I Atannit 9 - Labrador Inuttitut Heritage Bible

Nâlekab sakkipsarninga Salomomut. Salomonib tunnijininga iglugasaksoarnik 20 ginik Hiramemut. Umiaktorningalo.

¹ Salomoblo Nâlekab iglunga, atanniublo iglunga, tamaitalo tussugijane, kajungerijanelo sanajomavlugit pijarêrtilauramigit;

² Nâlekab sakᴋervigiva aipanganik, sorlo Sakᴋervigilaungmago Gibeoneme.

³ Nâlekablo oᴋautiva: Tuksiarnit, ᴋenunîllo, ᴋenunerilauktat uvamnut, tusarlaukpara, iglolo tamânna igloliorlauktat, atimnik pititsiᴋovlunga tagvunga soraijuitomik, ivsornaiviotilaukpara; ijikkalo omatigalo tagvanêtuksauvut nelliutune tamaine.

⁴ Igvillo agvertarniaruvit sâmne, sorlo atâtait Davide agvertarlaungmat, omamut nallâgortomut, annerpanaijuitomullo, pinniarᴋovlutit taimailuatsiamik, sorlo pêrᴋolaurapkit; perᴋojakkalo idluarijakkalo mallingniarungne;

⁵ Tagva atanionivit Israelitinut iksivautaksoanga soᴋosijuititsomavara soraijuitomik; sorlo atâtait Davide oᴋarvigilaurapᴋo, oᴋarlunga: Ajoksartuksaungilatit angumik Israelib iksivautaksoanganêtomik.

⁶ Allarniarupsingale illipse ernipselo, mallingnagillo perᴋojakka, idluarijakkalo, mannilauktakka illipsingnut, ainiarluselo Gûdib asingit kivgartorlugit, tuksiarvigilugillo pigupse;

⁷ Tagva Israelitit pêjarniarpakka nunamit tunnilauktamnit tapᴋonunga; iglolo ivsornaiviotilauktara atimnut, pêjaromavara kênarma sânganit; Israelitillo oᴋausiovaktungoromârput, oᴋangoarutingorlutiglo inuᴋatigêksoarnut ilûnnainut.

⁸ Iglolo tamânna poktojoksogalloarlune, ilûnnainut sanirᴋotsijomârtunut kâkkilâdlarutiksaujomârpok, supporomârput oᴋarlutiglo: Sôg Nâlekab nuna tamânna, iglolo tamânna taimailiorvigilaukpagit?

⁹ Oᴋartoᴋaromârporlo: Tamânna pivlugo, Nâlegak Gûditik ᴋemasimangmatsuk, atâtagijanginik aularutitsilauktok Egiptenemiut nunanganit, Gûdiblo asingit illalliormagit, tuksiarvigingmagillo, kivgartorlaitalo; tamânna pivlugo Nâlekab tikkitauᴋolaukpait ᴋanoêtomut mattomunga tamât.

¹⁰ Jârit 20 git nângmatta, Salomob attorlauktangit, iglûk, Nâlekab iglunga, atanniublo iglunga, igloliorlugik;

¹¹ (Hiramib Tirusemiut ataningata Salomo tunnitsivigilaukpa tapkungnunga, napârtunik Cederinik, Cipressiniglo, Goldemiglo, taimaluatsiamik sorlo tussulaungmat) tagva Salomob Hirame iglugasaksoarnik 20 ginik nuname Galiliamêtunik tunnitsivigiva.

¹² Hiramelo aularpok Tirusemit, iglugasaksuit taipkoa takkojartorlugit, Salomob tunnilauktangit tapsomunga; nâmagilaungilaillo.

¹³ Oᴋarporlo: Iglugasaksuit tunnilauktatit uvamnut ᴋanoêlingavat, ᴋatangutîk? Atserarpaillo nunamik Kabulemik, uvlok tamânna tikkidlugo.

¹⁴ Hiramiblo atannek tillikliutjivigiva Goldemik Talentinik 120 ginik.

¹⁵ Tamânnalo pitjutauvok Salomob sanajuksat annerilaungmagit, Nâlekab iglunga igloᴋotinelo, Millolo Jerusalemiblo avalungit, Hazorelo, Meggidolo Gaserelo sanajomalaungmagit.

¹⁶ Farao Egiptenemiut atanningat takpaungarlaukpok, sâlagilaukpaillo Gaser, ikkilugillo ikkomamut, Kanaanemiullo iglugasaksoarnêlauktut toᴋopait; iglugasaksuillo pilliutigilaukpait paniminut, Salomob nullianganut.

¹⁷ Salomoblo Gaser sanavait, Bethhoronelo atsiktok,

¹⁸ Baalatelo, Tadmorelo, sunaᴋajuitome nuname.

¹⁹ Iglugasaksuillo ᴋematulliviojut Salomob pigijangit, iglugasaksuillo ᴋammutingnut illingajut, iglugasaksuillo sorsuktuksanut ablangajunut horsit ᴋângine illingajut, tamaitalo tussugijane sanajomavlugit, Jerusaleme, Libanoneme, atanniovimelo nunangane illûnane.

²⁰ Inugasaksuit amiakovinit Amoriterinit. Hethiterinillo Feresiterinillo, Heviterinillo Jebusiterinillo, Israelib ᴋitornganginit pilaungitut;

²¹ Taipkoa amiakolauktut nuname ᴋitorngangit, Israelib ᴋitorngangita nungutsungnarlaungitangit, tapᴋoa Salomob sanajuksautipait uvlok tamânna tikkidlugo.

²² Israelible ᴋitornganginit kivgangortitsilaungilak, sorsuktuksaulaungmatta, kivgaulutiglo tapsomunga, angajoᴋâᴋotigilaitalo, sorsuktuksaulutiglo ᴋamutingne, angajoᴋaulutiglo ᴋamuteᴋotinginut, ablangajunullo horsit ᴋângine.

²³ Aulatsijullo Salomob sullijaksanginik, 550 giolaukput, angajoᴋaulauktut inugasaksoarnut sanalauktunut sullijaksame tamattomane.

²⁴ Faraoblo pania nûlune takpaungarpok Davidib iglugasaksoanganit iglominut, Salomob igloliorlauktanganut tamna pivlugo. Taipsomane Millo sanalauriva.

²⁵ Salomolo pingasoêrtorlune Jâreme atautseme tunnijivok tunnergutinik ôtaksanik, ᴋujalijutiksaniglo, Altareme sanalauktamine Nâlekamut, isserluanititsilunelo ᴋângane, Nâlekab sângane. Iglolo pijarêrtipa.

²⁶ Salomolo umîjorpoktauk umiaksoarmik, Ezon Gebereme, Elothib immarbiub iviggub suvlolingnik sikjanganêtub ᴋanitanganêtome. Edomiterit nunangane.

²⁷ Hiramiblo kivgane, umiaktornermik sungiusimajut, immarbiksoarmiglo illitarksijut tillivait umiaksoakut omuna Salomob kivgangit illagilugit.

²⁸ Tapᴋoalo tikkiput Ofiremut, aiklerlutiglo tagvangat Goldemik Talentinik 420 ginik, atsilutiglo tamakkoninga atanermut Salomomut.