I Atannit 13 - Labrador Inuttitut Heritage Bible

Jerobeamib aggangita toᴋungalerningit, âᴋiktauningillo nellautaijub tuksiarutingmago. Nellautaijub toᴋotauninga Loewemut Nâlengininga Gûdemik pivlugo.

¹ Ahaglo, Gûdib anguteᴋotingita illangat tikkipok Judamit Bethelemut, Nâlekab oᴋausingagut, Jerobeame nangertillugo Altarib kiglingane isserluanititsivlune.

² Nipliarporlo Altaremut Nâlekab oᴋausingagut, oᴋarlunelo: Altare, Altare! Nâlegak imâk oᴋarpok: Ahâk, ernermik, erniangojoᴋaromârpok, Davidib iglunganut, Josiamik ateᴋaromârtomik, tamna tunnijijomârpok ᴋângne pôktojub ajuᴋertuijoᴋotinginik, isserluanititsijunik ᴋângne, inuillo sauningit ikkitsomârpait ᴋângne.

³ Nellonaikutamiglo tunnijivok uvlorme taipsomane, oᴋarlunelo: Tamânna nellonaikutauvok, Nâlekab tamânna oᴋauserilaungmago: Ahâk, Altare ᴋoppiniarpok, arkjello ᴋânganetok navitauniarput.

⁴ Atanniublo Gûdib anguteᴋotingata nipliartub Altaremut Bethelemetomut oᴋausingit tusaramigit, aggane issakpait Altarib saniane, oᴋarlunelo: Tigusiuk. Aggangillo issangmijangit tapsomunga toᴋungalerput, ergitijungnangerpaillo.

⁵ Altarelo ᴋoppilerpok, arkjello navitauvut Altaremit, nellonaikutak Gûdib anguteᴋotingata tunnilauktanga Nâlekab oᴋausingagut malliklugo.

⁶ Atannerlo kiovlune oᴋarpok Gûdib anguteᴋotinganut: Nâlekab Gûdivit kênanga ᴋenuvigiuktôk, tuksiutilungalo, aggakka âkiktauᴋovlugit. Tagva Gûdib anguteᴋotingata Nâlekab kênanga ᴋenuvigiva, atanniublo aggangit âkilerput sivurnganetullo îdlutik.

⁷ Atanniublo Gûdib anguteᴋotinga oᴋarvigiva: ᴋailaurit angerarᴋatigilaunga, nekkoksitilutillo, pilliumik tunnitsivigijomavagit.

⁸ Gûdible anguteᴋotingata atannek oᴋautiva: Igloᴋotivît ᴋoppanganik tunnitsiviginajaralloarumga, sulle aiᴋatiginajangilagit; inneme tamattomane niaᴋojaktoromanginama, immeromalungilangalonêt immermik.

⁹ Imâk perᴋojaumagama Nâlekab oᴋausingagut, oᴋautsaulungalo: Niaᴋojaktortuksaungilatit, immertuksaunaglo, uttertuksaungilatillo apᴋosinekut attorlauktakut.

¹⁰ Aularporlo apᴋosiniub asiagut, utterlungilarlo apᴋome aivigilauktamine Bethelemut.

¹¹ Betheleme nellautaijok inutuᴋaujok nunaᴋalaukpok; tapsomalo erningata tikkipa, unipᴋautilâlo pinniarnernik tamainik, Gûdib anguteᴋotingata taipsoma pinniarlauktanginik uvlorme tapsomane Betheleme, oᴋausinginiglo Altaremut.

¹² Atâtangatalo oᴋarvigivait: Apᴋosinit nelliagut Aularlaukᴋa? Erningit takkolaungmatta apᴋosinît nalliagut Gûdib anguteᴋotinga, Judamit tikkilauktok, aularlaungmat.

¹³ Tapsomalo ernine oᴋautivait: Siuteᴋoktôjok iksivaviktarsiuk pivlunga. Siuteᴋoktôjorlo iksivaviktarpât tapsomunga, tapsomalo ikkivigiva,

¹⁴ Mallikpâlo Gûdib anguteᴋotinga, naipipâlo iksivatillugo napârtub Terebintemik atigub atâne, oᴋautivâlo: Igvit tamnauvît Gûdib anguteᴋotinga Judamit tikkilauktok? Tamna oᴋarpok: Âhaila.

¹⁵ Tapsoma oᴋautiva: ᴋait, angerarᴋatigilaunga, niaᴋojaktorlutillo.

¹⁶ TamNâle oᴋarpok: Utterᴋatigijungnangilagit, aiparijungnangilagillo, niaᴋojaktorᴋatigijungnangilagit, immertorᴋatiginiarnaglonêt mâne inneme tamattomane.

¹⁷ Nâlekab oᴋausingittigut oᴋautsaugama: Tagvane niaᴋojaktortuksaungilatillonêt immertuksaunaglonêt uttertuksaungilatillo apᴋosinekut attorlauktakut tamaunga.

¹⁸ Tapsoma oᴋautiva: Uvanga nellautaijôgivungatauk illiktut, Engeliblo oᴋarᴋatigilaukpânga Nâlekab oᴋausingagut, oᴋautilungalo: Uttertitsuk igloᴋotingnut, niaᴋojartorᴋovlugo, immerᴋovlugolo. Sagloᴋipâle.

¹⁹ Tagva utterᴋatigivâ, niaᴋojartorlunelo, immerlarmelo iglungane.

²⁰ Iksivatillugolo nerrimarvingme, Nâlekab oᴋausinga tikkipok nellautaijomut uttertitsilauktomut tapsominga;

²¹ ᴋaigarsugvigivâlo Gûdib anguteᴋotinga Judamit tikkilauktok, oᴋarlunelo: Imâk Nâlegak oᴋarpok: Tamânna pivlugo Nâlekab ᴋaninga Nâlelaunginangne, perᴋojarlo Nâlekab Gûdivît perᴋojutigilauktanga illingnut mallilaunginangne,

²² Uttersimagavillo, niaᴋojartorlutillo imerlarpillo inneme oᴋarutigilauktangane illingnut: Niaᴋojaktortuksaungilatit, immertuksaunaglonêt; tamânna pivlugo timît toᴋungajok atâtagijavit illuvinganut pijuksaungilak.

²³ Niaᴋojaktorlauᴋârtillugolo immerlauᴋârdlunelo, siuteᴋoktôjok iksivavik târpâ nellautaijomut uttertilauktaminut.

²⁴ Aulartillugolo Loewib naipipa apᴋosinerme, tokolâlo; timingalo toᴋungajok egitaumalaukpok apᴋosinermut, siuteᴋoktojorlo nangerpok saniane, Loewelo nangerpok timib toᴋungajub saniane.

²⁵ Ahâglo inuit sanirᴋoput takkolutiglo timemik toᴋungajomik egisimajomik apᴋosinermut, Loewemiglo nangertomik timib toᴋungajub saniane, tikkilutiglo oᴋalarmiglo tamattominga iglugasaksoarne nellautaijub inutuᴋaujub igloᴋarvigijangine.

²⁶ Nellautaijorlo uttertitsilauktok taipsominga, tamattominga tusarame oᴋarpok: Angutauvok Gûdib pigijanga, Nâlekab ᴋaninganik Nâlelaungitok; tamânna pivlugo Nâlekab tunnilaukpa Loewemut, tapsoma alliktorlaukpâ toᴋolâlo, oᴋautsit malliklugit, Nâlekab oᴋauserilauktangit tapsomunga.

²⁷ Oᴋarporlo ernerminut: Siuteᴋoktôjok iksivaviktarsiuk pivlunga. Iksivaviktarêrmatsuglo,

²⁸ Aularpok tagvunga, nachvarpâlo timinga toᴋungajok, egisimajok apᴋosinermut, siuteᴋoktojorlo Loewelo timib toᴋungajub sanianetillugik. Loewe nerrilaungimarikpok timemit toᴋungajomit, siuteᴋoktojorlo alliktorlaungila.

²⁹ Tagva nellautaijub Gûdib anguteᴋotingata timinga toᴋungajok kivikpa, illilâlo siuteᴋoktôjomut uttertipâlo; nellautaijorlo inutuᴋak tikkipok iglugasaksoarnut, ogurilugo illijartorlugolo.

³⁰ Timelo toᴋungajok illiva illuveᴋotiminut; ogurivâllo oᴋarlutik: Kiksarnamêk ᴋatangutik!

³¹ Illijartorêrmatsuglo ernerminut oᴋarpok: Toᴋojomâruma, tagva illijartorsinga illuvermut, Gûdib anguteᴋotingata illijartortauvigijanganut, saunikkalo ilinniarsigik tapsoma sauningita sanianut.

³² Pijomârmat, sorlo ᴋaigarsulaungmat Altaremut Bethelemêtomut Nâlekab oᴋausingagut, pôktôjullo iglunginut ilûnnainut, Samariab iglugasaksoanginnêtunut.

³³ Pijoᴋartuble tamattoma kingorngane Jerobeamib apᴋotigijane idluitok allârlungila, amale ajuᴋertuijungortitsivok inungnit erᴋanangitonerpângôjunit; nelliallo pijomajok ajuᴋertuijungortitauvok, iglunut poktôjunêtunut.

³⁴ Tamânnalo illingalaukpok Jerobeamib iglungata idluitullininganut, asserortauᴋovlugo pêjartauᴋovlugolo nunamit.