I Atannit 18 - Labrador Inuttitut Heritage Bible

Eliab toᴋotsininga Baalib ajuᴋertuijoᴋotinginik; oᴋarningalo sillalungniarmat.

¹ Nelliutorlo sivitôjok ᴋângermat, Nâlekab oᴋausingata Elia tikkipa, jârit pingajuane, oᴋarlunelo: Ailerit takkotilutillo Ahabemut, sillaluᴋojiᴋovlunga nuname.

² Elialo aivok takkotilune ingminik Ahabemut. ᴋângnartoksoaᴋarporle Samariame.

³ Ahabelo Obadja, pimaklertokotine ᴋaikᴋova. (Obadjable Nâlegak sivoragiva angijomik.)

⁴ Isebelible Nâlekab nellautaijoᴋotingit nungutilaungmagit, Obadjab nellautaijut 100 dit tiguvait, ijerpaillo ᴋairosungmut, mâne 50 git, ikkane 50 git, patangaitilaitalo ᴋakᴋojanik, imermiglo.

⁵ Taimâk Ahab Obadja oᴋautiva mânna: Nuna ingerarvigiuk, imektarvingnut, kôngnullo ilûnnainut, iviksukanik nachvârungnarmangapta, horsillo, horsiojartullo piulilugit, nergjutit ilûnnamasiatik toᴋoᴋonnagit.

⁶ Nunalo avikpâk ingmingnut ingergarvigijomavlugo. Ahabe Inutôlune ingerarpok apᴋosinît illangane, Obadjalotauk Inutôlune apᴋosiniub tapsoma asiane.

⁷ Obadjalo mânna apᴋosinermêtillugo, ahâk, tagva Eliab pârpâ; illitarilerpâlo, pamakterporlo kênane pûlugo oᴋarlunelo: Igvit Eliaungilatit Nâlegara?

⁸ Tamna oᴋarpok: Aukak; angajoᴋait oᴋautijartoruk: Ahâk Elia mânêpok.

⁹ Tamnâle oᴋarpok: Sunamik idluitullilaukik, kivgait tunnijomagangne Ahab agganginut, toᴋotsiᴋovlugo uvamnik?

¹⁰ Sorlo miksekârtomik Nâlegak Gûdit inôngmat, Inûᴋatigêksoaᴋangilak, atannioviᴋaranelo, Nâlekama tilliklervigilaungitanganik, ᴋennerlutit. Oᴋalaukpattalo: Mânêngilak, tagva angermaringnermik tigusilaukpok atanniovingmit mattomangat, inûᴋatigêksoarnillo taipkonangat, nachvârtaulunginavit.

¹¹ Mânnalo igvit oᴋarpotit: Angajoᴋait oᴋautijartoruk: Ahâk Elia mânêpok.

¹² Ainniarajarumalo mânna illingnit, tagva Nâlekab annerningata nutinajarpâtit ᴋaujimangitamnut, ᴋainiarumalo Ahabelo oᴋautilugo tammattominga, tapsomalo Nachvârlungipatit; tagva toᴋoniarpânga. Kivgavillo Nâlegak sivoragigalloarpâ inôsungnimnit.

¹³ Nâlegara oᴋautsaumalungilâk pinniarlauktamnik Isebele toᴋotsitillugo Nâlekab nellautaijoᴋotinginik? Nâlekab nellautaijoᴋotingit 100 dit ijerlaurapkit, mâne 50 git, ikkanelo 50 git ᴋairosungmut, patangaitilugillo, ᴋakᴋojamik imermiglo?

¹⁴ Igvillo mânna oᴋarpotit: Angajoᴋait oᴋautijartoruk: Elia manêpok, toᴋotsiᴋovlugo uvamnik.

¹⁵ Elia oᴋarpok: Sorlo mikseᴋârtomik Nâlegak Zebaoth sangiartara inôngmat, uvlome takkotitsomavunga tapsomunga.

¹⁶ Tagva Obadjab Ahabe pachrearpa, oᴋautilâlo tamattominga. Ahablo Elia pachrearpa.

¹⁷ Ahablo Elia takkogamiuk, Ahab oᴋautiva: Igviovit Israelitinik asseroijotit?

¹⁸ Tamnâle oᴋarpok: Uvanga Israelitinik asseroilungilanga, igville, atâtavillo iglomioᴋatingit, Nâlekab perᴋojangit ᴋemalaurapsigik, agvertarapselo Baale malliklugo.

¹⁹ Ate mânna tilliklilaurit Israelitit illuêngarlutik ᴋatimalerkoᴋit uvamnut ᴋakᴋame ᴋarmeleme, Baaliblo nellautaijoᴋotingit 450 git, taimâktauk napârtut nellautaijoᴋotingit 400 dit Isebelib nerrimavianit nerrijut.

²⁰ Taimaglo Ahabe tilliklerpok Israelib ᴋitorngangita ilûnnatik akkornganut, nellautaijullo taipkoa ᴋatimaᴋovait ᴋakᴋame ᴋarmelemik atelingme.

²¹ Tagva Eliab inugasaksuit ilûnnamasiangit nangeriartorvigivait, oᴋarlunelo: ᴋanok akkunêrtigijomik tussiarkise iglugêngne? Nâlegak Gûdeokpat, tagva tamna malliklugo agvertaritse; Baaleokpalle, tagva tamna malliklugo agvertaritse. Inugasaksuillo kiolungilât.

²² Tagva Eliab inugasaksuit oᴋautivait: Uvanga inutôlunga amiakovunga, nellautaijovlunga Nâlekamut, Baalible nellautaijoᴋotingit 450 geôvut.

²³ Tagva mânna tunnitsivigitigut tuktuvângnik maggûngnik, tapᴋoa annerosulerlit tuktuvâk aipânik, avgorlugolo, illilugolo ᴋejuit ᴋânginut ikkomaᴋartailile, tagva uvanga tuktuvâk aipânga tigujomavara illijomalugolo ᴋejuit ᴋânginut, ikkomaᴋartitsomanginivakka.

²⁴ Tagva illipse Gûdipse atinga nipliarvigisiuk, uvangalo Nâlekab atinga nipliarvigijomavara. Gûdîglo nelliak ikkomamut kioniartok, tamna Gûdeôle. Inugasaksuillo illuêngarlutik kiovut: Taimâk idluarpok.

²⁵ Eliablo Baalib nellautaijoᴋotingit oᴋautivait: Tuktuvakotise annerisiuk, sivorliolerluselo, illipse unuktogapse, Gûdipselo atinga nipliarvigisiuk, ikkomaᴋartiniarnagole.

²⁶ Tapᴋoalo tuktuvâk tiguvât tunnijanga tapᴋonunga, tunnergutautipâllo, Baabliblo atinga nipliarvigivât uvlângmit uvlub ᴋetterarninga tikkidlugo, oᴋarᴋattarlutiglo: Baal tusartigut! Tagvanele nippeᴋalaungilak, kioneᴋalaungilarlo. Tussiarpullo Altare sanalauktatik avatagorvigilugo.

²⁷ ᴋetterarmallo mânna, Eliab mittautigilerpait, oᴋarlunelo: Nippeᴋortôvluse kaggudlaritse, Gûdeôngmat isumaksarsiorpallaivok, sullijaksaᴋarporlonêt, asinuarporlonêt, sinnikporlonêt, tuppalerᴋovlugo.

²⁸ Tapᴋoalo nippekortôvlutik kaggudlarput, killerlutiglo ingminik savingnut nuvutsiariktunullo illutsitik malliklugit, aunârᴋârtinagit.

²⁹ ᴋetterarmallo nellautaivut, tunnergutiksak nerᴋiksak tunnijaukârtinago; tagvanele nippeᴋalaungilak, kioneᴋaranelonêt, kamaneᴋangilarlonêt.

³⁰ Tagva Elia inugasaksuit ilûnnamasianginut oᴋarpok: ᴋaileritse tamaunga uvamnut! Inugasaksuillo nangeriartorvigingmatsuk, Nâlekab Altareᴋotinga serᴋomitaumajok âkᴋiksorpa.

³¹ Ujarkallo 12 it tiguvait Jakob ᴋitorngangita kinguvarêngita unnurningit malliklugit, (Nâlekab oᴋausingita oᴋarvigijangata imâk: Israelemik ateᴋartuksauvotit.)

³² Ujarkanillo tapᴋonangat Altaremik sanavok Nâlekab atingane, ittersalliorlunelo Altarib avâtâne, oktutut maggûktut ᴋângasutiksaliktitut silliktigijomik,

³³ ᴋejuillo ᴋetjiorpait, tuktuvaglo avgorpa, illivâlo ᴋejuit ᴋânginut,

³⁴ Oᴋarlunelo: Katet sitamat tattalugit immermik ailersigik, kovilugillo tunnergutiksamut ikkoalajaksamut ᴋejungnullo. Oᴋarporlo: Taimailiupsaritse. Taimailiupsarpullo. Tamnalo oᴋarpok: Pingajuanik taimailioritse. Tapᴋoalo pingajuanik taimailiorput.

³⁵ Immerlo kôkpok Altarib avatâne, ittersarlo ullipkilaurivok immermik.

³⁶ Tunnerguteᴋarviublo nerᴋiksanik nelliuningane, Elia nellautaijok tagvungariarpok oᴋarlunelo: Nâlegak Abramib, Isaublo, Israeliblo Gûdingat, uvlome ᴋaujijaule igvit Gûdeôgavit Israeleme, uvangalo kivgaugama illingnut, taimailiorlauramalo oᴋautsitit malliklugit.

³⁷ Tusarlaunga, Nâlegak tusarlaunga, inugasaksuit tapᴋoa ᴋaujilerᴋovlugit, igvit Nâlegak Gûdeôgavit, tapᴋoa omatinginik sagiartitsiᴋovlutit kingorngane!

³⁸ Tagva Nâlekab ikkomanga kattakpok pângat, nerrivaillo tunnergutiksak ôtaksak, ᴋejuillo, ujarkello, ivjorlo immerlo ittersangmêtok alluktorpa.

³⁹ Inugasaksuillo tamânna takkogamitsuk, pamakterput oᴋarlutiglo: Nâlegak Gûdeôvok, Nâlegak Gûdeôvok!

⁴⁰ Eliable oᴋautivait: Baalib nellautaijoᴋotingit tigulersigik, tapᴋoa illangallonêt ᴋemâᴋonnago. Tiguvaillo. Eliablo atersartipait kôngmut Kisonemik atelingmut, toᴋopaillo.

⁴¹ Eliablo Ahabe oᴋautiva: Paunga majorarit, nerrilutillo imerit sillaludlarnerub mapkullungninga tusarapᴋo.

⁴² Ahablo takpaungartillugo nerrijomavlune, imeromavlunelo, Elia majorarpok ᴋarmelib kemerdluata nuvuanut, okᴋungalunelo nunamut, niaᴋonelo pitipa serᴋotingme akkorngangnut,

⁴³ Oᴋarlunelo kivgaminut: Majorarit paunga takkosarlutillo imarbingmut. Tamna majorarpok, takkosarlunelo, oᴋarporlo: Pitaᴋangilak sunamik tagvane. Elia oᴋarpok: Aipsarᴋattarit tagvunga 7 êrtorlutit.

⁴⁴ 7 inganelo, oᴋarpok: Ahâk nuvujârsuk ᴋongmuarpok imarbingmit, angutib aggangita sillingningatut itok. Elia oᴋarpok: Takpaungalerit Ahabelo oᴋautiuk: Parngnairit atersarlutillo, sillalungmut tikkitauᴋonnak.

⁴⁵ Annikitoârsuglo ᴋillak ᴋernertaumavok nuvujanut, annoremullo, sillalungneᴋarporlo angijomik. Ahabele ᴋemukserpok, ailunelo Jesreelemut.

⁴⁶ Nâlekablo aggangita Elia tikkipât, tapsomalo makkitine tapseruserpa, akpangerlunelo Ahab sivurngane, Jesreel tikkidlugo.