I Atannit 20 - Labrador Inuttitut Heritage Bible

Ahabib unnatadlarninga Benhadademut.

¹ Benhadadiblo Siriamiut ataningata sorsuktuksakotinne ilûnnaita ᴋatitipait, atannîllo 32 git illagivât, horsillo, aksalloagillo; paungalo majorarpok, Samarialo illumavait sorsugvigilugillo.

² Tillijaksaniglo tilliklerpok Ahabemut Israelib atanninganut, iglugasaksuit illuanut,

³ Oᴋautsauᴋolâlo: Imâk Benhadade oᴋarpok: Silberekotit, Goldekotillo perᴋutigivakka, nulliakotitillo ᴋitorngakotitillo idluarnerpât perᴋutigigivakka.

⁴ Israelib atanningat kiovok oᴋarlunelo: Nâlegâk atannek, sorlo oᴋalauravit, perᴋutaumavunga illingnut, tamaitalo pigijakka.

⁵ Tillijallo tikkipsarput, oᴋarlutiglo: Imâk Benhadade oᴋarpok: Tilliklervigilaurapkit, oᴋautsauᴋolaurapkillo: Silberekotit Goldeᴋotillo, nulliaᴋotitillo, ᴋitorngaᴋotitillo tunnijaksarivatit uvamnut;

⁶ Tagva ᴋaupat nelliutome tamattomane kivgaᴋotikka tillijomavakka illingnut, igloᴋotingnik atannerijivillo iglunginik nellipsaiᴋovlugit, innerᴋogijatillo tigujaksarivait aggamingnut aksarnigarijaksarilaitalo.

⁷ Tagva Israelitit atanningata nunab angajoᴋaunerôjungit ilûnnaita ᴋaikᴋovait, oᴋarlunelo: Illitarksileritse takkoluselo idluiluktomik kajusimangmat. Tilliklervigilaukpânga, nulliaᴋotikka, ᴋitorngaᴋotikkalo, Silbereᴋotikkalo, Goldeᴋotikkalo pivlugit, tamakkoninga kippilugvigilaungilara.

⁸ Tagva angajoᴋaunerôjut ilûnnatik, inugasaksuillo ilûnnamasiatik oᴋautivât: Nâlektuksaungilatit, angertuksaunaglonêt.

⁹ Benhadadiblo tillijanginut oᴋarpok: Nâlegara, atannek oᴋautisiuk: Tamaita sivurlermik oᴋautigijauᴋolauktatit kivgarnut, pinniaromavakka; tamânnâle sapperpara. Tillijallo ailerput oᴋarlutiglo tamattominga.

¹⁰ Tagva Benhadad tilliklervigiva oᴋautsauᴋolâlo: Gûdit imâk, imâglo piniarvigilinga, Samariab sanningit namaktuksaulerpatta, inugasaksuit malliktut uvamnik attunit tigumiarᴋamik piᴋovlugit.

¹¹ Israelitille atanningat kiovok, oᴋarlunelo: Oᴋaritse: Sagvimiutamik atijok nertortuksaungilak ingminik, mattârtotut tamattominga.

¹² Benhadad tamattominga tusarame, tupperne atannit immerᴋatigilugit pilune, kivgaminut oᴋarpok: Parngnaileritse. Tapᴋoalo parngnailerput iglugasaksuit sorsugvigilugit.

¹³ Ahâglo, nellautaijut illangata Ahabe Israelitit atanningat aivigiva, oᴋarlunelo: Imâk Nâlegak oᴋarpok: ᴋatimgajoksuit unuktoksuit ukkoa takkolaukpigit? Ahâk, uvlome tunnijomavakka aggangnut; nellojungnailerᴋovlutit uvanga Nâlegaugama.

¹⁴ Ahabe oᴋarpok: Kinakut? Tamna oᴋarpok: Nunab angajoᴋangita inosuktoᴋotingittigut. Ahabe oᴋarpok: Kina sorsungnermik pigiartuksauva? Tamna oᴋarpok: Igvit.

¹⁵ Tagva nunab angajoᴋangita inosuktotoktingit kittipait, tapᴋoalo 232 giolaukput. Tapᴋoalo kingorngane inugasaksuit ilûnnaita Israelib ᴋitorngangit ilûnnaita kittipait angutit 7,000 dit.

¹⁶ Tapᴋoalo annivut uvlub ᴋetterarningane. Benhadadele imerpok, tallamalauklunelo tupperme atanit 32 it tapᴋoa ikkajoriartorsimajut tapsominga illagilugit.

¹⁷ Nunablo angajoᴋangita inosuktoᴋotingit anniᴋârput. Benhadadele tilliklerpok nautsertortuksanik tapᴋoalo oᴋautivât, oᴋarlutiglo: Angutit annivut Samariamit.

¹⁸ Tamna oᴋarpok: Annisimakpatta ullapirsauteᴋaromamut tigusigik inôtillugit, annisimakpattalo unatadlaromamut tigusigik inotillugit.

¹⁹ Nunable angajoᴋangita inosuktoᴋotingit annivut iglugasaksoarnit, sorsuktuksello tapᴋoa kingorngane.

²⁰ Ilûnnatiglo attunnit ullimârnikput tikkitamingnik. Siriamiullo ᴋemâvut, Israelitillo udlapait. Benhadadele Siriamiut atanningat ᴋemâvok horsekut, horsit ᴋângine ablangajut illagilugit.

²¹ Israeliblo atanningat aularpok ullimârpaillo horsit ᴋamutillo, taimaglo Siriamiune sâlagijauneᴋartitsivok angijoksoarmik.

²² Tagva nellautaijub Israelib atanningat aivigiva oᴋautilâlo: Ailerit pitsartutilutillo, kamatsiarlarpillo, takkolutillo pinniaraksarnik. Siriamiut atanningat majoraromârivok sorsugvigivlutit, jâre tamânna nâkpat.

²³ Siriamiullo ataningata kivgangita oᴋautivât: Taipkoa Gûdingit Gûdiôvut ᴋakᴋanut, tamânna pivlugo ajugaulaukput uvaptingnut. Naternamele sorsugvigijomavavut, ajugauniangimangapta taipkonunga.

²⁴ Imailiorit: Atannit nûkoᴋit, attunît inninginit, inangêrtauᴋoᴋillo aulatsijunut nunamik,

²⁵ Sorsuktuksaksoarniglo akiksoilerit pivlutit taipkotitunak asiojilauktatitut, horsiniglo aksalloalingniglo taipkotitunak, sorsugvigilavullo natername. Illâlo ajugaujomavogut tapᴋonunga. Tapsomalo tapᴋoa nippingit Nâlekpait taimailiorlunelo.

²⁶ Jârelo tamânna nâsimangmat Benhadadib Siriamiut oppalungaijarpait, majorarlunelo Afekemut Israelitit sorsugvigijomavlugit.

²⁷ Israeliblo ᴋitorngangit oppalungaijartaulaukputtauk patangaititaulutiglo, aularlarmiglo taipkoa pachrearlugit, tangmarpullo akkingerlugit sorlo tuktungajutitut ᴋatimgajutitut ikkitutitut maggoititut. Siriamiulle nunamik najimavut.

²⁸ Tagva Gûdib anguteᴋotinga tikkipok, oᴋarlunelo Israelitit ataninganut: Imâk Nâlegak oᴋarpok: Siriamiut oᴋalaungmatta: Nâlegak Gûdeôvok ᴋakᴋanut, Gûdeôlungilarlo nâksanut; tamânna pivlugo, ᴋatimgajoksuit tapᴋoa ilûnnamasiatik tunnijomavakka aggangnut, illipse tukkisilerᴋovluse uvanga Nâlegaugama.

²⁹ Tangmarsimavlutiglo sangautivut uvlut 7 it nâvlugit. Uvlullo 7 ingane sorsungnek pigiarpok; Israeliblo ᴋitorngangita Siriamiut pisuktut 100,000 dit ullimarpait uvlorme atautseme.

³⁰ Asingillo ᴋemâvut Afekemut, iglugasaksuit illuanut, avalungillo (ᴋarmangit) ochovut amiakolauktunut, angutinut 27,000 dinut. Benhadadelo ᴋemâvoktauk iglugasaksuit illuanut, nûᴋattarlunelo innemit atautsemit aipanganut.

³¹ Tagva tapsoma kivgangita oᴋautivât: Ahâk tusarlaukpogut, Israelitit ataningit, atanniongmatta napkigosuktut; tagva pôngnik tapseruserta makkitiptigut, aklunaniglo nimerdlotjita niaᴋuptingnut, annilerlutalo Israelitit atanninganut, imaᴋâ inoᴋoniarpâtit.

³² Tapᴋoalo makkititik tapseruserpait pôngnik, aklunâllo nimerdlotivait niaᴋomingnut, ᴋailutiglo Israelitit atanninganut, oᴋarlutiglo: Benhadadib kivgavit oᴋautsauᴋovâtit: Nagliktara inokolaunga. Tamnâle oᴋarpok: Inovâ sulle? Tagva ᴋatangutigivara,

³³ Angutillo tapᴋoa oᴋausek tamânna illaliorsarpât, tukkeᴋartilâlo ingmingnut, oᴋarlutiglo: Ahaila ᴋatangutit Benhadad. Tamna oᴋarpok: ᴋaileritse ᴋailersiuglo. Tagva Benhadadib annivigiva, tapsomalo ikkikova aksalloalingmut (ingminut.)

³⁴ Benhadadiblo oᴋautiva: Iglugasaksoarnik atâtama aksarnigarilauktanginik atâtarnit sattorsititsomavagit; apᴋosinerniglo pivlutit sanâlerit Damaskuseme, sorlo atâtaga pinnialaungmat Samariame. Uvangalo angerᴋatigivlutit aularᴋojomavagit. Tapsomalo angerᴋatigêngneᴋarvigiva, aularᴋolâlo.

³⁵ Tagva angutit illangata nellautaijut erninginit sillaline oᴋautiva Nâlekab oᴋausingagut: Nagliktara annaulaunga! Tamnâle ᴋunnulaukpok annaulugo.

³⁶ Tagva oᴋautiva: Tamânna pivlugo, Nâlekab nippinga Nâlelaunginangne; ahâk aularuvit uvamnit, tagva Loewib annauniarpâtit. Aularmallo tapsomangat Loewib naipipa, annaulâlo.

³⁷ Tapsomalo angutib taipsoma asia naipipa oᴋarlunelo: Nagliktara annaulaunga! Angutiblo tapsoma annauva killerlugo.

³⁸ Tagva nellautaijok tamna aivok, atannerlo uttakiva apᴋosiniub saniane, kênaminiglo pissertorpok argsanut.

³⁹ Atannerlo ᴋângermat, atannek nipliutiva, oᴋarlunelo: Kivgait aularsimalaukpok sorsugviub ᴋerᴋânut, ahâglo, angutit illangat tikkilune angumik atsivigivânga, oᴋarlunelo: Angut una udsertoruk; kingomajauniarpat tagva inôtsit akkiliutiksaujuksauvok inosinganut, ubvalo Talentemik Silberemik akkilêjuksauvotit.

⁴⁰ Kivgaillo sullijaksaᴋartillugo mâne, ikkanelo, tagva tagvanêtsungnailaukpok. Israelitit atanningata oᴋautiva: Tagga illinganît nangminek oᴋautigivet.

⁴¹ Tagva tuavidlune argsak pêrpa kênaminit; Israelitillo atanningata illitarilerpa nellautaijut illagingmatsuk.

⁴² Tapsomalo oᴋautiva: Imâk Nâlegak oᴋarpok: Tamânna pivlugo angut taimna, toᴋotaksaunerartara aularkolaurangne illingnit, inôtsit taipsoma inôsingata inninganêtuksauvok inuᴋotitillo taipsoma inuᴋotingita inninginêdlutik.

⁴³ Israelitillo atanningat ᴋuvianaililunelo ningarlarmelo angerarpok iglominut tikkilunelo Samariamut.