I Johannesib 2 - Labrador Inuttitut Heritage Bible

Kapitalimi I mi oᴋautaujut oᴋautauganniput. Ajoᴋituiniluktunik Antikristusiojunik.

¹ Kitorngârsukka, tamakkoninga aglagvigivapsi, idluituliᴋonasi. Idluitulijoᴋarpallo, tuksiarutjiᴋarpogut Atâtami, Jêsuse Kristusemik idluartôjomik.

² Tâmnalo ullapirsautauvoᴋ ajornivut pivlugit; ajornivulli kissêtaungitut, silaᴋsoarmiullitauᴋ ilûnatik ajorningit pivlugit.

³ Tamannalo ᴋaujijutigivavut, illitarigaptigo, piᴋojangit nâlakuptigik.

⁴ Oᴋartoᴋarpat: illitarivara, nâlingnagillo piᴋojangit, tâmna saglotojoᴋsôvoᴋ, tâpsomanilo miksiᴋârniᴋangilaᴋ.

⁵ Oᴋausinganigli nâliktoᴋ, tâpsomani nalâgut Gûdib naglingninga nâmaksivoᴋ. Tamattomangat ᴋaujimavogut tâpsomanênapta.

⁶ Tâpsomanêtsainardluni oᴋartoᴋ, arvirtartuksaugivoᴋ, sorlo tâmna (Jêsuse) arvitalaungmat.

⁷ ᴋatangutikka, nutâmik pirᴋojamik aglagvigingilapsi, nutaungitomigli pikᴋojamik, pigiarninganit pigijapsingnik; pigiarninganit tusattasi, tamadja pikᴋojaᴋ nutaungitoᴋ.

⁸ Ama aglagvigivapsi pikᴋojaᴋtâmik, tâpsomanilo ilipsingnilo miksiᴋârtôjomik; tâᴋsoaᴋ anigormat, ᴋaumajorlo miksiᴋârtoᴋ mâna ᴋaumarsaivoᴋ.

⁹ Kaumajomêdluni oᴋartoᴋ, ᴋatangutiminiglo ômisuktoᴋ, tâmna tâᴋtomêpoᴋ sulli.

¹⁰ Katangutiminik nagliktoᴋ, ᴋaumajomêtsainarpoᴋ, sinaunganiᴋarminani.

¹¹ Katangutiminiglo ômisuktoᴋ, tâmna tâᴋtomêpoᴋ, arvitarlunilo tâᴋtomi, namullo ainimik nalovluni; tâᴋtub ijigik takpêtilaungmagik.

¹² Aglavigivapsi ᴋitorngârsukka, ajornisi issumagijaujungnairmatta, tâpsoma attinga pitjutigilugo.

¹³ Atâtaujosi aglagvigivapsi, issuanit-itoᴋ illitarigapsiuk. Inôsuktôjosi aglagvigivapsi, ajortoᴋsoaᴋ sâlagilaurapsiuk. Sorusiojose aglagvigivapsi, Atâta illitarigapsiuk.

¹⁴ Atâtaujosi aglavigilauᴋpapsi, issuanit-itoᴋ illitarigapsiuk. Inôsuktôjosi aglagvigilauᴋpapsi, pitsartuniᴋarapsi, Gûdiblo oᴋausinga ilipsingnêtsainarmat, ajortoᴋsoarlo sâlagilaurapsiuk.

¹⁵ Silaᴋsoarmik nagligosungniarasi, silaᴋsûb pinginiglônêt. Silaᴋsoarmik nagligosuktoᴋarpat, Atâtab naglingninga tâpsomanêngilaᴋ.

¹⁶ Silaᴋsoarmêtut ilûnatik (uviniub ikliguningit, ijib allianingit pimariuternerillo) Atâtamit pingimatta, silaᴋsoarmilli pivut.

¹⁷ Silaᴋsoarlo nungujomârpoᴋ allianarningillo: Gûdible pijomajanganik piniartoᴋ, issoᴋangitomut-itsomârpoᴋ.

¹⁸ Kitorngârsuit, uvlut naggatât naliutilipoᴋ, sorlolo tussaumagapsi Antikristusemik tikitsomârtomik, mânalo Antikristusit unuliput; tamattomangat ᴋaujimavogut, uvlut naggatât naliutilimmat.

¹⁹ Uvaptingnit taipkoa aularput, illaginginaptigik; illagilaurunitigut uvaptingnêtsainarajalauᴋput; (aularpulli) saᴋᴋijarᴋovlugo ilûnatik illagilaungimatigut.

²⁰ Ilipsilo saimaniᴋarposi tâpsomangat, ivjornaitomit, tamaitalo illisimavasi.

²¹ Aglagvigilaungilapsi ᴋaujimangitutitut miksiᴋârnimik, ᴋaujimagapsiugli, ᴋaujimavlusilo miksiᴋârniᴋ saglunirmit pingimat.

²² Saglujuᴋ kinâ, Jêsusib Kristuseoninganik missiarutjijoᴋ kissimiungituᴋ? Tagva Antikristuse, Atâtamiglo Ernermiglo missiarutjijoᴋ.

²³ Ernermik missiarutijijoᴋ Atâtamiktauᴋ piᴋanginivoᴋ; Ernermigli kigligiutjijoᴋ Atâtamiktauᴋ piᴋarivoᴋ.

²⁴ Tussalauᴋtasili pigiarnirmit ilipsingnêtsainarlit. Pigiarnimit tussalauᴋtasi ilipsingnêtsainarpatta, tagva ilipsi Ernerme Atâtamelo itsainarniarivosi.

²⁵ Tamadja angininga, uvaptingnut inôtsimik nâksaungitomik (tunitsivigijomavluta) angimat.

²⁶ Tamakkoninga aglagvigilauᴋpapsi, ilipsingnik tamartitsijut pivlugit.

²⁷ Saimarsautilo, tâpsomangat pijasi, ilupsingnêtsainarniarpoᴋ, kimullo ajoᴋitortaujariaᴋangilasi; sorloli saimarsautib tamainik ajoᴋitormasi, miksiᴋârtôlarmilo saglunanilo; taimak sorlo ajoᴋitulaungmasi, tâpsomanêtsainaritsi

²⁸ Mâna tagva, ᴋitorngârsuit, tâpsomanêtsainaritsi, saᴋᴋijâlipat, ᴋuviasûtiᴋarᴋovluta kangusugatalo tâpsoma sângani tikiviani.

²⁹ Kaujimagupsi idluartoᴋsôngmat, nalojungnairivosi, idluartomik piniartoᴋ tâpsomangat erniangongmat.