I Atannit 19 - Labrador Inuttitut Heritage Bible

Eliab ᴋemâninga Isebel pivlugo; Gûdib sakᴋerninga Eliamut; Elisab ᴋaikᴋojauninga.

¹ Ahablo Isebele oᴋautiva tamainik Eliab pinniarninginik, ᴋanorlo Baalib nellautaijoᴋotingit ilûnnaita saviksoarmut toᴋolaungmagit.

² Tagva Isebele tillijaksamik tilliklerpok Eliamut, oᴋautsauᴋovalo: Gûdit immâglonêt, immâglonêt, pinniarvigilinga, ᴋaupat nelliutome tamattomane inôtsit pinniarvigilungikupko, taipkoa attunît inôsingititut.

³ Tamattomingalo takkogame, parngnailerpok, ailunelo inôtsine pivlugo, tikkilarmelo Bersebamut Judamêtomut, kivganelo ᴋemakpâ tagvunga.

⁴ Tamnâle sunaᴋajuitomut aivok ingmeriaktut ᴋaningitigijomik, tikkiporlo ingilunelo kigutangernaujaᴋutit, attânut, tuksiarporlo toᴋonerminik, oᴋarlunelo: Nâmaksivok, taimâk mânna Nâlegak tarniga tigulauruk; nekkornersaulungilanga atâtagijamnit.

⁵ Inarlunelo sinnilarmelo kigutangernaujakutit atâne. Ahâglo, Engelib aktorpa, oᴋautilalo: Makkitit nerrilutillo.

⁶ Takkosarporlo, ahâglo, niaᴋungata tungâne niaᴋojaᴋarpok jarrasimajomik, publaujaᴋarlunelo imalingmik. Nerrijarêramelo imerêrlarmelo innapsarpok.

⁷ Nâlekablo Engelinga tikkipsarpok aipanganik, aktorpalo, oᴋarlunelo: Makkitit nerrilutillo: apᴋosinek attoriaᴋartat sivitôngmat.

⁸ Makkiporlo, nerrilunelo imerlarmelo, pisukporlo nerᴋiksab tamattoma nakkoksititsininganut, uvlut 40 git unnuallo 40 git nâlugit, Gûdib ᴋakᴋanga Horebe tikkilugo.

⁹ Itterporlo tagvane ᴋairosungmut, siniktarlunelo taggamane. Ahâglo, Nâlekab oᴋausingata tikkipa, oᴋautilâlo: Sunasiorkît mâne Elia?

¹⁰ Tamna oᴋarpok: Ilûnngertorlaukpunga Nâlegak Gûde Zebaoth pivlugo; Israelib ᴋitorngangita angernerilauktat ᴋemangmatsuk, Altarekotitillo serᴋomilaukpait, nellautaijoᴋotitillo toᴋolaukpait saviksoarmut, uvangalo amiakotôvunga, pinnasuarpullo inôsimnik, pêjaivigijomavlunga.

¹¹ Tamnalo oᴋarpok: Annilerit, nangeriartorlutillo ᴋakᴋame Nâlekab sângane. Ahâglo Nâlegak ᴋângerpok, annorelo angijoksoak sôngojorlo, ᴋakᴋanik kopluijok, ᴋairtuniglo serᴋomitsijok sivurlerpok Nâlekamik; Nâlegarle annoremêlaungilak. Annorible kingorngane nunab sajukpiludlarninga; Nâlegarle nunab sajukpiludlarninganêlaungilak.

¹² Nunab sajukpiludlarningata kingorngane ikkoma; Nâlegarle ikkomamelaungilak. Ikkomablo kingorngane sulluksuârsuk tusarnertok.

¹³ Eliab tamânna tusaramiuk, tagva kênane ullikpa ulliksoarminut, annilunelo, nangeriartorlarmelo ᴋairosub pânganut. Ahâglo, nippib tikkipa, oᴋarlunelo: Sunamik sullijaksaᴋarᴋît mâne Elia?

¹⁴ Tamna oᴋarpok: Nâlegak, Gûde Zebaoth pivlugo ilûnngertorlaukpunga; Israelible ᴋitorngangita angernerilauktat ᴋemalaukpât, Altareᴋotitit serᴋomilaukpait, nellautaijokotitit toᴋolaukpait saviksoarmut, uvangalo amiakotôvunga, pinasuarpullo inôsimnik pêjaivigijomavlunga.

¹⁵ Nâlekablo oᴋautiva: Uttilermit, ailutillo apᴋotigijarne sunaᴋajuitoᴋut Damaskusemut, itterlutillo Hasaelelo mingoaruk atanningortilugo Siriamut,

¹⁶ Jehulo Nimsib erninga, atanningortilugo Israelitinut, Elisalo Safatib Abelmeholamiub erninga, nellautaijungortilugo innangêrlutit.

¹⁷ Pijoᴋartuksauvorlo, kina Hasaelib saviksoanganik ᴋemaijok, tamna Jehub toᴋotaksariva, Jehublo saviksoanganik ᴋemaijok, tamna Elisab toᴋotaksariva.

¹⁸ Uvangalo amiakoᴋarᴋojijomavunga Israelitine 7,000 dinik, serᴋunik ilûnnainik serᴋortorlaungitunik Baalib sângane, ᴋanerniglo ilûnnainik kunnilaungitunik tapsominga.

¹⁹ Aularporlo tagvangat, Elisalo Safatib erninga naipipâ makpiteritillugo nunamik tuktuvangnut iglugêngnut 12 inut, tamnalo nangminek 12 it tapᴋoa akkornganelaukpok. Eliablo aivigiva ulliksoakotinelo egipa tapsoma ᴋânganut.

²⁰ Tagva tuktuvait ᴋemaklugit, akpangerdlunelo Elia mallikpa, oᴋarlunelo: Atâtagalo anânagalo kunigiartorlaulakka, tagvalo malligomavagit. Tapsoma oᴋautiva: Ailerit, utterlutillo! Sunamigle pinniarlaukpagit?

²¹ Utterporlo tapsomangat; tuktuvâglo iglugêk tiguvâk toᴋolugiglo, nerᴋingillo ikkoalavait ᴋejungnut tuktuvâk annunginêtunut, tunnivaillo inungnut, nerriᴋovlugit. Parngnailerporlo mallikpâlo Elia, kivgartorlâlo.