I Atannit 3 - Labrador Inuttitut Heritage Bible

Salomob nullianingninganik, tuksiarninganiglo ilisimanermik; idluarsaininganiglo sillatôjomik.

¹ Salomoblo Farao Egiptenemiut atanningat ilannârilerpa, nullianilunelo Faraob paninganik, âpâlo Davidib iglugasaksoanginut, igloliorkârtinago iglominik Nâlekablo iglunganik, avaluksoarniglo Jerusalemib avatâne.

² Inugasaksuille tunnergutinik tunnijilaukput sulle pôktojune; nelliutok taipsoma tikkidlugo igloliortoᴋalaungimat sulle iglomik Nâlekab atinganut illingajomik.

³ Salomoblo Nâlegak nagligiva, agvertarlunelo atâtame Davidib illuserilauktangit malliklugit; kisiane pôktojune tunnergutinik tunnijivok isserluanititsilunelo.

⁴ Atannerlo aivok Gibeonemut, tagvane tunnergutinik tunnijijomavlune; tamânna pôktojolaungmat ânanaudlartok. Salomolo tunnijivok tunnergutinik ôtaksanik 1,000 dinik Altareme tapsomane.

⁵ Nâlekablo Salomo sakᴋervigiva Gibeoneme sinaktomanekut unnuarme, Gûdelo oᴋarpok: Tuksiarit sunamik, tunnijaksamnik illingnut.

⁶ Salomo oᴋarpok: Igvit atâtaga Davide kivgait napᴋoarnermik angijomik pinniarvigilaukpat, agvertarlaungmat sângne miksekârnerme, idluarnermelo, omatiblo nellagôrningane; napᴋoarnermiglo tamattominga soᴋosijuivigilaukpat, ernermiglo tunnitsivigilaukpat iksivautangane iksivajomik, sorlo mânna illingangmat.

⁷ Mânnalo Nâlegak Gûdiga, kivgait atanningortilaukpat atâtama Davidib inningane. Uvangalo nukapiarârsovunga ᴋaujimanangalo ᴋanok anninimnik itternimniglonêt.

⁸ Kivgaillo inugasaksuit annerilauktavit akkornganêpok, taimâk unuktigijôjut kititaujungnangimatta, aglagutigijaujungnangimattalo unnumut.

⁹ Taimâk kivgait omamik Nâletseriartomik tunnitsivigilauruk, inuᴋotingnik idluarsaijungnarᴋovlugo, tukkisilerᴋovlugolo sunamik idluarmangât, idluimangâllonêt. KiNâle sappingilâk inugasaksoakotitit taimâk unuktigijôjut idluarsarungnarlugit?

¹⁰ Tamânna Nâlekab nâmagiva, Salomo taimaitomik tuksiarmat.

¹¹ Gûdiblo oᴋautiva: Taimaitomik tuksiaravit, tuksiarlaunginavillo inôtsemik sivitôjomik, akluinermiglonêt, omigijivit tarninginiglonêt, sillatunermigle idluarsaijungnarlutit;

¹² Ahâk tagva oᴋautsitit malliklugit pinniarpunga. Ahâk omamik illisimajomik, sillatôjomiglo tunnitsivigimavagit, illiktut îtoᴋalaungimat sivunerne, pittaᴋarniangimallo kingunerne.

¹³ Taimâktauk tuksiararingitarnik tunnitsivigimagivagit, imaitunik, akluinermik, nertortaunermiglo, adseᴋarᴋonnak atautsemiglonêt atannit nelliunernetut akkorngane.

¹⁴ Apᴋosinimnelo agvertarniaruvit, illusioᴋojakka, perᴋojakkalo mallingniarungne, sorlo atâtait Davide agvertarlaungmat; tagva tunnitsivigijomavagit inotsemik sivitôjomik.

¹⁵ Salomolo tuppalermat, ahâk, tagva tamânna sinnektomaniolaukpok. Tikkiporlo Jerusalemut, nangeriartorlunelo Nâlekab angersimaningata iklervingata sânganut, tunnijilunelo tunnergutinik ôtaksanik, ᴋujalijutiksaniglo, âkᴋiksoilunelo nerrimâraksamik angijomik kivgaminut ilûnnnainut.

¹⁶ Nelliutome taipsomane anguniarpaktûk ᴋaivuk atannermut, nangeriartorlutiglo sânganut.

¹⁷ Arnâglo aipanga oᴋarpok: Nâlegâk, uvanga arnarlo una ᴋatimgalaukpoguk iglome atautseme; uvangalo innangaᴋatigilaukpara iglome.

¹⁸ Ernilaungnimalo uvlut pingasut kingorngane, tamna ernilaurivok. Uvaguglo aiparêlaukpoguk, taimâk tujormijakangimat iglome uvaguk asiptingnik.

¹⁹ Arnablo oma erninga toᴋovok unnuarme; sinniklune nennerlugo toᴋolaungmago.

²⁰ Unuarmelo makkipok tiguvâlo ernera sanimnit, kivgait arnak sinniktillugo, illilâlo talliminut, erninelo toᴋungajok illiva tallimnut.

²¹ Uvlâkullo makkilaurama ernera amamaktitsomavlugo, ahâk tagva toᴋungalaukpok. Uvlarmelo ᴋemergolaukpara, ahâglo, ernerilaungitara erniliaringitaralo.

²² Arnâglo aipa oᴋarpok: Taimangungitok, ernera inôvok, ernîllo toᴋungavok. TamNâle oᴋarpok: Taimangungitok ernît toᴋungavok, erneralo inôvok. Taimaglo oᴋarpuk atanniub sângane.

²³ Atannerlo oᴋarpok: Una oᴋarpok: Ernera inôvok, ernîllo toᴋungavok; tamnalo oᴋarpok: Taimangungitok, ernît toᴋungavok, erneralo inôvok.

²⁴ Atannerlo oᴋarpok: Saviksoarmik aiklerutigissinga. Saviksoarlo ᴋaitaulerêrmat atanniub sânganut,

²⁵ Atannek oᴋarpok: Nutarak inôjok aviksiuk Maggôlitilugo, ᴋoppangalo tunnisiuk omunga, ᴋoppangalo aipa tapsomunga.

²⁶ Tagva arnak tamna ernelik inôjomik, oᴋarpok atannermut, (omatinga ilûnngertudlalermat ernine pivlugo): Nâlegâk sorruksek inôvlune tunnisiuk tapsomunga, toᴋoniarasiuglo. Arnâgle aipanga oᴋarpok: Uvamnullonêt illingnullonêt illinganiarnago, aviktaule.

²⁷ Tagva atannek kiovok, oᴋarlunelo: Sorrusek inôvlune tunnisiuk omunga, toᴋoniarasiuglo, tamna anânaungmat.

²⁸ Idluarsainerlo tamânna, atanniub attorlauktanga tusaumajaulerpok Israelitit ilûnnnamasianginut, atannerlo sivoragivât; takkogamik Gûdib ilisimaninga tapsomanêmat, idluarsainermik attorlune.