I Korintemiunut 10 - Labrador Inuttitut Heritage Bible

Paulusib ᴋaiblarpait okpertut, Israêlititut nâlelaungitutitut ilerᴋonagit; Gudiungitunik Sâtanasemiglo kivgartorᴋonagit, ᴋatangutillo sangêgtut sinaungatitauᴋonagit.

¹ Erᴋaititsomavapsele ᴋatangutikka, atâtagijavut ilûnatik nuvujab atânêlaungmatta, ilûnatiglo imakut pissulaukput;

² Ilûnatiglo Môsesemut (ilingavlutik) baptitaulaukput nuvujamelo imânelo.

³ Ilûnatiglo adsigêktomik nerᴋiksamik anernelingmik nerrilaukput;

⁴ Ilûnatiglo adsigêktomik imiksamik anernelingmik imilaukput; ᴋairtomille anernelingmik pijomik imilaukput, tâpsoma malingmagit; ᴋairtok tâmna Kristûseolaukpok.

⁵ Unuktulle tâpkonangat Gûdib ᴋuviagilaungilait; taimaimat inôjungnaititaulaukput inuᴋajuitome.

⁶ Tamadjale ulloreasûtiksarivavut, ajortomut ikliguᴋonata, taipkutitunak ikliguktutitut.

⁷ Gûdeungitullo nâlengniarasigik taipkoa ilangititut, sorlo aglaksimangmat: Inugasaksuit ingilerput nerrimârlutik imilarmiglo, nikovilerpullo pingoaromavlutik.

⁸ Assiniaratatauk, sorlo taipkoa ilangit assinialaungmatta, 23,000 illo toᴋolaukput uvlorme atautseme.

⁹ Kristûsemiglotauk ôktorniarata, sorlo taipkoa ilangita ôktulaungmatsuk, ᴋuglugiarâlungnullo toᴋotaulaukput.

¹⁰ Avamudlarasetauk, sorlo taipkoa ilangit avamudlarmatta asserorsaijomullo toᴋotaulaukput.

¹¹ Tamakkonungale tamainut pijauvut taipkoa, erᴋaumajaksauniarᴋovlugit; aglaksimagivuttauk, inertertauᴋovluta uvagut, silaksûb uvlungita kingorlingine inôjogut.

¹² Taimaimat issumamigut nangerasugijok, kamalerle ochoᴋonane.

¹³ Assianut ôktorluktaungilase sulle, inuit atorpaktanginut kisiane; Gûdible nertornarlune ôktortaukoniangilâse ajortapsingnik; ôktorlungnartorle imâk naggaserniarpâ asserortauᴋonase.

¹⁴ Taimaimat nagliktakka, Gûdingoanik (Gûdiungitunik) kivgatornek ulloreagisiuk.

¹⁵ Sorlo ilisimajunut oᴋâlavunga, oᴋautsikka tamakkoa kiglisiniarsigik.

¹⁶ Ermgusiarsuk saimanartok, saimartavut, tâmna Kristûsib aunganut illagêgutaungilâk? ᴋakᴋôjak, avgortavut, tâmna Kristûsib timinganut illagêgutaungilâk?

¹⁷ Kaᴋᴋôjaᴋ atausiongmat, taimâk unuktôvluta timiovogut atautsemik; ᴋakᴋôjak atausek ilangiubvigigaptigo tamapta.

¹⁸ Uvinikut Israêlitiojut nautsertorsigik. Tunergutivinernik nerrijut, taipkoa tunerguservik ilangiubvigingilât?

¹⁹ ᴋanok tagva oᴋarlangâ? Gûdeungitok sunaunerarpigô? Gudeungitunullônêt tunergutit sunaunerarpakkâ?

²⁰ Oᴋarpungale, nalojut tunergutiksamingnik tunijivut Sâtanasinut, pinatiglo Gûdemut. Sâtanasille ilagêngninginut ilauᴋojomatsangilapse.

²¹ Nâlekab ermgusiarsunganit, Sâtanasillo ermgusiarsunganit atautsikut imerungnangilase; Nâlekab nerrimârvianit, Sâtanasillo nerrimârvianit ilangiutijungnangilase.

²² Nâlegarlônêt ningarosuktitsomavitigô? Tâpsomangat pitsartunersauvitâ?

²³ Tamainik pijungnaralloarpunga, ilangille atornangilat. Tamainik pijungnarpunga, ilangille idluarᴋutaungilat.

²⁴ Naliallônêt nangminerijaksaminik ᴋenerniarane ilûnatigle atunit assime pingit issumagiligit.

²⁵ Nerᴋit niorvgutiksat tamaita niuvervingmêtut nerrisigik, aperᴋutiginiarnagillo issumajârᴋonase.

²⁶ Nâlekab nuna pingillo tamaita perᴋutigingmagit.

²⁷ Okpingitulle ilangata nerrijartorᴋokpase, aijomagupselo, mannijaujut ilipsingnut nerrisigik, aperᴋutiginiarnagillo issumajârᴋonase.

²⁸ Oᴋautjaulerupsele, nerᴋe tamanna tunerguteviniovok Gudiungitunut; nerrijuksaungilase ᴋaujititsijok tamattominga pivlugo; issumajârtoᴋarᴋonago. Nâlekab nuna pingillo tamaita perᴋutigingmagit.

²⁹ Erᴋarsautille oᴋautigivakka, igvit erᴋarsautitit pivlugit pinanga, assivîlle erᴋarsautingit pivlugit. Sôk assima erᴋarsautinginut kivgaunginera erᴋartortauᴋojaksarivigô?

³⁰ ᴋujalivlunga atorupko, sôk mitautigijaujariaᴋarᴋîk ᴋujalijutigijara pitjutigilugô?

³¹ Taimaimat, nerrijarangapselônêt, imerangapselônêt, sumiglônêt piniarmangâpse, tamaita piniarsigik Gûde nertortauᴋovlugo.

³² Sinaungajutauniarase Jûdinullônêt, Grîᴋinullônêt, Gûdib ilagêktoᴋotinginullônêt.

³³ Sorlo uvangatauk tamainut ᴋuviagijaunasuarama sunatuinatigut, idluarᴋutiksamik pinasuarlunga uvamnu-ungitok, unuktunulle, piulijauᴋovlugit.