I Atannit 15 - Labrador Inuttitut Heritage Bible

Judakut atanningit Abiame, Assa, Josafatelo. Israelitillo atannigik Nadabe, Baesalo.

¹ Jerobeamib Nebatib erningata jâringita 18 ingane Abiame atanningorpok Judakunut,

² Atanniotilunelo Jerusaleme jârit pingasut nâlugit. Anânanga ateᴋalaukpok Maechamik Abisalomib paninga.

³ Tamnalo agvertarpok atâtame idluitulliningine tamaine piniarlauktangine tapsoma sângane, omatingalo illingamarilaungilak Nâlekamut Gûdiminut, sorlo atâtangata Davidib omatinga-îlaungmat.

⁴ Davidele pivlugo, Nâlekab Gûdingata ᴋaumauteᴋarkova Jerusaleme, erninga pitilaungmago tapsoma kingorngane, Jerusalemelo soᴋosertailitingmagit.

⁵ Davide pinniarlaungmat Nâlekab idluarijanganik, allailaungimallo tamainit perᴋolauktanginit tapsomunga, inôsermine tamât, pijoᴋartok Uriamut Hethitereôjomut pivlugo kisianeungitok.

⁶ Unatadlarneᴋatsainarlaukporle Rehabeamib Jerobeamiblo akkorngangne inôsingane tamât.

⁷ Unipᴋautsille tamakkoa asingit sulle Abia pivlugo, pinniarlauktangillo tamaita, ahâk tamânna aglaksimavok Judakut atanningita aglangine. Unatadlarneᴋatsainarlaukporle Abiablo Jerobeamiblo akkorngangne.

⁸ Abialo sinnisilerpok, atâtagijaminut ailune, illijartorpâllo Davidib iglugasaksoangine. Erningalo Assa atanningorpok innangêrlugo.

⁹ Jerobeamib Israelitit atanningata jâringita 20 ingane Assa atanningorpok Judakunut;

¹⁰ Atanniotilaukporlo Jerusaleme jârit 41 git nâlugit. Anânanga ateᴋalaukpok Maechamik, Abisalomib pania.

¹¹ Assalo pinniarpok Nâlekab idluarijanganik, atâtangatut Davidetut.

¹² Ajortullijullo pêjarpait nunamit, Gûdingoallo atâtagijangita sanalauktangit ilûnnaita tagvanêtsungnaitipait.

¹³ Taimâktauk anânane atanniojungnaitipa, Gûdingoamik sanalaungmat ingminut napârtune. Assablo Gûdingoaᴋotinga pêjarpa, ikkipâlo kôb Kidronemik atigûb naksangane.

¹⁴ Poktojulle pêjartaulaungilet. Assable omatinga nellagorlune Nâlegak ungagiva inosermine tamât.

¹⁵ Silberelo Goldelo, illulerkutillo, atâtangata ivsornaitilauktangit, nangminerlo ivsornaitilauktane ittertipait Nâlekab iglunganut.

¹⁶ Unatadlarnekatsainarlaukporlo Assablo Baesablo Israelitit ataningata akkorngangne inôsermingne tamât.

¹⁷ Baesale Israelitit ataningat takpaungarpok Judakut sorsugvigivlugit, Ramalo igluliorsavait, kinalonêt aularungnartuksauᴋonnago aijungnartuksauᴋonnagolonêt Assab Judakut atanningata miksânut.

¹⁸ Tagva Assab Silbere Goldelo Nâlekab iglungata perᴋutetalinganelauktut sulle, atanniublo iglungata perᴋutitalinganelauktut tiguvait tunnilaitalo kivgame agganginut, tillivaillo Benhadademut Tabrimonib Hesionib erningata erninganut, atanniôjomut Siriame, igloᴋalauktomut Damaskuseme, oᴋautsauᴋovâlo:

¹⁹ Angerᴋatigêngneᴋarpok uvamne illingnelo, atâtamnelo atâtangnelo; tamânna pivlugo pilliumik tujoivigivagit, Silberemik Goldemiglo, angerᴋatigêngnek illingnêtok Baesamêtorlo Israelitit ataningane serᴋomilugo piᴋovlutit, tamna aularᴋovlugo uvamnit.

²⁰ Benhadadiblo atannek Assa Nâlekpa, angajoᴋâᴋotinelo tillivait Israelitit iglugasaksoanginut, ullimârpaillo Ijon, Danelo, Abelbetmaechalo, Kinerothelo illûnât, Naftalikut nunangane tamât.

²¹ Baesab tamânna tusaramiuk noᴋarpok igluliorlune Ramamik, utterivlunelo Tirzamut.

²² Atanniuble Assab Judakut ilûnnamasiangit ᴋaikᴋojauᴋovait, atauserlonêllo tikkingitsariaᴋalaungilak, ujarᴋello, ᴋejuillo Baesab igloliorutigilauktangit tiguvait akjatorlaitalo Ramamit; atanniublo Assab tamakkonangat Geba Mizpalo Benjaminekune igluliorpait.

²³ Unipᴋautsit tamakkoa asingit sulle Assa pivlugo, sôngoningalo tamât, pinniarlauktangillo tamaita, iglugasaksuillo iglugaseliorlauktangit, ahâk tamânna aglaksimavok Judakut atanningita aglangine. Inutuᴋaunime nelliuningane kisiane ittiggalerilaukpok.

²⁴ Assalo sinnisilerpok atâtagijaminut ailune, illijartortaulunelo atâtagijaminut, Davidib, atâtagijame iglugasaksoangine. Josafatelo erninga atanningorpok innangêrlugo.

²⁵ Nadabele Jerobeamib erninga atanningorpok Israelitinut, Assab Judakut atanningata jâringita aipangane, atanniotilunelo Israelitinut jârik maggûk nâlugik,

²⁶ Pinniarporlo Nâlekab idluigijanginik, agvertarlunelo atâtame apᴋosiningine, idluitullininginelo, idluitullititsijutigilauktangine Israelitinik.

²⁷ Baesale Ahiab erninga Isascharekunit pijok, angerᴋatigêngneᴋartitsivok pivlugo, ullimârpâlo Gibethoneme Filisterit nunanganêtome. Nadab Israelitillo illuêngarlutik Gibethon illumangmagit.

²⁸ Taimâk Baesab toᴋopa Assab Judakut atanningata jâringita pingajuane, atanningorlunelo innangêrlugo.

²⁹ Atanniôgamelo mânna, Jerobeamib iglomioᴋotingit ilûnnaita ullimarpait, amiakoᴋarᴋojilungilarlo Jerobeamekunit annernelingmik, nungutsiᴋârtinago tapsominga, Nâlekab oᴋausingit oᴋauserilauktangit kivgamigut Ahiakut, Silomioᴋut, malliklugit;

³⁰ Jerobeamib idluiningit pivlugit, idluitullinerilauktangit, idluitullititsijutigijangillo Israelitinik, kajungersainermut ningaksaijutigijangillo Nâlekamik Israelib Gûdinganik.

³¹ Unipᴋautsille tamakkoa asingit sulle Nadabe pivlugo, pinniarlauktangillo tamaita, ahâk tamânna aglaksimavok Israelitit atanningita aglangine.

³² Unatadlarnekatsainarlaukporlo Assab Baesablo Israelitit atanningata akkorngangne inôsermingne tamât.

³³ Assab Judakut atanningata jâringita pingajuane, Baesa Ahiab erninga atanningorpok Israelitit ilûnnamasianginut, Tirzame, jârit 24 git nâlugit,

³⁴ Pinniarlaukporlo Nâlekab idluigijanginik, agvertarlunelo Jerobeamib apkutigijangine idluitullininginelo idluitullititsijutigijangine Israelitinik.