I Atannit 2 - Labrador Inuttitut Heritage Bible

Davidib pijomajangita kingorlingat, toᴋungalo. Salomonib mallingninga tapsominga, idluarsainingalo nertornartok.

¹ Mânna nelliutok Davidib toᴋoviksanga kaglilermat; ernine Salomo perᴋova, oᴋarlunelo:

² Uvanga sillaksoarmiut ilûnnamasiatik apᴋotingat aiviginiarpara; tagva maksoalerit, angutaulutillo.

³ Kamagikillo kamagijaksat Nâlegak Gûdit pivlugo, agvertarᴋovlutit tapsoma apᴋosiningine, kamatsiarᴋovlutillo illusioᴋojanginik, perᴋojanginiglo, idluarijanginiglo, kigligiudsininginiglo, sorlo aglaksimangmat Mosesib perᴋojangine, sillatôᴋovlutit piniarnerne ilûnnaine, namullo sangulervigijarne;

⁴ Nâlegak oᴋautsiminik oᴋauserilauktaminik pivlunga nellautsititsiᴋovlugo, oᴋarame: ᴋitorngavit apᴋoserijatik udsertoromârpagit, sâmne nertornarlutik, omamullo tamânut, tarnemullo tamânut agvertarᴋovlugit; tagva angumik illingnit pijomik Israelib iksivautanganetomik ajoksartoᴋarniatsengimarikpok.

⁵ ᴋaujimatsiarpotittauk sumik Joab Zerujab erningata pinniarvigilaungmanga, sunamik pinniarlauktanganik Israelib sorsuktuksaksoaᴋatigêᴋotingita angajoᴋagingnut, Abneremut Nerib erninganut, Amasamullo Jetherib erninganut, toᴋolauktamingnut, kovisilunelo unatadlarnerub aunganik, ullapirsauteᴋartillugo, unatadlarnerublo aunganik pititsivok tapseruteᴋotiminut, makkitimigut attorlauktaminut, itiggagutiminullo ittikaminelauktunut.

⁶ Pinnialerit sillatonît malliklugo, nujangillo ᴋêrtojut ullapirsauteᴋarlutik unungaᴋoniarnagit toᴋungajut inninganut.

⁷ Barsilaible Gileademiub ᴋitorngangit napᴋoarnermik pinniarvigijaksarvatit nerrimârᴋatauᴋovlugit nerrimarvingne. Taimailiorvigilaungmanga angajoat Absalome ᴋemâlaurapᴋo.

⁸ Ahâglo najortigivat Simei, Gerab erninga, Jeminib erningata Bahurimemiok, oᴋarnerlotjilauktok uvamnik mamaitoâlungmik, nelliutome taipsomane aivigijamne Mahanaimemut. Taipsomale atersarlune pachrearlaukpânga Jordanemut. Tagva angermarilaukpara Nâlekame oᴋarlunga: Toᴋotsomangilagit saviksoarmut.

⁹ MânNâle pasijaksaungitoᴋoniarnago, angutaugavit sillatôjok, ᴋaujimatsiarniarpotillo sunamik pinniarvigijaksarimangangne, nujangit kêrtojut aungmut unnungartilugit toᴋungajut inninganut piᴋovlutit.

¹⁰ Taimâk Davide sinnisilerpok, ailune atâtagijaminut, illijartortaulunelo Davidib iglugasaksoaᴋotingine.

¹¹ Nelliutorle Davidib atanniovia Israelitinut Jâreôvut 40 git. Jârit 7 it nâlugit atanniolaukpok Hebroneme, Jârit 33 nâlugit Jerusaleme.

¹² Salomolo iksivavok atâtame Davidib iksivautakotingane, atannioningalo soᴋosijuilaukpok.

¹³ Adoniale Hagithib erninga ᴋailaukpok kamunga Bathsebamut Salomob anânanganut. Tamnalo oᴋarpok: Ullapirsauteᴋarlutit tikkigalloarivît? Tamna oᴋarpok: Âhaila.

¹⁴ Oᴋarlunelo: Oᴋausiksaᴋarpunga illingnut. Arnak oᴋarpok: Oᴋarit.

¹⁵ Tamna oᴋarpok: Nellungilatit atanniovik nangminerilaurapᴋo, Israelitillo illuêngarlutik torarvigilaukpânga, uvanga ataniojuksaugama; mânNâle ataniovik sangutitaumavok, nukamnullo illingatitaumavok, Nâlekamit pigimava.

¹⁶ Mânna tuksiarnek atausek ᴋenuarivara illingnit, kippilungniarnanga. Tamna arnak oᴋarpok: Oᴋalerit.

¹⁷ Tamna oᴋarpok: Atannek Salomo oᴋarᴋatigilauruk, kippilungniangimatit, tunnijiᴋovlugo uvamnut Abisagemik Sunemiomik, nulliangoᴋovlugo uvamnut.

¹⁸ Bathseba oᴋarpok: Taimaile, pivlutit atannek oᴋarᴋatigijomavara.

¹⁹ Bathsebalo itterlune tikkipok ᴋammunga atannermut Salomomut, oᴋarᴋatigijomavlugo Adonia pivlugo. Atannerlo nikkovilerpok pachreartorpâlo, opigilugolo, ingilunelo iksivautaminut. Iksivautarlo ᴋaitaulaukpok atanniub anânanganut, ingilerᴋovlugo tapsoma tallerpianut.

²⁰ Tamnalo arnak oᴋarpok: Tuksiarârsungmik ᴋenuvunga illingnit, kippilungniangilarma. Atanniub oᴋautiva: Tuksiarit anânak, kippilungniangilagit.

²¹ Tamna arnak oᴋarpok: Abisag Sunemiovinek tunnijaule angajungnut Adoniamut, nulliangoᴋovlugo tapsomunga.

²² Tagva atannek Salomo kiovok, oᴋarlunelo anânaminut: Sôg Abisag Sunemiovinek ᴋenuariviuk Adoniamut? Atanioviktauk ᴋenuarigiuk tapsomunga, angajuklerpaungmat ᴋatangutimnit, illigijaulunelo Abjatharemut ajuᴋertuijomut, Joabemullo Zerujab erninganut.

²³ Atannerlo Salomo angermarikpok Nâlekame, oᴋarlunelo: Gûdib mattominga ipsomingalo pinniarvigilinga, Adonia oᴋalaungipat tamattominga akkerartorlune inôserminut.

²⁴ Mânnalo, sorlo Nâlegak mikseᴋârtomik inôngmat nakkitertok uvamnik, iksivakojijorlo uvamnik atâtama Davidib iksivautangane, iglomiglo sanalauktok uvamnut, sorlo oᴋalaungmat; Adonia uvlome toᴋotaujuksauvok.

²⁵ Atannerlo Salomo tilliklerpok taipsomunga Benajamik Jojadab erninganik; tapsoma ullimârpa toᴋodlugo.

²⁶ Ajuᴋertuijomullo Abjatharemut atannek oᴋarpok: Ailerit Anatotemut perorsêvikotingnut, toᴋotaksaugavit. Uvlomele toᴋotsomangilagit, Nâlekab iklervinga akjarlaurangne atâtama Davidib sivorngane, siorniorᴋataulauravillo atâtaga siorniudlartillugo.

²⁷ Taimâk Salomob ajuᴋertuijok Abjathar ajuktorpa, ajuᴋertuijokonnago Nâlekamut, nellautsiᴋovlugit Nâlekab oᴋausingit, oᴋauserilauktangit Elib iglomiokotingit pivlugit Silome.

²⁸ Tusaumajarlo tamânna pivok Joabemut; Joabib Adonia ungagilaungmago, Absalomeleungitok. Tagva Joabe ᴋemâvok Nâlekab tuppinganut, tigumiarpâglo Altarib nakjugik.

²⁹ Atannerlo Salomo oᴋautsaulerpok Joabe ᴋemâsimangmat Nâlekab tuppinganut; ahâglo nangerpok Altareme. Tagva Salomob Benaja Jojadab erninga tilliva, oᴋarlunelo: Ailerit ullimârlugolo.

³⁰ Benajalo Nâlekab tuppinganut pigame, oᴋautiva: Imâk atannek oᴋarpok: annit. Tamna oᴋarpok: Mâne toᴋojomavunga. Benajablo tamânna oᴋautigiva atannermut, oᴋarlunelo: Taimâk oᴋalaukpok, taimaglo kiolaukpânga.

³¹ Atanniub oᴋautiva: Pinniarit oᴋauserilauktangatut, ullimârlugolo, illijartorlugolo; aungmik, Joabib sullinane kovilauktanganik pêjaiᴋovlutit uvamnit, atâtamalo iglomioᴋotinginit.

³² Nâlekablo akkiniarutigiliuk aunganik niaᴋoanut, angutik toᴋolaungmagik, idluarkijagik, namakijagiglo, inuarlaukpâglo saviksoarmut, atâtaga Davide nellotillugo tamattominga, Abner, Nerib erninga, Israelitit sorsuktuksaksoaᴋatigêngita angajoᴋangat, Amasalo Jetherib erninga, Judakut sorsuktuksaksoaᴋatigêngita angajoᴋangat.

³³ Tapᴋoa augik akkiniarutigijauᴋovlugik Joabib niaᴋoanut, kinguvângitalo soraijuitomik; Davidele kinguvângillo, iglungalo, iksivautangalo, ullapirsauteᴋarᴋovlugit soraijuitomik Nâlekab sângane.

³⁴ Benajalo Jojadab erninga majorarpok, ullimârpâlo toᴋolâlo. Illijartortauvorlo iglomine sunaᴋajuitome.

³⁵ Atanniublo Benaja Jojadab erninga angajoᴋangortipa sorsuktuksanut, taipsoma inninganut; Zadokelo ajuᴋertuijok, atanniub pitipa Abjatharib inigilauktanganut.

³⁶ Atannerlo tilliklerpok, Simeilo ᴋaikᴋojauᴋova, oᴋautivâlo: Igloliorit igluksarnik Jerusaleme, nunaᴋarlutillo tagvane, anniniarnaglo tagvangat, ikkungalonêt taikungalonêt.

³⁷ Uvlut nelliane anniviginiartarne kôb Kidronib akkianut, tagva ᴋaujimalerit toᴋotaujuksaugavit; aut niaᴋungnut pile.

³⁸ Simei oᴋarpok atannermut: Oᴋarnît idluarpok; sorlo Nâlegara atannek oᴋalaungmat, kivgait taimailiorniarpok. Taimâk Simei nunakalaukpok Jerusaleme akkunît.

³⁹ Pijoᴋarlaukporle jârit pingasut kingorngane Simeib kivgagik ᴋemângmannik Achisemut Maechab erninganut Gathemiut atanninganut. Simeilo oᴋautsaulerpok: Ahâk, kivgakotitik Gathemêpuk.

⁴⁰ Tagva Simei parngnailerpok, siuteᴋoktôjoᴋotinelo iksivaviktariva aularlunelo Gathemut Achisemut, kivgane ᴋeneromavlugik. Tagvungalo tikkiname kivgane âpâk Gathemit.

⁴¹ Salomolo oᴋautsauvok Simei aularlaungmat Jerusalemit Gathemut, uttersimangmallo.

⁴² Tagva atannek tilliklerpok, ᴋaikᴋojauᴋolâlo, oᴋautilugolo: Angermarilaungilagit Nâlekame, kigligiudsivigilutillo, oᴋautilutillo, uvlut nelliane aularajarvingne ikkunga, taikungalonêt ᴋaujijuksaugavit toᴋotaksaunernik? Igvillo oᴋautilaukparma: Oᴋautsitit tusartakka idluartôvut.

⁴³ Sôgle Nâlekab angermaringninga, perᴋojarlo tunnilauktara illingnut, mallilaungipigik?

⁴⁴ Atannerlo oᴋarpok Simeimut: Nellungilet kassênek tamât, omativit ᴋaujimajanga, pinniarlauktat atâtamnut Davidemut; Nâlekab kassênît akkiniarutigimava niaᴋungnut.

⁴⁵ Atannerlo Salomo pitsartutitaumavok, Davidiblo iksivautanga soᴋosijuijomârpok Nâlekab sângane sorairane.

⁴⁶ Atanniublo Benaja Jojadab erninga perᴋova, tamna annivok ullimârpâlo toᴋolugo. Atannioviglo aulajuititaulaukpok Salomob agganginut.