I Atannit 17 - Labrador Inuttitut Heritage Bible

Nellautaijub Eliab pinniarningit.

¹ Elialo Tisbitemiok Gileademiut illangat oᴋarpok Ahabemut: Sorlo mikseᴋârtomik Nâlegak Israelitit Gûdingat, sângiartara inôngmat, jârine tamakkonane mitsungniangilarlonêt, sillalungniangilarlonêt, kisiane uvanga oᴋaruma.

² Nâlekablo oᴋausingata tikkipa, oᴋarlunelo:

³ Aularit ovangat, kingmuarlutillo ᴋaulerviub nellânut, ijerlutillo kôngme Kritemik atelingme, kôktome Jordanemut;

⁴ Kôngmillo immertuksauvotit; tullukello perᴋomavakka patangaititsiᴋovlugit illingnik tagvane.

⁵ Tagva aivok taikunga, pinniarlunelo Nâlekab oᴋausingit malliklugit, aivorlo ingilunelo kôngme Kritemik atelingme, Jordanemut kôktome.

⁶ Tullukello atsivigikattarpât ᴋakᴋojamik, nerᴋemiglo uvlâkut, unukullo, immerporlo kôngmit.

⁷ Pijoᴋalaukporlo uvlut ᴋapsit kingorngane, kôk ipterilingmat; sillalulaungimat nuname.

⁸ Tagva Nâlekab oᴋausingata tikkipa, oᴋarlunelo:

⁹ Parngnailerit ailutillo Zarpatemut, Zidonib ᴋanitanganêtomut, tagvanêtuarlutillo; tagvane uigarnerit illangat perᴋomagapᴋo patangaititsiᴋovlugo illingnik.

¹⁰ Parngnailerporlo ailunelo Zarpatemut. Tikkimallo iglugasaksuit upkoaksoanginut, ahâk, tagva uigarneᴋarpok tagvane ᴋejungnik katersoijomik. Tapsomalo ᴋaikᴋova, oᴋarlunelo: Imiârsungmik aiklerutilaunga illulerkume, imerᴋovlunga.

¹¹ Aitillugolo aikleromamut, nipliarvigiva oᴋarlunelo: Tamuamik niaᴋojamik ᴋaitsivigiᴋasiutilaungatauk.

¹² Arnak oᴋarpok: Sorlo mikseᴋârtomik Nâlegak inôngmat, igamajoᴋalungilanga sumiglonêt, tigumiakamik sanaugamik kisiane ᴋatangme, orksuârsungmiglo publaujarme. Ahâglo ᴋejuit illanginik katersimavunga, itterlungalo, âkᴋiksoromavlugo pivlunga, erneralo pivlugo, nerriᴋovlunuk, toᴋolunuglo.

¹³ Eliab oᴋautiva: Sivuraniarnak, ailerit pinniarlutillo, sorlo oᴋarlauravit; sivurlermigle sâtoârsungmik igalerit tapᴋonangat pivlunga, annitsivigilungalo tamattominga, pivlutille ernillo pivlugo sanalerit kingorngane;

¹⁴ Imâk Nâlegak Israelib Gûdinga oᴋarmat: Sanaugak ᴋatangme ᴋetaulertuksaungilak, publaujarlo orksutalik ajoksartuksaungilak, uvlok taimna Nâlekab sillalukojivia nuname tikkilugo.

¹⁵ Arnak aivok, pinniarlunelo, sorlo Elia oᴋalaungmat. Tamnalo nerrivok, arnarlo iglomioᴋatingillo uvlut kapsit nâlugit.

¹⁶ Sanaugak ᴋatangme kêtaunersaupallialaungilak, publaujarlo orksuktalik ajoksarlaungilak, Nâlekab oᴋausingit oᴋauserilauktangit Eliakut malliklugit.

¹⁷ Pijoᴋartullo tamakkoa kingorngane arnab iglomêvigijangata erninga ᴋanimalerpok, ᴋanimasingalo taimâk sôngotigijolaukpok annerneᴋarungnailermat tapsomane.

¹⁸ Tapsomalo arnab Elia oᴋautiva: Suvigivagit igvit Gûdib anguteᴋotinga? Tikkisimavarma idluinikka erᴋartauᴋovlugit, erneralo toᴋotauᴋovlugo.

¹⁹ Tapsomalo oᴋautiva: Ernît tunniuk uvamnut. Tiguvâlo sânganit, majorarlunelo innemut iglogijaminut, illivâlo sinnigvingminut.

²⁰ Nâlegarlo nipliarvigiva oᴋarlunelo: Nâlegak Gûdîk, uigarnek iglomêvigijara, taimâk idluitullivigilaukiuk erninga toᴋogangne?

²¹ Tesiterporlo pingasuêrtorlune sorrutsib ᴋângane, nipliarlunelo Nâlekamut oᴋarlunelo: Nâlegak Gûdîk, sorrutsib oma tarninga utterᴋolauruk tapsomunga.

²² Nâlekablo Eliab nippinga tusarpa; sorrutsiblo tarninga utterpok tapsomunga omarlunelo.

²³ Eliablo sorrusek tiguva, âlâlo unnunga iglomut, tunnivâlo anânanganut, oᴋarlunelo: Ahâk tagga, ernît inôvok.

²⁴ Arnablo Elia oᴋautiva: Mânna illitarksivunga Gûdib anguteᴋotigingmatit, Nâlekablo oᴋausinga ᴋannerne mikseᴋârtongmat.