I Atannit 5 - Labrador Inuttitut Heritage Bible

Salomob ilannârêlerninga Hiramemut, oppalungaijainingalo igloliornermut Tempelemik.

¹ Hiramelo Tirusemiut atanningat tilliklerpok kivgaminik Salomomut; tusarlaurame mingoarlaungmatsuk, atanningortilugo atâtangata inningane. Hiramib Davide ilannâritsainarlaungmago inosermine tamât.

² Salomolo tilliklerpok Hiramemut oᴋautsauᴋolâlo:

³ ᴋaujimavotit atâtaga igloliorungnalaungimat iglomik Nâlekab Gûdime atinganut illingajomik, unatadlarnek illumajaujutigijanga pivlugo; Nâlekamut illijauᴋârtinagit allungita attânut.

⁴ MânNâle Nâlekab Gûdima merngoêrsernermik tunnitsivigimavânga avatimne, akkerartortoᴋarungnangimat, agviarutiksaᴋarungnaimallo idluitomik.

⁵ Ahâk, tagva isumavunga iglolioromavlunga iglomik Nâlekab Gûdima atinganut illingajomik, sorlo Nâlegak Oᴋauseᴋalaungmat atâtamnut Davidemut, oᴋalaungmallo: Ernivît, inangêrlutit ingititsomajama iksivautarnut, tapsoma atera iglolioraksariva.

⁶ Taimaimat, perᴋojilerit mânna, Cederinik Libanoneme nakᴋartsijoᴋarᴋovlugo, uvamnut illingajuksanik; kivgaᴋotitit illauᴋovlugit kivgaᴋotimnut. Kivgakotivillo ikkajusiksanginik tunnitsivigijomavagit, tamainik sorlo oᴋarniaravit. ᴋaujimagavit uvaptingnêtoᴋangimat, ᴋejungnik nakᴋartsijungnartunik Zidonemiutitut.

⁷ Hiramele Salomob oᴋausinginik tamakkoninga tusarame, ᴋuviasudlalerpok, oᴋarlunelo: Uvlome Nâlegak nertortaule, tunnijilauktok Davidemut ernermik sillatutsiartomik, inugasaksoarnut taipkonunga atanniôjomik.

⁸ Hiramelo tilliklerpok Salomomut, oᴋautsauᴋovalo: Tusarlaukpunga oᴋautsauᴋojarnik uvamnut, pinniaromavunga pijomajat tamât malliklugo, ᴋejuit Cederit Cipressillo pitjutigillugit.

⁹ Kivgakotima atersautijaksarivait Libanonemit immarbiub kiglinganut; ᴋallingortitauᴋojomavakkalo, âtauᴋojomalugillo immarbikut nunamut taijauᴋoniartarnut uvamnut; ᴋellarudjartauᴋojomavakkalo tagvane, iguptertauᴋolugillo; igvillo aijauᴋoniarpatit. Igville pijomajara pinniaraksarigivat, nerᴋiksaniglo tunnijijuksauvotit kivgakotimnut.

¹⁰ Taimâk Hiramib Salomo tunnitsivigiva ᴋejungnik, Cederinik Cipressiniglo, pijomajanga tamât malliklugo.

¹¹ Salomoble Hirame tunnitsivigiva Korinik 20,000 dinik Weizenik, nerᴋiksanik tapsoma kivganginut. Koriniglo 20 ginik orksumik togarsimajomik. Taimaitunik Salomo tunnijivok Hiramemut jârine tamaine.

¹² Nâlekablo Salomo sillatunermik tunnitsivigiva, sorlo oᴋarvigilaungmago. Hiramelo Salomolo ullapirsauteᴋalaukpuk ingmingnut, angerᴋatigêklutiglo.

¹³ Salomolo annerosulerpok sanajuksanik Israelitit ilûnnamasianginit, sanajuksallo angutaulaukput 30,000 dit.

¹⁴ Tillivaillo Libanonemut, takᴋit nelliane 10,000 dit, taimâk takᴋek atausek nâlugo Libanonemelaungmatta, takkiglo nâlugik nunamingnêdlutik. Adoniramelo angajoᴋaulaukpok sanajuksanut tapᴋonunga.

¹⁵ Salomolo anguteᴋuteᴋalaukpok 70,000 dinik akjarsijunik, 80,000 diniglo ullimarniktunik ᴋakᴋame;

¹⁶ Salomob angajoᴋaᴋotingit pinagit, aulatsijungortitaumajut sullijaksamik tamattominga, imâgle, 3,300 dit aulatsilauktut inugasaksoarnik sanajunik.

¹⁷ Atannerlo perᴋojivok ujaraksoarnik angijunik pivianartuniglo pêrsiᴋovlugit ullimartauniartunik, iglub tungavianut illingajuksanik.

¹⁸ Salomoblo igloliorteᴋotingit, Hiramiblo Igloliorteᴋotingit, Giblimiullo ᴋejuit ullimarlugit avikpait, âᴋkiksoilutiglo ᴋejungnik ujarᴋaniglo igloliornermut iglomik.