Ermgusiarsuk tâmna Testamentetângovok aumne; taimailioritse imilerangapsiuk erᴋaumajauniksamnut.

²⁶ ᴋakᴋôjak tamanna nerrilerangapsiuk, ermgusiarsungmillo tâpsomangat imilerangapse, Nâlekab toᴋunga oᴋautigijaksarivase tikerᴋârtingao.

²⁷ Neliat ᴋakᴋôjamit tâpsomangat nerrijok, Nâlekablonêt ermgusiarsunganit imertoᴋ idluarsinane, tâmna pidlaraksauvok Nâlekab timingalo aungalo pivlugik.

²⁸ Inugle nangminerminik kiglisiniarᴋârle, taimaglo ᴋakᴋôjamit tâpsomangat nerrile, ermgusiarsungmillo tâpsomangat imerle.

²⁹ Nalialle nerrijok imertorlo idluarsinane, tâmna nerrivlunelo imerpok erᴋartortautiksaminik; tamanna pivlugo. Nâlekab timinga issumaginginamiuk.

³⁰ Taimaimat ajulertut ᴋanimajullo unudlarput akunapsingne, unuktullo sinikput (toᴋovut).

³¹ Nangminiptingnigle erᴋartorupta, erᴋartortauniarajangilagut.

³² Erᴋartortaujarangaptale, Nâlekamut sugiartaulerpogut, silaksoarmiut illagilugit pidlartauᴋonata.

³³ Taimaimat, ᴋatangutikka, nerrijartorluse katilerangapse, ilase utaᴋisigik.

³⁴ ᴋâktoᴋarpalle, iglomine nerrerᴋârle; katimanipsingnut erᴋartortautiksarserᴋonase. Tamakkoa assingit âᴋigomavakka tikikuma.