I Johannesib 3 - Labrador Inuttitut Heritage Bible

Gudib ᴋitorngangita ilinganinginik, tagva: ivjornailininginik, ᴋatangutinik naglingninginik, ᴋuviasutiᴋarninginiglo Gudib sângani.

¹ Kimigotitsi ᴋanoᴋ angijomik naglingnimik Atâta saᴋᴋijârtitsilaungmat uvaptingnut, Gûdib ᴋitornganginik taijauᴋogamitigut. Taimaimat silaᴋsûb inungita illitaringilâsi, tâmna illitaringinamitsuk.

² Nagliktakka, mâna Gûdib ᴋitorngarivâtigut saᴋᴋijârsimangilarlo sulli ilingajomârnivut. Kaujimavavulli saᴋᴋijârniarpat, adsiginiaraptigo; takoniaraptigo ilinganinga.

³ Naliat taimaitomik nirriungniᴋartoᴋ tâpsomunga, tâmna ivsornailiniarpoᴋ, sorlo tâmna ivsornaingmat.

⁴ Idluitulijub piᴋojat tapagivait; ajornilo tapaniovoᴋ piᴋojanik.

⁵ Kaujimagivosi, tâmna saᴋᴋisimangmat, ajornivut pêjaromavlugit; tâpsomanilo ajorniᴋangilaᴋ.

⁶ Tâpsomanêtsainartoᴋ idluitulingilaᴋ; idluitulijub takolaungilâ illitarilaunagolo.

⁷ Kitorngârsuit, kimullônêt uivêrijauniarasi. Idluartulijoᴋ idluartôvoᴋ, sorlo tâmna idluartôngmat.

⁸ Idluitulijoᴋ Sâtanasimit pivoᴋ; pigiarninganit Sâtanasi idluitulingmat. Tamanna pivlugo Gûdib Erninga saᴋᴋisimavoᴋ, assioiᴋovlugo Sâtanasib piniarninginik.

⁹ Gûdemit erniangojoᴋ idluitulingilaᴋ, karngautigimajut ôma (ômatinganut) tâpsomanêtsainarmatta, idluitulijungnangilarlo, Gûdemit erniangogami.

¹⁰ Tamattomangat nalonarungnairpoᴋ, Gûdib ᴋitorngangit, Sâtanasiblo ᴋitorngangit nalîngongmangâta: idluartomik pingitoᴋ Gûdemit pingilaᴋ, ᴋatangutiminiglo naglingitoᴋ.

¹¹ Tamadja oᴋautjaunivut pigiarninganit tussartasi, nagliktigêktuksaugapta;

¹² Kaini malingnago! taimna ajortomit pigami, nukani toᴋopâ. Sunalo pivlugo toᴋolaukaûk? Piniarningit ajormatta, nukangatalo piniarningit idluarmatta.

¹³ Tataminiarasi ᴋatangutikka, silaᴋsûb inungita ômigikpasi.

¹⁴ Kaujimavogut, toᴋomit inôtsimut pigapta, ᴋatangutit nagligigaptigik. Katangutimik naglingitoᴋ toᴋomêtsainarpoᴋ.

¹⁵ Katangutiminik ômisuktoᴋ, tâmna inuartôvoᴋ; ᴋaujimavosilo, inuartoᴋ inôsiᴋarungnangimat iluminêtsainartomik.

¹⁶ Tamattomangat naglingiᴋ nalojungnairpavut, inôtsiminik tunijilaungmat pivluta. Uvaguttauᴋ inôsivut tunijaksarigivavut ᴋatangutit pivlugit.

¹⁷ Nunabli mattoma pinginik piᴋartub ᴋatangutini ajoᴋsartoᴋ takoguniuk, ômatinilo parngnanairuniuk tâpsomunga, ᴋanoᴋ taimaitub Gûdib naglingninga ilumini piginajarᴋaûk?

¹⁸ Kitorngârsukka, oᴋausituinarmut, oᴋatuinarmullônêt naglingniarata; piniarnirmulli miksiᴋârnimullo pita.

¹⁹ Tamattomangat nalojungnairpogut miksiᴋârnimênapta, ômativullo manigorungnarpavut tâpsoma sângani.

²⁰ Omatipta erᴋartorpatigut, Gûde anginisaungmat ômatiptingnit, tamaitalo ᴋaujimavait.

²¹ Naglingnartosi, ômatipta erᴋartungipatigut, Gûdemut ᴋuviasûtiᴋarpogut.

²² Sumiglônêllo tuksiarluta, tunitsivioniarpogut tâpsomangat; piᴋojangit malikaptigik, sânganilo ᴋuviagijanganik piniarluta.

²³ Tâpsomalo piᴋojanga tamadja, Erningata Jêsusib Kristusib attinganut okperᴋovluta nagliktigêrᴋovlutalo; taimak perᴋungmatigut.

²⁴ Piᴋojanganiglo nâliktoᴋ tâpsomanêtsainarpoᴋ, tâmnalo tâpsomanêpoᴋ. Anernerlo tunijanga uvaptingnut nalunaikutarivavut, iluptingnêtsainarniarmat.