I Atannit 4 - Labrador Inuttitut Heritage Bible

Salomob pimaklertoᴋotingit, ânanauningalo, ilisimaningalo.

¹ Taimâk Salomo atanniôlaukpok Israelitit ilûnnnamasianginut.

² Angajoᴋaᴋotigilauktangillo tapᴋoangôvut: Asarja. Zadoᴋib ajuᴋertuijub erninga.

³ Elihoref, Ahijalo Sisab erningik aglakpaktôlaukpuk. Josafat Ahiludib erninga angajoᴋaulaukpok aglakpaktunut.

⁴ Benaja Jojadab erninga angajoᴋaulaukpok sorsuktuksaksoaᴋatigênut. Zadokelo, Abjatharelo ajuᴋertuijolaukpuk.

⁵ Asarja, Nathanib erninga angajoᴋaulaukpok pimaklertunut. Sabude Nathanib ajuᴋertuijub erninga, ilannângolaukpok atannermut.

⁶ Ahisar aulatsijolaukpok atanniub iglunganik, Adonirame Abdab erninga aulatsijolaukpok perorseviᴋotinginik.

⁷ Salomolo pimaklerteᴋuteᴋalaukpok 12 inik Israelitit ilûnnnamasianginut, patangaititsijunik atannermik iglomiokotinginiglo. Tapᴋoa attunît jâreme atautseme, takᴋek atausek nâlugo patangaititsijariakalaukput.

⁸ Imâglo ateᴋalaukput: Hurib erninga, Efraimib ᴋakᴋangine;

⁹ Dekerib erninga Makazeme, Saalbimemelo, Bethsemesemelo, Eglonemelo, Bethananemelo;

¹⁰ Hesedib erninga Arubotheme, Suchomiglo peᴋalaurivok, Heferiblo nunanganik ilûnnnânik;

¹¹ Abinadib erninga Nafat-Doreme ilûnnâne, Tofathelo Salomob pania nulliariva;

¹² Baena Ahiludib erninga Thanacheme, Megidomelo, Bethseanemelo ilûnnâne, Zarthanab sanianetome, Jesreelib atâne, naternak Meholamik atelik tikkidlugo; Jakmeamib ungatanut tikkilugo.

¹³ Gerib erninga Ramotheme Gileademêtome, pigilaukpaillo Jairib Mânnasib erningata iglugasakotingit Gileademêtut, Argublo Basanemêtub erkâ, iglugasaksuit angijut 60 git, ᴋarmaksoarnik avaluggit, kannujarniglo saniroagit;

¹⁴ Ahinadabe, Iddob erninga, Mahanaimeme;

¹⁵ Ahimaze Naftalime, tamnatauk nullianikpok Salomob paninganik Basmatemik;

¹⁶ Baena Husib erninga, Assereme, Alothemelo;

¹⁷ Josafath Paruab erninga, Isaschareme;

¹⁸ Simei Elab erninga, Benjamineme;

¹⁹ Geber Urib erninga, nuname Gileademe, Sihonib Amoriterit ataningata, Ogiblo Basanemiut ataningata nunagilauktagingne; pimaklerte atausek nuname tamattomanelaukpok.

²⁰ Judakulle Israelitillo taimâk unuktigijôlaukput siorᴋatitut imarbiksub siksanganêtutitut, nerrivullo, immerlutiglo, serridlalaularmiglo.

²¹ Taimaglo Salomo Nâlegaulaukpok ataniovingnut ilûnnainut, kôksoarmit Filisterit nunangat, Egiptenemiut kiglilervingat tikkidlugik; pilliutinik ᴋaitsivut tapsomunga, Nâlekpâlo inôsingane tamât.

²² Salomolo uvlut tamaita pijariaᴋalaukpok nerᴋiksaminut Korit 30 git tatalugit sanaukamik ᴋakᴋortamik; Koriniglo 60 ginik sanaukamik asianik;

²³ Tuktuvângnik tallimaujortunik koinititaumajunik; tuktuvângniglo 20 ginik, natername iviksuᴋatalingme mianerijaulauktunik, sauganiglo 100 dinik; tuktut, tuktungajullo tuktuojartullo, nergjutillo koinititaumajut taijauᴋasiutinagit.

²⁴ Ataniotigame nunab ilûnnnaksoanganut, kôksub miksânetomut, Tifsamit Gasa tikkilugo, ataniovingnut ilûnnnainut, kôksub miksânetunut, ullapirsauteᴋalaukporlo ilûnnnainit avatânêtunit.

²⁵ Taimâk Judakut Israelitillo ussornarnarlutik nunakalaungmatta, nelliat napârtokotime Weineliksab atâne, Feigeliksablo atâne, Danemit Berseba tikkidlugo, Salomob inosingane tamât.

²⁶ Salomolo horseᴋuteᴋalaukpok ᴋammutingnut illingajunik 40,000 dinik, sorsuktuksaᴋuteᴋalarmelo horsit ᴋângine ablangajunik 12,000 dinik.

²⁷ Pimaklertillo taipkoa Salomo, ilûnnaitalo tapsoma nerrimarvinganut illingajut patangaitipait, attunît takᴋermingne, ajoksarkojilungilello sunamiglonêt.

²⁸ Gerstelotauk ivillo horsinut, pangalidlartunullo illingajut, ᴋaipait nunamut najortanganut, attunît illuseᴋarᴋojaunitik malliklugit.

²⁹ Gûdiblo Salomo tunnitsivigiva illisimanersoarmik, illitarsinersoarmiglo, sillatônermiglo, siorᴋatitut imarbiub siksanganetutitut.

³⁰ Salomob illisimaninga anginersaulaungmat, ᴋitorngat taunanêtut ilûnnatik, Egiptenemiullo illisimaninginit ilûnnainit;

³¹ Illisimanersaulaurivoktauk imgerusiortunit, Ethanemit Esrahitemiomit, Hemanemillo, Kalkolemillo, Dardamillo, Maholib ernikingnit; tusaumajautsiarlaukporlo nellojunut avatanêlauktunut ilûnnainut.

³² Ajuᴋertutsit adsiojut 3,000 dit oᴋauserilaukpait, imgerutingillo 1,005 eôlaukput.

³³ Napârtullo oᴋautigivait Cederemit Libanonemêtomit, Isope tikkilugo perorsajok iglub sanirangane. Nergjutillotauk oᴋautigivait, tingmitsello, pamgortullo, mingeritsello.

³⁴ Inuᴋatigêksoarnillo tamainit tikkitoᴋalaukpok Salomob ilisimaninganik tusaromajunik, atannernit ilûnnainit nunamêtunit, ilisimaninganik tusarlauktunik.