I Atannit 7 - Labrador Inuttitut Heritage Bible

Atanniub igloᴋotingita igloliortauningat; perᴋutillo Tempelemut illingajuksat sanajauningit.

¹ Igloᴋotiminigle Salomo jârit 13 it nâlugit igloliorlaukpok; pijarêrmarikpâlo.

² Sanalaurivatauk iglo nappârtut Libanonib iglunganik atelik, tallitut 100 ditut takᴋitigijok, tallitut 50 gitut sanimututigijok, tallitullo 30 gitut pôktotigijok, nappajune tukkilerêngne sitamaine, ikâlingne ᴋângane.

³ Kâᴋartitaulaukporlo, innît nappajunêtut ᴋângine kêjungmik Cedereôjomik, nappajut tapᴋoa 45 giôlaukput, 15 it tukkilerêngne atautsine.

⁴ Igalâkalaukporlo tukkilerêngne pingasune akkilerêngnik, pingasut, akkileᴋarlutik pingasunik.

⁵ Upkuallo nappajullo ilûnnatik iktokerilaukput, taimâktauk igalât ᴋaumajorlo akkileᴋarlune ᴋaumajomik.

⁶ Torksumiglo sanagivok nappajunit, tallîtut 50 gitut takᴋitigijomik, tallitullo 30 gitut sanimututigijomik; amalo torksumik oma sângane, nappajunit ᴋoakjulingnillo silliktunit.

⁷ Sanagivoktauk torksumik erᴋartuiviub iksivautanganut, Erᴋartuivioᴋovlugo, netsisertorpâglo Cederinik.

⁸ Iglungalo iglogijanga avaluliorsimajub asianetok torksub kinguane, taimailuatsiamik illuseᴋarlune sanajaulaurivok; sanalaurivoktauk iglomik torksutut îtomik Faraob paninganut, Salomob nullianilauktanganut.

⁹ Tapᴋoalo tamaita ujaraulaukput pivianartut, iktokeriksaut malliklugo ullimârtaulauktut, kiblutinullo kiblormiktortaulauktut illuane sillatânelo, tungavinginit ᴋângit tikkidlugit, taimaglotauk sillata avalulingme angijome;

¹⁰ Tungavigle ujaraulaurivoktauk pivianartut angijullo, tallitut tallimaujortut takᴋitigijut sitamaujortullo silliktigijut.

¹¹ Tapᴋoalo ᴋângine ujarakalaukpok pivianartunik, iktokeriksaut malliklugo ullimartaumajunik, Cederiniglo.

¹² Avaluliorsimajorle angijok, avatâne tukkilerêktoᴋalaukpok pingasuinik ujaralingnik, tukkilerêngniglo atautsinik satujanik Cedereojunik; taimailingalaurivoktauk avaluliorsimajok kamanênersak Nâlekab iglungane, torksuglo Nâlekab iglungane.

¹³ Atannerlo Salome tilliklerpok aijauᴋolâlo Hirame Tirusemiok,

¹⁴ Uigarniub erninga Naftalib kinguvanginit, atâtangalo angutaulaukpok Tirusemiok, kanutjerijolauktok; tamnalo illumersimamarikpok illisimanermik sillatunermiglo, sappinginermiglo sanalune sunatuinarnik kannujarmit; tamnalo tikkipok atannermut Salomomut, sanalunelo tapsoma pinniarkojanginik tamainik.

¹⁵ Nappajuglo sanavâk kannujarmit, attunît tallitut 18 tut poktotigijuk, nimerlo tallitut 12 tut takᴋitigijok nâmatuinaulaukpok avatâgut, nappajuk attunît sillingnigingnut.

¹⁶ Niaᴋojartuglo kovivak kannujarmit nappajûk kangangnêtuksâk; niaᴋojartuglo attunnit tallitut tallimatut poktotigijolaukpuk.

¹⁷ Niaᴋojartûglo ᴋângine nulluangoaᴋalaukpok, ᴋellaumgujaᴋalaukporlo pergaimajunik 7 inik aipane, 7 niglo aipangane.

¹⁸ Paungâlungoaniglo Granatinik atilingnik sennilarektunik maggoinik pititsivok niaᴋojartungnut avatânut, niaᴋojartuk ulliktauᴋovlugik tapᴋonunga.

¹⁹ Niaᴋojartuglo nappajuk ᴋânginetuk nuvugolaktut Liliemik ateᴋartut îlaukpuk, taipkotitunak torksungmetutitut, tallitut sitamatut silliktigijovlutik.

²⁰ Paungâlungoallo Granatit sennilerêktut avatâne 200 diolaukput kotsiktome sennilerêktune, atsiktomelo niaᴋojartub puvioninganingata avatanelauktungne, niaᴋojartungne tamangne, nappajuk ᴋânginelauktungne.

²¹ Nappajûglo napârtipak Tempelib torksungata sângane. Napârtitanelo tallerpingmut Jachinemik atserarpa; napârtitanelo saumingmut, Boasemik atserarpa.

²² Taimaglo nappajuk ᴋângangne Lilietut îlaukpok. Taimaglo nappajuk pijarêrtaumalaukpuk.

²³ Immarbingoarlo kovilugo sanava, tallitut tallimaujortutitut silliktigijomik sinânit aipanganit aipanga tikkilugo, avatâne ilûnnane, tallitullo tallimatut pôktutigijomik nimmerlo tallitut 30 gitut takᴋitigijomik namatuinarlaukpok sillingninganut avatâne.

²⁴ Immarbingoablo, tallitut tallimaujortutitut silliktigijolauktub, sinâne kuglungajungoakalaukpok imârbingoab kiglingane ilûnnane; kuglungajungoallo tapᴋoa sennilerêklutik maggoilivlutik kovijaumalaukput.

²⁵ Nappavorlo tuktuvangoane 12 ine, tapᴋonangat pingasut sângmivut avunga, pingasut paunga, pingasut aunga, pingasullo taununga, immarbingoarlo ᴋânginelune, okpatingit ilûnnatik illumut torarmatta.

²⁶ Ivjuningalo aggaktitut igluînartut sanimutoningititut îlaukpok, sinâlo ermgusiarsub sinâtut îlaukpok, Lilietut siggimajotut îdlune; oktutillo Bathenik atiggit 2,000 dit illuleᴋarungnarlaukpok.

²⁷ Sanalaurivoktauk ikkovraksanik tallimaujortunik kannujarmit, attunit tallitut sitamatut takᴋitigijunik, sanimututigijuniglo, tallitullo pingasutut poktutigijunik.

²⁸ Ikkovraksallo imâk sanajaulaukput, anneᴋarmatta oᴋaloraujat akkorngane.

²⁹ Saniragingne oᴋaloraujat akkorngane Loewingoaᴋalaukpok tuktuvangoaniglo, Kerubingoaniglo, oᴋaloraujanelo taimaitoᴋalaurivok kôtsiktomê, Loewingoallo tuktuvangoallo atâne suvlolikalaukpok nivingajotun îtunik.

³⁰ Ikkovraksallo attunit aksaloakalaukput sitamanik kannujarnik; terreᴋunginelo sitamane tuengoaᴋalaukpok kovijaumajunik, attunit akkilerêkput, egangalutiglo ukkusingmut.

³¹ Kongesingoalle ikkovraksat ᴋerᴋangine tallertut atautsetut pôktotigijolaukput, angmaloᴋitauvlutik, tallertut igluinartut ᴋetterᴋangatullo silliktigijolaukput, kongesingoanelo ᴋatsiktoᴋalaukpok iktokeriktunik, angmaloᴋitaungitunik.

³² Aksalloajullo sitamat atâne saniranginelaukput, Ikᴋangillo ikᴋovrangnelaukput, aksalloajut attunît tallitut igluinartut ᴋetterᴋangatullo pôktotigijolaukput.

³³ Aksalloajullo tapᴋoa aksalloaliub aksalloajungititut îlaukput. Iᴋângillo aksalloavingillo, issagutângillo avalungillo ilûnnaita kovijaumalaukput.

³⁴ Tuêngoallo sitamat ikkovraksat terreᴋungine sitamanelaukput; ikkovranêlaukput tuengoangit.

³⁵ Ikovrello kongesingine tallib ᴋetterᴋangatut poktotigijome oᴋaloraujakalaukpok, annekalunelo avatâne illûnane.

³⁶ Tapᴋoalo anninginut, oᴋaloraujanullo ittersaliorkojivok Kerubingoanik, Loewingoaniglo, napârtungoaniglo, Palminik atilingnik; sorlo attunît inniksaᴋalaungmatta avatâne ilûnnane.

³⁷ Taimâk illuseᴋarlutik ikkovraksat tallimaujortut sanalaukpait, kovilugit, anginingit illusingillo adsigêmariklutik.

³⁸ Ukkusillo tallimaujortut kannujarmit sanavait, attunit Bathinik 40 ginik illuleᴋarungnarlauktut; tallitullo sitamatut silliktigijolaukput; ikkovrello attunît ᴋangine ukkusiᴋalaukpok atautsemik.

³⁹ Ikkovrello tallimat illivait iglub terreᴋunganut tallerpingmut, asingillo tallimat, terreᴋungmut saumingmut; immarbingoarle illiva iglub sivurânut tallerpianut sekᴋernganut.

⁴⁰ Hiramiblo sanavaittauk ukkusit, poagillo itterngujallo; pijarêrtipaillo sanajaksat tamaita atanniub Salomonib sanajauᴋolauktangit, Nâlekab iglunganut.

⁴¹ Tagva nappajuk, niaᴋojartuglo nappajuk ᴋângangne, nulluangoaglo maggoit niaᴋojartuk nappajungnêtuk ulliksanginut;

⁴² Paungâlungoallo 400 dit Granatit nulluangoanut illingalauktut, sennilerêt maggoit nulluangoane atautsene, aksaujak niaᴋojartuk ᴋângangnêtuk ulliksanginut;

⁴³ Taimâktauk ikkovret tallimaujortut, ukkusillo tallimaujortut, ikkovret ᴋânginelauktut;

⁴⁴ Imarbingoarlo, tuktuvângoallo 12 ît atâne;

⁴⁵ Ukkusillo poagillo itteringojallo, illulerᴋutillo tamakkoa ilûnnaita Hiramib sanajangit Salomomut, Nâlekab iglunganut illingajut, kannujatuinarmit sanajaulaukput.

⁴⁶ Jordanib erkâne Sochotib Zarthaniblo akkorngangne atanniub kovijauᴋovait macharmut.

⁴⁷ Salomoblo illulerkutit tamaita kiktitautingnut oktortauᴋolaungilait, kannujab unnudlarninga pitjutigellugo.

⁴⁸ Salomoblo perᴋutit ilûnnaita sanalaukpait Nâlekab iglunganut illingajut: tagva Altare Goldeôjok, sâlo Goldeôjok ᴋakᴋojaliksak takkojaksanik;

⁴⁹ Nennergoavît tallimat tallerpingmut, nennergoavîllo tallimat saumingmut, inniub ᴋamanenerpaub sivurâne, Goldemit illaᴋangitomit, nuvugolangoallo, ᴋollillo, takkutillo Goldemit;

⁵⁰ Itteringojallo poagitillo, sâvillo allupsautillo, ᴋallutaujallo isserluanititsijutit, komigautillo Goldemit pivianartomit, upkoamelo ivsornainerpângojome, Tempeliblo upkoangane kevertautit Goldeolaurivut.

⁵¹ Taimâk sanajaksat Salomob sanajangit Nâlekab iglungane pijarêrtitaumavut. Salomoblo ittertipait kamunga, tamaita atâtame Davidib ivsornaitilauktangit, Silberelo Goldelo, illulerkutillo; illilugillo Nâlekab Tempelingata Pivianartoᴋotinginut.