I Atannit 16 - Labrador Inuttitut Heritage Bible

Baesa, Ella, Simri, Amri, Ahabelo atanniolauktut Israelitinut.

¹ Nâlekable oᴋausinga tikkipok Jehumut Hananib erninganut Baesa pitjutigillugo, oᴋarlunelo:

² Tamânna pivlugo sannermit makkitilaurapkit, atanningortilutillo inuᴋotimnut Israelitinut, igvillo agvertaravit Jerobeamib apᴋotigijangane, idluitullititsilutillo inuᴋotimnik Israelitinik, ningaksaramgalo tapᴋoa idluitullininginut;

³ Ahâk tamânna pivlugo Baesab kinguvangit igloᴋotingatalo kinguvangit pêjaromavakka, igloᴋotillo illingatitsomavara Jerobeamib Nebatib erningata iglungatut.

⁴ Kina Baesakunit toᴋojok iglugasaksoarne tamna kingmit nerrijaksarivât, kinalo natername toᴋojok tamna tingmitjet sillamêtut nerrijaksarivât.

⁵ Unipᴋautsille tamakkoa asingit sulle Baesa pivlugo, pinniarnerijangillo, sôngoningalo, ahâk, tamânna aglaksimavok Israelitit atanningita aglangine.

⁶ Baesalo sinnisilerpok atâtagijaminut ailune, illijartortaulunelo Tirzame. Erningalo Ella atanningorpok innangêrlugo.

⁷ Nâlekab oᴋausingittauk tikkiput nellautaijoᴋut Jehukut Hananib erningagut Baesamut iglunganullo, idluinek tamât pivlugo pinniarnerijanga Nâlekab sângane, ningaksarlugo aggangme pinniarninginut, Jerobeamib iglungatut îlerᴋovlugo; taimaglotauk tamânna pivlugo, taipkoa ullimârlaungmagit.

⁸ Assab Judakut atanningata jâringita 26 ingane, Ella Baesab erninga atanningorpok Israelitinut, Tirzame jârîk maggûk nâlugik.

⁹ Kivgangale Simri, angajoᴋaujok ᴋammutit ᴋetterᴋanginut, angerᴋatigêngneᴋartitsivok akkerartorlugo. Tirzamelaukporle Weinetorlunelo tallalunelo Arzab pimaklerteôjub Tirzame iglungane.

¹⁰ Simrile itterpok, ullimârpâlo toᴋolugo, Assab Judakut atanningata jâringita 27 ingane, atanningorlunelo innangêrlugo.

¹¹ Atanniogamelo, iksivalunelo taipsoma iksivautangane, Baesab iglomioᴋotingit ilûnnaita ullimârpait, Amiakoᴋarᴋojingilarlo tapsomangat kinamiglonêt, illanganiglonêt, ilannârijanganiglonêt.

¹² Taimâk Simrib Baesab iglomioᴋotingit ilûnnaita pêjarpait, Nâlekab oᴋausingit malliklugit, oᴋauserilauktangit Baesa pivlugo nellautaijoᴋut Jehukut;

¹³ Baesab idluiningit ilûnnaita, erningatalo Ellab idluitulliningit pivlugit, pinniarlauktangit, Israelitiniglo idluitullititsivlutik, Nâlegak Israelib Gûdinga ningaksarlugo, kivgartornermingnut Gûdingoanik.

¹⁴ Unipᴋautsille tamakkoa asingit sulle Ella pivlugo, tamaitalo pinniarlauktangit, ahâk tamânna aglaksimavok Israelitit atanningita aglangine.

¹⁵ Assab Judakut atanningata jâringita 27 ingane Simri atanningorpok Tirzame uvlut 7 it nâlugit. Inugasaksuillo tangmarsimalaukput Gibetonit Filisterit nunanganêtut sivurâne.

¹⁶ Inugasaksuille tangmarvingne tusaramik oᴋartoᴋarmat Simri angerᴋatigêngneᴋartitsimangmat, atannerlo ullimârmago; tagva Israelitit illuêngarlutik uvlorme taipsomatsainaujome Amri sorsuktuksaksoaᴋatigêt angajoᴋangat atanningortipât tangmarvingme.

¹⁷ Amrilo Israelitillo illuêngarlutik illagillugo majorarput Gibetonemit, illumavaillo Tirza.

¹⁸ Simrile takkogame iglugasaksuit sâlagijauniarmatta, itterpok atanniub igloksoangata sôngoninganut, ikkipâlo atanniub igloksoanga, toᴋolunelo,

¹⁹ Ajornine pinniarlauktane pivlugit, pinniarame Nâlekab idluigijanginik, agvertaramelo Jerobeamib apᴋotigijangane, tapsomalo idluiningine, pinniarlauktangine, Israelitit idluitullitilugit.

²⁰ Unipᴋautsit tamakkoa asingit sulle Simri pivlugo, ᴋanorlo angerᴋatigêngneᴋartitsilaungmat, ahâk, tamânna aglaksimavok Israelitit atanningita aglangine.

²¹ Taipsomane inugasaksuit aviutivut maggolivlutik; ᴋetterᴋangita aipaingita Tibni Ginatib erninga ungagivât, atanningortilugo, ᴋetterᴋangitale aipaingita Amri ungagivât.

²² Inugasaksuille Amrib ungagijingit ajugaulaukput inugasaksoarnut Tibnib Ginatib erningata ungagijinginut. Tibnilo toᴋovok, tagva Amri atanningorpok.

²³ Assab Judakut atanningata jâringita 31 ingane, Amri atanningorpok Israelitinut, atanniotilunelo jârit 12 it nalugit, Tirzamêdlune atanniôtivok jârit 6 it nâlugit.

²⁴ ᴋakᴋarlo Samariamik atelik pissiariva Semeremit Tallentîngnut maggûngnut Silberemik, iglugaselliorlunelo ᴋakᴋab ᴋângane, iglugasaksuillo iglugasalliortane atserarpait ᴋakᴋab inuata Semerib atinga malliklugo Samariamik.

²⁵ Amrilo pinniarpok Nâlekab idluigijanginik, sugaluluarlaukporlo sivorlerijaminit tamainit.

²⁶ Agvertarlunelo Jerobeamib Nebatib erningata apᴋotigijangine ilûnnaine, idluininginelo, idluitullititsijutigijangine Israelitinik, Nâlegak Israelib Gûdinga ningaksarlugo kivgartornermingnut Gûdingoanik.

²⁷ Unipᴋautsille tamakkoa asingit sulle Amri pivlugo pinniarlauktangillo tamaita, sôngoningalo attorlauktanga, ahâk tamânna aglaksimavok Israelitit atanningita aglangine.

²⁸ Amrilo sinnisilerpok atâtagijaminut ailune, illijartortauvorlo Samariame. Erningalo Ahabe atanningorpok innangêrlugo.

²⁹ Assab Judakut atanningata jâringita 38 ingane Ahabe Amrib erninga atanningorpok Israelitinut; atanniotivorlo Israelitinut Samariame jârit 22 it nâlugit.

³⁰ Ahabelo Amrib erninga pinniarlaukpok Nâlekab idluigijanginik, sugaluluartomik ilûnnainit sivorlerilauktaminit.

³¹ Suglugilaukpa agvertarame Jerobeamib Nebatib erningata idluiningine, nullianikpâlotauk Isebele Etbaalib Zidonemiut atanningata pania; Baalelo kivgartoriartorpâ, tuksiarvigivâlo.

³² Altarelo sanava Baal pivlugo, Baalib iglungane sanalauktamine tapsomunga Samariame.

³³ Napârtuniglo illijivok; Ahabelo sugaluluartomik pinniarpok Nâlegak Israelib Gûdinga ningaksarlugo, Israelitit atanninginit ilûnnainit sivorlerilauktaminit.

³⁴ Nelliutome taipsomane Hielib Bethelemiub Jericho iglugaselliorpait. Erninga angajuklek Abirame akkiliutaulaukpok tungavik illilauramiuk, erningalo nukârdlek Segube, akkiliutaulaukpok upkoaksuit illilauramigit; Nâlekab oᴋausingit malliklugit, oᴋauserilauktangit Josuakut Nunib erningagut.