I Atannit 21 - Labrador Inuttitut Heritage Bible

Nabotib toᴋotauninga pasijaksaunane; Ahablo oᴋautsauninga tamânna pivlugo Eliamut, iglungata pêjartaujuksauninganik.

¹ Pijoᴋartullo tamakkoa kingorngane pilerpok, Nabote Jesreelemiut illangat perorsêviᴋarmat napârtolingnik Weineliksanik Jesreeleme, Ahabib atanniub Samariame igloksoangata kiglingane.

² Ahabiblo Nabote oᴋarᴋatigiva oᴋarlunelo: Perorsêvikotit napârtolik Weineliksanik tunnilauruk uvamnut, perorsêvingortitsomavara perorsijanut makpertalingnut; ᴋanidlarmat iglumnut. Perorsêvingmik napârtolingmik Weineliksanik nâmanersamik tunnitsivigijomavagit tamattomunga; ubvalo namaksiguvit Silberemik tunnitsivigijomavagit taimâk unuktigijunik akkiluangatut.

³ Nabotele Ahabemut oᴋarpok: Tamattominga Nâlegak ungasigle uvamnit, kingormgutijara atatagijamnit tunnilugo illingnut.

⁴ Tagva Ahabe angerarpok ningaumajarlune oᴋausek tamânna pivlugo, Nabotib Jesreelemiub oᴋauserilauktanga tapsomunga, oᴋarlunelo: kingormgutijara atâtagijamnit tunnijomangilara illingnut. Innarporlo sinigvingminut, kênanelo ᴋeviartipâ, ᴋakᴋojaktoranelo.

⁵ Tagva nulliangata Isebelib tikkipa, oᴋarvigivâlo: Sôgle annernît annudlarka, nerringilatillo ᴋakᴋojamik?

⁶ Tamna oᴋarpok: Nabote Jesreelemiok oᴋarᴋatigilaukpara, oᴋautilugolo: Perorsêvikotingnik Weineliksalingnik tunnitsivigilaunga kênaujarnut; ubvalo nâmagijaukpat illingnut perorsêviub Weineliksaliub asianik tunnitsivigijomavagit tamattomunga. Taimnâle oᴋarpok: Perorsêviᴋotimnik Weineliksalingmik tunnitsivigijomangilagit.

⁷ Tagva nullianga Isebele oᴋarpok tapsomunga: Taimailiorlutit atanniotivit Israelitinut? Makkitit, ᴋakᴋojaktorlutillo, maksoaniarlutillo. Uvanga Nabotib Jesreelemiub perorsêviᴋotinga Weineliksalik nangminerijautitsomavara illingnut.

⁸ Aglangniglo aglakpok Ahabib atingane nakkiterpaillo Ahabib nakkitsuteᴋotinganut, tillikliutivaillo inutuᴋaunerôjunut angajoᴋaunerôjunullo, taipsoma iglugasaksoaᴋotinginetunut Nabotib najuganêtunut.

⁹ Imâglo aglakpok aglangne tamakkonane: Nerritailinermik akpartitsikojileritse, Nabotelo sivorliovlune ingitisiuk inugasaksoarne;

¹⁰ Angutiglo uivêtuk ingitisigik tapsoma sânganut, pasiklerᴋovlugik tapsominga, oᴋarlutiglo: Gûdelo atannerlo oᴋarnerlotigilaukpâkik. Annitissiuglo millorlugolo toᴋolugo.

¹¹ Taipsomalo iglugasaksoaᴋotingita inutuᴋaunerôjungit angajoᴋangillo, iglugasaksoaᴋotingine igloᴋalauktut, taimailiorput sorlo Isebele perᴋungmagit, sorlo taimna aglangne tillikliutigijamine aglalaungmat;

¹² Nerritailinermiglo akpartitsikojivut, Nabotelo sivorliovlune iksivakovât inugasaksoarne.

¹³ Tagva angutik uivêtuk sangeriartorpâk, inugasaksuillo sângine Nabote pasivâk oᴋarlutiglo: Nabotib Gûde atannerlo oᴋarnerlotigilaukpak. Tagva tessiorpât iglugasaksuit sillatânut milliorpâllo toᴋolugo.

¹⁴ Tagva tilliklerput Isebelemut, oᴋautsauᴋovâllo: Nabote millorsimavok toᴋungalunelo.

¹⁵ Isebele tusarame, Nabote, millorsimangmat toᴋungangmallo, Ahabemut oᴋarpok: Ate Nabotib perorsêvikotinga Weineliksalik, ᴋunujutigilauktanga tunnilugo illingnut kênaujanut, nangminiliutiuk. Nabote inôtsengimat, toᴋungavorle.

¹⁶ Ahabe tusarame Nabote toᴋungangmat, tagva parngnailerpok atersaromavlune Nabotib Jesreelemiub perorsêvikotinganut Weineliksalingmut, nangminiliutijomavlugo.

¹⁷ Nâlekable oᴋausingata Elia Tisbitemiok tikkipa, oᴋarlunelo:

¹⁸ Parngnailerit atersarlutillo Ahabe Israelitit atanningat Samariame pachrerarlugo. Ahâk, Nabotib perorsêviᴋotinganêpok, atersarsimavok tagvunga nangmineliutijomavlugo.

¹⁹ Oᴋarvigiuglo oᴋarlutillo: Imâk Nâlegak oᴋarpok: Inuarlaukpotit, nangmineliutjilutillotauk. Oᴋarvigiuk oᴋarlutillo: Imâk Nâlegak oᴋarpok: Kingmit alluktorvingane Nabotib aunganik, kingmittauk aut alluktoraksarivât.

²⁰ Ahabelo Eliamut oᴋarpok: Nachvârpinga omisukteojotit uvamnik? Tamna oᴋarpok: Âhaila nachvârpagit, niorvgotigigavit pinniartuinaromavlutit Nâlekab ijikita idluigijanginik.

²¹ Ahâk ᴋanoêtomik ᴋaitsivigijomavagit, kinguvakotitillo pêjaromavakka; Ahabemillo pêjainiaromavunga tamainik kivgaujuniglo kivgaungituniglo Israeleme.

²² Igloᴋotillo taimailingatitsomavara Jerobeamib Nebatib erningata iglungatut, Baesablo Ahiab erningata iglungatut; ningaksainek, ningaksaijutigijat uvamnik, Israelitiniglo idluitullititsijutigijat pivlugo.

²³ Isebelelotauk Nâlekab oᴋautigiva, oᴋarlunelo: Kingmit Isebele nerrijaksarivat Jesreelib avalungita kiglingane.

²⁴ Ahabekunit toᴋoniartok iglugasaksoarne ᴋingmit nerrijaksarivat; naternamelo sillame toᴋoniartok, tamna tingmitjet ᴋillaub atânetut nerrijaksarivât.

²⁵ Pittaᴋalaungilak Ahabetut ingminik niorvgotigijomik idluitullilune Nâlekab sângane; nulliangata Isebelib uiveringmago taimailiorᴋovlugo.

²⁶ Makkojungnartullivorlo unuktunik, agvertarlunelo Gûdingoat malliklugit, taimaluatsiavlune sorlo Amoriterit, Israelib ᴋitorngangita sivorngane, Nâlekab pêjarlauktangit pinniarlaungmatta.

²⁷ Ahabible oᴋautsit taimaitut tusaramigit, annorane allikpait, pôngmiglo tapserusêvok timiminut, nerritaililunelo, sinnilarmelo pôngme, sukᴋailisarlunelo pisukpok.

²⁸ Tagva Nâlekab oᴋausingata Elia Tisbitemiok tikkipa, oᴋarlunelo:

²⁹ Takkovit ᴋanok Ahabe nikkanasarmat ingminik sâmne? Tamânna pivlugo nikkanarsarmat ingminik sâmne, ᴋanoêtok tikkikojomalungilara tapsoma uvlungine; erningatale uvlungine ᴋanoêtok tikkerkojomavara iglunganut.