I Johannesib 1 - Labrador Inuttitut Heritage Bible

Illagêngneᴋarnimik Gudemut Kristusemullo arvertarnikut ᴋaumajomi.

¹ Issuanit-ilauktok, ijiptingnut takolauᴋtavut, ᴋimigolauᴋtavut, aggaptingmullo aktulauᴋtavut, tussalauᴋtavut, oᴋausiᴋ inôgutaujoᴋ (oᴋautigivavut ilipsingnut).

² Inôsilo saᴋᴋijârsimavoᴋ, uvagullo takolauᴋpogut kigligiutsilaptalo oᴋâlavigivapsi inôtsimik naggatiᴋarniangitomik, Atâtamêlauᴋtomik, uvaptingnullo saᴋᴋitomik.

³ Tâmna takolauᴋtavut tussalauᴋtavullo oᴋautigivavut ilipsingnut, ilipsitauᴋ illagêgutiᴋarᴋovlusi uvaptingnut; uvagullo Atâtamut Erninganullo Jêsuse Kristusemut illagêngniᴋarpogut.

⁴ Tamattomingalo aglagvigivapsi, ᴋuviasungnisi nâmaksirᴋovlugo.

⁵ Tamadjalo oᴋausiᴋ tâpsomangat tussilauᴋtavut, ilipsingnullo kigligiutigijavut: Gûde ᴋaumaniongmat, tâpsomanilo tâᴋtoᴋangilaᴋ.

⁶ Oᴋarupta, tâpsomunga illagêgutiᴋartogut, tâᴋsiorlutalo, saglovogut, miksiᴋârnirmiglo pingilagut.

⁷ ᴋaumajomili arvitarupta, sorlo tâmna ᴋaumajomêngimat, illagêngniᴋarpogut uvaptingnut; Jêsusiblo Kristusib, tâpsoma erningata, aungata ubvarpâtigut ajortunit tamainit.

⁸ Oᴋarupta: ajortoᴋanginapta, uvaptingnik nangminiᴋ uivêrivogut, miksiᴋârnirlu iluptingnêngilaᴋ.

⁹ Ajornivulli kigligiksautigiguptigik, tâmna nitornartôvluni idluartôvoᴋ, issumagijungnaivigigamitigut ajorniptingnit, sujungaitilutalo idluitunit tamainit.

¹⁰ Oᴋarupta: idluittulilaungitogut, saglutonirarpavut, oᴋausingalu iluptingnêngilaᴋ.