I Johannesib 4 - Labrador Inuttitut Heritage Bible

Kaiblainimik ajoᴋittuiniluktut pivlugit. Naglingnirub ilinganinganik.

¹ Naglingnartosi aninirit ilûnaita okpirinasigik, aninirilli ôktorsigik, Gûdemit pingmangâtâ; nalautaijut nalangaitut unuktoksuit aimangmatta silaᴋsoarmut.

² Tamattomangat Gûdib Anerninga illitarisiuk: Anernerit ilûnatik Jêsuse Kristusemik uvinikut tikitomik kigligiutsijut, Gûdemit pivut;

³ Anernerillo ilûnatik Jêsuse Kristusemik uvinikut tikitomik kigligiutsingitut, Gûdemit pingilat. Tamadjalo Antikristusib anininga tussaumajasi tikitsomârmat, tamattomanilo silaᴋsoarmêlirêrpoᴋ.

⁴ Kitorngârsuit, Gûdemit pivosi, taipkoningalo sâlaᴋarposi; ilupsingnêtoᴋ anginisaungmat silaᴋsoarmêtomit.

⁵ Taipkoa silaᴋsoarmit pivut, tamanna pivlugo silaᴋsûb inungititut oᴋâlavut, silaᴋsûblo inungita tussâgôrpait.

⁶ Uvagut Gûdemit pivogut; Gûdemik illitarsijub tussâgôrpâtigut; Gûdemit pingitub tussâgôngilâtigut. Tamattomangat miksiᴋârnirub Anerninga, Anernerlo tamartitsijoᴋ illitarilipavut.

⁷ Naglingnartosi, nagliktigêlauᴋta! naglingniᴋ Gûdemit pingmat; nagligosuktorlo Gûdemit erniangovoᴋ, Gûdelo illitarivâ.

⁸ Naglingitub Gûde illitaringilâ; Gûde naglingniongmat.

⁹ Mattomunga Gûdib naglingninga uvaptingnik saᴋᴋisimavoᴋ, Gûdib Ernituane tililaungmago nunamut, uvagut tâpsomûna inôᴋovluta.

¹⁰ Naglingniᴋ tamadja: uvagut Gûde nagligigaptigoungitoᴋ, tâpsomali naglingmatigut, Erninelo tililaungmago, ullapirsautauᴋovlugo ajornivut pivlugit.

¹¹ Naglingnartosi, Gûdib taimak naglingmatigut, uvaguttauᴋ nagliktigêktuksaugivogut.

¹² Gûdemik takomajoᴋatsangilaᴋ. Nagliktigêkupta, Gûde iluptingnêtsainarpoᴋ, naglingningalo iluptingni nâmaksivoᴋ.

¹³ Anernerminik tunitsivigingmatigut, tamanna ᴋaujijutigivavut, tâpsomanêtsainarapta tâmnalo iluptingnêngmat.

¹⁴ Takolauᴋpogut kigligiutsivogullo, Atâtab Erneᴋ tililaungmago piuliklitioᴋovlugo silaᴋsoarmiunik.

¹⁵ Naliat Jêsuse Gûdib erneringmago kigligiutjijoᴋ, Gûde tâpsomanêtsainarpoᴋ, tamnalo Gûdemêpoᴋ.

¹⁶ Gûdiblo naglingninga uvaptingnut ᴋaujimavlugo okpirivavut. Gûde naglingniovoᴋ, naglingnimêtsainartorlo Gûdemêtsainarpoᴋ, Gûdelo tâpsomanêpoᴋ.

¹⁷ Tamattomunga naglingniᴋ nâmaksivoᴋ uvaptingni, ᴋuviasûtiᴋarᴋovluta uvluksami erᴋartuivingmi; sorlo tâmna ingmat, taimainivogut silaᴋsoarmi tamattomani.

¹⁸ Naglingniᴋ erᴋsinimik illaᴋangilaᴋ, naglingniruble nâmaksijub erᴋsiniᴋ anitipâ; erᴋsiniᴋ ânianartomik illaᴋarmat. Erᴋsijubli naglingniᴋ nâmaksitingilâ.

¹⁹ Nagligilavut, tâpsoma nagligiᴋârmatigut.

²⁰ Oᴋartoᴋarpat: Gûde nagligijara, ᴋatangutiminiglo ômisuktoᴋ, tâmna saglotojoᴋsôvoᴋ. Katangutini tautuktani nagligingikuniuk, ᴋanoᴋ Gûde nagliginajarᴋaûk tautulungitanê?

²¹ Mattomingalo perᴋojaᴋarpogut tâpsomangat, Gûdemik nagligosuktub ᴋatangutinitauᴋ nagligijaksaringmago.