I Atannit 14 - Labrador Inuttitut Heritage Bible

Ahiab nellautaininga Jerobeame pivlugo. Jerobeamib toᴋunga. Rehabeamib atanniotininga, idluitulliningit, pitlartauningalo tamakkoa pivlugit.

¹ Nelliutome taipsomane Abia Jerobeamib erninga ᴋanimalaukpok.

² Jerobeamelo nulliaminut oᴋarpok: Parngnailerit, pissertorlutillo, kinalonêt mallugosulerkonago Jerobeamib nulliaringmatit, ailutillo Silomut. Ahâk nellautaijok Ahia tagvanepok, oᴋautjigilauktara, atanniojuksaugama inugasaksoarnut tapᴋonunga;

³ Neksarlutillo niaᴋojanik tallimaujortunik, sâtuniglo, Illulerᴋomiglo tattatomik igupsaujartut orksunginik, aivigilugolo, oᴋarᴋovlugo illingnut, ᴋanok nukapiab illinganiarianganik.

⁴ Jerobeamiblo nullianga taimailiorpok, parngnailerlunelo ailarmelo Silomut, tikkiporlo Ahiab iglunganut. Ahiale tautugungnarlaungilak, ijîgik inutuᴋaunermut aulasuêrmannik.

⁵ Nâlekable Ahia oᴋautiva: Ahâk Jerobeamib nullianga ᴋaivok, suna apperᴋutigijomavlugo illingnit, ernine pivlugo, tamna ᴋanimangmat. Tagva mânna oᴋautiniarpet imâk imâglo. Itteramelo mânna takkorngartausertorpok.

⁶ Ahiable itigangita ᴋikkergallijarningat tusarmago ittertillugo upkoakut, oᴋarpok: ᴋailerit kamunga, igvit Jerobeamib nullianga, sôg takkorngartausertorᴋit? Tillijaumavunga illingnut, taigotaksamut oᴋumaitomut.

⁷ Ailerit Jerobeamelo oᴋautiuk: Imâk Nâlegak Israelib Gûdingat oᴋarpok: Angijorortilaukpagit inugasaksoarnit, atanningortilutillo inuᴋotimnut Israelitinut;

⁸ Atannioviglo Davidib iglunganit aksarnigarilaukpara, tunnilaukparalo illingnut. Igville kivgaptut Davidetut îlaungilatit, perᴋojamnik mallilauktotut, agvertarlauktotullo malliklunga omamut tamânut, pinniarlune ijingma idluarijanginik kisiane;

⁹ Sugaluluartomiglo pinniarlaukpotit tamainit sivunernelauktunit, ailaukpotit Gûdiblo asinginik, Gûdingoanik kovimajunik sanalutit illingnut, ningaksaromavlunga, tunnungnullo egimavarma,

¹⁰ Taimaimat, ahâk, ᴋanoêtomik pititsijomavunga Jerobeamib iglunganut, pêjaijomavungalo Jerobeamemit, inungniglo omajuniglo tamainik, kivgaujomik kivgaungitomiglo Israeleme; Jerobeamiblo iglungata kinguvângit pêjaromavakka, sorlo aktarnerlukut pêjartauvangmatta, nungumariᴋârtinago.

¹¹ Kina Jerobeamekunit toᴋoniartok iglugasaksoarne kingminut nerrijaujuksauvok, kinalo natername toᴋolertok tamna tingmitjet silamêtut nerrijaksarivât; Nâlekab tamânna oᴋauserilaungmago.

¹² Igvillo parngnailerit angerarlutillo. Ittikkatillo ablorniarpatta iglugasaksoarnut, sorrusek toᴋoniarpok.

¹³ Israelitillo illuêngarlutik oguriniarpât, illijartorniarlâllo. Tamna kisime Jerobeamekunit illuvermut pinniarmat, tapsomane sunamik Nâlekab Israelib Gûdingata ᴋuviagijanganut illingajomik nachvârtaungmat, Jerobeamib iglungane.

¹⁴ Nâlegarle atanneᴋartitsijomârpok Israelitinut, pêjaijomârtomik Jerobeamib iglunganik uvlorme taipsomane. Sunalo pilerêrka mânna?

¹⁵ Nâlekablo Israelitit annauleromârpait, aulaᴋovlugit, sorlo ivik suvlolik imâne aulataungmat, Israelitillo nutsugomârpait nunamit ajungitomit mattomangat tunnilauktaminit atâtanginut, siamârtitsomârpaillo kôksub ungâtânut, tamânna pivlugo napârtoᴋotimingnik (Gûdingoalingnik) sanalaungmatta, Nâlegak ningaksaromavlugo.

¹⁶ Israelitillo tunnijomârpait, Jerobeamib idluitullilauktub, Israelitiniglo idluitullititsilauktub ajorningit pivlugit.

¹⁷ Tagva Jerobeamib nullianga parngnailerpok, ailunelo, tikkilarmelo Tirzamut. Iglublo manoanganut tikkitillugo nukapiak toᴋovok.

¹⁸ Illijartorpâllo, Israelitillo illuêngarlutik ogurivât, Nâlekab oᴋausingit malliklugit oᴋauserilauktangit kivgamigut Ahiakut nellautaijoᴋut.

¹⁹ Unipᴋautsillo tamakkoa asingit sulle Jerobeame pivlugo, ᴋanok unatadlalaungmat, atanniotilaungmallo, ahâk, tamânna aglaksimavok Israelitit atanningita aglangine.

²⁰ Jerobeamible atannioningata nelliuninga jâreôvut 22 it. Sinnisilerporlo atâtagijaminut ailune, erningalo Nadabe atanningorpok innangêrlugo.

²¹ Taimâk Rehabeame Salomob erninga atanniolaukpok Judame. Rehabeame jâreᴋalaukpok 41 ginik atanningorame, atanniotilaukporlo jârit 17 it nâlugit Jerusaleme iglugasaksoarne Nâlekab annerilauktangine Israelib kinguvarênginit tamainit, aterminik pititsiᴋovlugo tagvunga. Anânanga ateᴋalaukpok Naemamik Amonitereôjok.

²² Judakullo pinniarlaukput Nâlekab idluigijanginik, ningaksarnersarivâllo tamainit atâtagijangita pinniarlauktanginit, idluinermingnut pinniarlauktamingnut.

²³ Sanalaukpullotauk ingmingnut poktôjunik, nappajuniglo, napârtuniglo, ᴋakᴋarulangne pôktojune ilûnnaine, napârtullo tungojortut ilûnnatik atâne.

²⁴ Ajortullijoᴋalaukpoktauk nuname; nellojullo Nâlekab pêjarlauktangita Israelib ᴋitorngangita sivorngane makkojungnartulliningit attorpait.

²⁵ Atanniuble Rehabeamib jâringita tallimangane Sisak Egiptenemiut ataningat takpaungarpok, Jerusaleme sorsugvigilugit.

²⁶ Tiguvaillo perᴋutit pivianartut Nâlekab iglunganit, atanniublo iglunganit, tamaitalo tigujaujungnartut, tiguvaillo sappulutaksat Goldeôjut Salomob sanajauᴋolauktangit.

²⁷ Tapᴋoalo inninginut ataniub Rehabeamib sappulutaksat kannujarmit sanajauᴋovait, tunnivaillo sorsuktuksat angajoᴋangita, atanniub iglungata upkuanganik udsertortut agganginut.

²⁸ Atannerlo Nâlekab iglunganut itterlaurangat, sorsuktuksat akjarᴋattarpait, uttertiᴋattarlaitalo kingorngane sorsuktuksat iglunganut.

²⁹ Unipᴋautsille tamakkoa asingit sulle Rehabeame pivlugo, pinniarlauktangillo tamaita, ahâk, tamânna aglaksimavok Judakut atanningita aglangine.

³⁰ Unatadlarneᴋatsainarlaukporle Rehabeamib Jerobeamiblo akkorngangne inôsitik nâlugik.

³¹ Rehabeamelo sinnisilerpok, atâtagijaminut ailune, illijartortaulunelo atâtagijaminut Davidib iglugasaksoangine. Anânangalo ateᴋalaukpok Naemamik Amonitereôjok. Erningalo Abiame atanningorpok innangêrlugo.