I Atannit 22 - Labrador Inuttitut Heritage Bible

Ahabib toᴋotauninga unnatadlarnerme. Josafat atanniojok Judakunut; Ahasja atanniojok Israelitinut.

¹ Jârillo pingasut ᴋângerput unatadlarneᴋarane Siriamiut Israelitillo akkorngane.

² Jârille pingajuane Josafat Judakut atanningat atersarlune tikkipok Israelitit atanninganut.

³ Israelitillo atanningat oᴋarpok kivgaminut: ᴋaujimangilase Ramoth Gileademêtut perᴋutigigaptigik? uvagullo kikᴋarpogut, aksarnigarilungilavullo Siriamiut atanningata agganginit?

⁴ Josafatemullo oᴋarpok: Illagijomavinga unnatadlarnermut Ramothemut Gileademêtomut? Josafate Israelitit atanninganut oᴋarpok: Illiktut itsomavunga, inuᴋotikkalo inuᴋotititut, horseᴋotikkalo horseᴋotititut.

⁵ Josafatelo oᴋarpok Israelitit atanninganut: Uvlome Nâlekab oᴋausinga appertsolauruk.

⁶ Tagva Israelitit atanningata nellautaijut 400 deôkasait ᴋatimaᴋovait, oᴋautilaitalo: Ramotemut Gileademêtomut aijuksauvîk sorsugvigilugit, nippotijaksarivakkalonêt? Tapᴋoa oᴋarput: Majorarit takpaunga, Nâlekab tunniniarpait atanniub agganginut.

⁷ Josafatele oᴋarpok: Pittaᴋarungnaika Nâlekab nellautaijokotingita illanganik, tapsomuna appertsorungnarajarluta?

⁸ Israelitit atanningat oᴋarpok Josafatemut: Anguteᴋaralloarpok sulle atautsemik, appertsorungnarutigijaptingnik Nâlekamik, Michamik Jemlab erninganik. Kisiane omigivara, nellautaivigingimanga ajungitomik, idluitomigle kisiane. Josafate oᴋarpok: Atannek taimâk oᴋaniarane.

⁹ Tagva Israelitit atanningata angajoᴋait illangat ᴋaikᴋova, oᴋarlunelo: Micha Jemlab erninga ᴋaisaruk ovunga.

¹⁰ Israelitille atanningat Josafatelo Judakut atanningat iksivavuk attunît iksivautaksoaᴋotimingne, annorarsimavlutik atanneksiutinik inneme Samariab itterviksoangata sillatânetome; nellautaijullo ilûnnatik nellautaivut tapᴋoa sângane.

¹¹ Zedekialo Knaenab erninga sanalaukpok ingminut naksungnik kikkiangnik, oᴋarlunelo: Imâk Nâlegak oᴋarpok: Ukkungnunga Siriamiut nakjungmigarniarpatit, Nungutsiᴋârtinak taipkoninga.

¹² Nellautaijullo ilûnnatik taimâk nellautaivut, oᴋarlutiglo: Majorarit takpaunga Ramotemut Gileademêtomut, sullidlarlutillo, Nâlekab tunninarmagit atanniub agganginut.

¹³ Tillijablo aimalauktub Micha ᴋaikᴋolugo, oᴋautiva: Ahâk nellautaijut oᴋâlaningit ilûnnatik adsigêktomik atanniub idluarkutinganut illingavut, taimaimat oᴋautsitit taimailingalaulittauk taipkoa oᴋausingititut, oᴋarlutillo ajungitomik.

¹⁴ Micha oᴋarpok: Sorlo Nâlegak mikseᴋârtomik inôngmat, oᴋaromavunga Nâlekab oᴋauseriniartanginik uvamnut.

¹⁵ Atannermullo tikkimat, atanniub oᴋautiva: Micha, Ramotemut Gileademêtomut aulartuksauvita, sorsungniarluta, nippotijaksarivittigolonêt? Tapsoma oᴋautiva: Ahaila, majorarit takpaunga, sullidlarlutillo, Nâlekab tunniniarpait atanniub agganginut.

¹⁶ Atanniub oᴋaupsarpa: Kapseartorlunga oᴋautimarijariaᴋarpagit, asianik oᴋauseᴋarᴋonnak uvamnut, Nâlekab atingane mikseᴋarnermit.

¹⁷ Tamna oᴋarpok: Israelitit ilûnnamasiatik takkolaukpakka siamarsimatillugit ᴋakᴋat ᴋângine saugatitut mianerijekangitutitut. Nâlegarlo oᴋarpok: Ukkoa angajoᴋaᴋangilet, ilûnnatik attunît angerarlit iglomingnut ullapirsauteᴋarlutik.

¹⁸ Tagva Israelitit atanningat oᴋarpok Josafatemut: Oᴋautilaungilagit ajungitomik nellautailungimat pivlunga, idluituinarmigle?

¹⁹ Tamnalo oᴋarpok: Tamânna pivlugo tusarᴋit mânna Nâlekab oᴋausingit: Nâlegak takkolaukpara iksivatillugo iksivautaksoarmine, ᴋillangmiugaseksuillo ilûnnamasiatik nangertillugit saniane, tallerpiane, saumianelo.

²⁰ Nâlegarlo oᴋarpok: Kia Ahabe tillioromavaûk, majorarᴋovlugo takpaunga, ochoᴋovlugolo Ramoteme Gileademêtome? Illangallo imâk oᴋarpok, asialo imâk.

²¹ Tagva annernit illangat ᴋaivok, Nâlegarlo sangerpa, oᴋarlunelo: Uvanga tillioromavara. Nâlekab oᴋautiva: Sunamut?

²² Tamna oᴋarpok, aularomavunga, annerniojomalungalo nellagôngitok taipsoma nellautaijoᴋotingita ᴋaningine ilûnnaine. Tamnalo oᴋarpok: Igvit tillioraksarivat, sullidlarniarpotillo, aularit taimailiorlutillo.

²³ Ahâglo mânna, Nâlekab annernek nellagôngitok tunnimava, nellautaijoᴋotivit ᴋaninginut ilûnnainut, Nâlekablo idluitomik oᴋarutigilaukpâtit.

²⁴ Tagva Zedekia Knaenab erninga tikkilerpok tamaunga, ulloarokpâlo Micha, oᴋarlunelo: ᴋanok? Nâlekab annerninga nûsimava uvamnit, oᴋarᴋovlugo illingnut?

²⁵ Micha oᴋarpok: Ahâk takkojomârpat uvlorme taipsomane, innimit atautsemit ᴋemâᴋattarniaruvit asianut ailutit, ijerlutit.

²⁶ Israelitit atanningat oᴋarpok: Micha tiguleruk, âlugolo Amonemut, iglugasaksuit angajoᴋânganut, Joasemullo atanniub erninganut,

²⁷ Oᴋarlutillo: Imâk atannek oᴋarpok: Una pitisiuk parngnanairsimavingmut, nerritilugolo ᴋakᴋojamik, imertilugolo imermik kiksarnartomik, utterᴋârtinanga ullapirsauteᴋarlunga.

²⁸ Micha oᴋarpok: Ullapirsauteᴋarlutit utterniaruvit, tagva Nâlegak uvapkut oᴋalaungilak. Oᴋarporlo: Tusaritse inugasaksojose ilûnnase!

²⁹ Taimâk Israelitit atanningat, Josafatelo Judakut atanningat majorarput takpaunga Ramotemut Gileademêtomut.

³⁰ Israelitillo atanningat oᴋarpok Josafatemut: Pissertorlunga sorsungnermut aijomavunga, igville Annoraᴋotitit atikit. Taimaglo Israelitit atanningat pissertorpok ingminik annoraminut, tikkilunelo sorsungnermut.

³¹ Siriamiulle atanningata aksalloalikotime 32 ôlauktut angajoᴋangit perᴋovait oᴋarlunelo: Sorsuktuksaungilase mikkijunullonêt, angijunullonêt. Israelitille atanninganut kisiane.

³² Aksalloagillo angajoᴋangita Josafate takkogamitsuk aulajitigivat atannionasugivlugo Israelitinut tunarivâllo sorsuklugo; Josafatele nipliadlarpok.

³³ Aksalloagillo angajoᴋangit takkogamik atanniolungimat Israelitinut allarpât.

³⁴ Angutille illangata maungatuinak pittikse ᴋelluva, pittiklugolo Israelitit atanningat, sagvingmiutab pêrniublo akkorngagut. Tamnalo oᴋarpok ᴋemuksertoᴋotiminut: Sangulerit nûtilungalo sorsungnermit, ikkilersimagama.

³⁵ Sorsungnerlo sugalulerpok uvlorme taipsomane, atannerlo nangertitaumalaukpok aksalloaliub ᴋângane Siriamiut akkiane, toᴋolunelo unnungme. Auglo ikkimit kôkpok aksalloaliub illuanut.

³⁶ Tagva akpartauᴋojauvut tangmarvingme sekᴋinek nippitillugo, oᴋartoᴋarlune: Ilûnnatik attunnît iglugasaksoarmingnut nunagijamingnullo ailit.

³⁷ Taimâk atannek toᴋovok, âtaulunelo Samariamut. Illijartorpâllo Samariame.

³⁸ Aksalloaliglo ubvarmatsuk tetserme Samariamêtome, kingmit aunga alluktorpât; anguniarpaktulle ubvarpât, Nâlekab oᴋausingit oᴋauserilauktangit malliklugit.

³⁹ Unipᴋautsille tamakkoa asingit sulle Ahabe pivlugo, pinniarlauktangit, iglolo igluliorlauktanga Elefantit tôganginit, iglugasaksuillo sanalauktangit, ahak tamakkoa aglaksimavut Israelitit atanningita aglangine.

⁴⁰ Ahabelo sinnisilerpok, atâtagijaminut ailune; erningalo Ahasja atanningorpok inangêrlugo.

⁴¹ Josafatelo Assab erninga atanningorpok Judakunut, Ahab Israelitit atanningata jâringita sitamangane.

⁴² Jâreᴋalaukporlo atanningorame 35 ginik, ataniotivorlo jârinik 25 ginik Jerusaleme. Anânanga ateᴋalaukpok Asubamik Silhib paninga.

⁴³ Agvertarporlo atâtame Assab apᴋosiningane tamât, saniagôrlungilarlo, pinniarporlo Nâlekab idluarijanganik.

⁴⁴ Poktojulle ipperarlaungilait, inugasaksuillo tunnergutinik tunnijivut, isserluanititsilutiglo sulle pôktojune.

⁴⁵ Josafatelo ullapirsauteᴋarpok Israelitit atanninganut.

⁴⁶ Unipᴋautsille tamakkoa asingit sulle Josafate pivlugo, sôngoninga, pinniarlauktangillo, ᴋanorlo sorsuglaungmat, âhak, tamakkoa aglaksimavut Judakut atanningita aglangine.

⁴⁷ Ajortullijullo amiakolauktut sulle atâtame Assab nelliuninganit pêjarpait nunamit.

⁴⁸ Atanneᴋalaungilarlo Edomiterit nunangane.

⁴⁹ Josafatelo umiaksoarnik sanakojilaukpok, imarbiksoakut Ofiremut umiaktortuksaulauktunik Goldemik aiklertuksauvlutik. Aularlaungilelle, serᴋomitaulaukpulle Ezeongebereme.

⁵⁰ Taipsomane Ahasja Ahabib erninga oᴋarpok Josafatemut: Kivgakka umiaktorᴋatauᴋolaukit kivgakotingnut umiaksoakut. Josafatele pijomalaungilak.

⁵¹ Josafatelo sinnisilerpok atâtagijaminut ailune, illijartortaulaukporlo atâtagijaminut, atâtame Davidib iglugasaksoaᴋotingine; Joramelo erninga atanningorpok innangêrlugo.

⁵² Ahasja, Ahabib erninga atanningorpok Israelitinut Samariame, Josafatib Judakut atanningata jâringita 17 ingane; atanniotivorlo Israelitinut jâringnik maggûngnik.

⁵³ Pinniarporlo Nâlekab idluigijanganik, agvertarlunelo atâtame anânamelo apᴋosinigingne, Jerobeamiblo Nebatib erningata, Israelitinik idluitullititsilauktub apᴋosiningane;

⁵⁴ Baalelo kivgartorpa, tuksiarvigilalo; ningaksarpalo Nâlegak Israelib Gûdinga, taimaluatsiak sorlo atâtanga pinniarlaungmat.