I Atannit 12 - Labrador Inuttitut Heritage Bible

Kinguvarêt 10 it apterningit Rehabeamemit. Jerobeamiblo atanningortitauninga, kivgartorningalo Gûdingoanik.

¹ Rehabeamelo Sichememut aivok, Israelitit illuêngarlutik Sichememut tikkisimagamik atanningortitsomavlugo.

² Jerobeamelo, Nebatib erninga tusarpok tamattominga Egiptenemêdlune sulle, ᴋemâvigijamine atannek Salomo pivlugo, Egiptenemêtuarporlo.

³ Tilliklerpullo taikunga, ᴋaikᴋojauᴋolâllo. Tagva Jerobeame Israelitillo ᴋatimajut ilûnnatik tikkiput Rehabeame oᴋarᴋatigijomavlugo, oᴋarpullo:

⁴ Atâtavit nangmariaᴋartavut oᴋumailuartilaukpa, taimaimat igvit mânna kivgartornek oᴋumaitok, nangmagarlo siorniornartok illilauktanga uvaptingnut oᴋinersautilikik: tagva Nâlegomavaptigit.

⁵ Tapsomale oᴋautivait: Aileritse uvlut pingajuat tikkidlugo, tagva ᴋaipsarniaritse uvamnut. Inugasaksuillo aularput.

⁶ Atanniublo Rehabeamib angajoᴋajat atâtame Salomob sângane nangerlauktut inôtillugo sulle, ᴋakimiolerᴋatigivait, oᴋarlunelo: ᴋanok atannertuivise inugasaksuit taipkoa kiolugit?

⁷ Tapᴋoa oᴋautivât: Uvlome inugasaksuit taipkoa kivgartorniarungne, pijomajangillo mallingniarungne, tusarlugillo, ilannârnartuniglo oᴋauseᴋarvigigungne, tagva Nâlengniarpâtit inotsit nâlugo.

⁸ Tapsomale angajuklit atannertuiningat tunnilauktangat tapsomunga ᴋemakpâ, ᴋakimiolerᴋatigivaillo inosuktut, ikkingutine sânganelo nangertut.

⁹ Oᴋautivaillo: ᴋanok illipse atannertuivise, sunamik kiojuksaugapta inugasaksoarnik, oᴋautjigilauktamnik: Nangmagak atâtavit illilauktanga uvaptingnut oᴋinersautiuk?

¹⁰ Inosuktullo, ikkingutingita oᴋautivât: Inugasaksuit oᴋautjigilauktatit: Atâtavit nangmagaksavut oᴋumailuartilaukpa, igvit oᴋinersautiuk, imâk oᴋautijaksarivatit: Erᴋeᴋoᴋotiga sillinersaujuksauvok atâtama koktoragingnit.

¹¹ Illa atâtama nangmiulaukpâse oᴋumaitomik, uvangale illautitsijomavunga sulle tamattomunga; atâtama ipperautanut ipperartorlaukpâse, uvangale Scorpionenut sugiaromavapse.

¹² Taimâk Jerobeame inugasaksuit illuêngârdlutik illagillugit tikkipok Rehabeamut, uvlut pingajuane, sorlo atannek oᴋauseᴋalaungmat oᴋarlune: Tikkipsaritse uvamnut uvlut pingajuane.

¹³ Atanniublo inugasaksuit kiovait oᴋumaitomik, atannertuinerlo angajuklit tunnilauktangat tapsomunga ᴋemakpâ,

¹⁴ Oᴋarvigivaillo inosuktut atannertuiningat malliklugo, oᴋarlunelo: Atâtama nangmagaksase oᴋumaitilaukpait, uvangale illautitsijomavunga sulle; atâtama ipperautanut ipperartorlaukpase, uvangale Scorpioninut sugiaromavapse.

¹⁵ Atanniublo inugasaksuit Nâlelungilait; illingatitaungmat taimâk Nâlekamut, oᴋautsiminik nellautitsiᴋovlugo oᴋauserilauktaminik Ahiakut Silomioᴋut Jerobeamemut, Nebatib erninganut.

¹⁶ Israelitille ilûnnamasiangit takkogamik atanniub tusaromangimagit, inugasaksuit atannek kiovât oᴋarlutiglo: Sunamik illangiutiviᴋarᴋita Davidemik? Isaiblo erninga pigingilavut, Israelitiôjose aileritse tuppeᴋotipsingnut! Taimâk mânna igvit Davideᴋotivît iglunga takkonâruk. Taimâk Israelitit aivut tupperᴋotimingnut,

¹⁷ Israelible ᴋitornganginut Judakut igloksoangine nunaᴋartunut, tapᴋonunga Rehabeam atanniolaukpok.

¹⁸ Atanniublo Rehabeamib Adorame pimmaklerte tillingmago tagvunga, Israelitit ilûnnamasiatik millorpât ujaganut toᴋolugo. Atannerle Rehabeame tuavidlune ikkivok aksalloalingnut, ᴋemâlunelo Jerusalemut.

¹⁹ Taimâk Israelitit apterput Davidib iglunganit, uvlok tamânna tikkilugo.

²⁰ Israelitit illuêngarlutik tusaramik mânna Jerobeame uttersimangmat, tikkilerput, ᴋaikᴋojauᴋolâlo illagêktunut, atanningortilâlo Israelitit ilûnnamasianginut; kinguvarêllo Judakut asinginik, malliktoᴋalaungilak atautsemiglonêt Davidib iglunganik.

²¹ Rehabeamelo Jerusalemut tikkiname Judakut illuêngardlutik, kinguvarêllo Benjaminekut katertipait, angutit inosuktut sorsugungnartut 180,000 dit, Israelitit kinguvarêngit sorsugvigijomavlugit, atannioviglo ama sattortautilugo Rehabeamemut Salomob erninganut.

²² Gûdible oᴋausinga pivok Semajamut Gûdib Anguteᴋotinganut, oᴋarlunelo:

²³ Rehabeame Salomob erninga Judakut atanningat, Judakullo ilûnnamasiatik, Benjaminekullo, inugasaksuillo asingit, oᴋautikit oᴋarlutillo:

²⁴ Imâk Nâlegak oᴋarpok: Takpaungartuksaungilase ᴋatangutise Israelib ᴋitorngangit sorsugvigilugit; angutit ilûnnatik attunît iglomingnut angerarlît, tamânna uvamnit pingmat. Nâlekpaillo Nâlekab oᴋausingit, utterlutiglo, ailarmiglo sorlo Nâlegak oᴋarlaungmat.

²⁵ Jerobeamible Sicheme Efraimib ᴋakᴋangine iglugasalliorpait, nunagivaillo; aularporlo tagvangat Pnuelo iglugasalliorpait.

²⁶ Jerobeamele isumertuivok omatiminut: Atanniovik mânna utterniarivok Davidib iglunganut;

²⁷ Inugasaksuit ukkoa takpaungartuksaupatta, tunnergutiksaniglo tunnijilutik Nâlekab iglungane Jerusaleme; tagva inugasaksuit ukkua omatingit sâlerniarivut angajoᴋamingnut Rehabeamemut Judakut ataninganut, toᴋoniarpângalo, sâlerniarlutiglo Rehabeamemut Judakut ataninganut.

²⁸ Tagva Jerobeame ᴋaᴋimiojoᴋarᴋojivok, sanalunelo nochangoangnik Goldeojungnik, oᴋautivaillo: Ajornarpok illipsingnut majorarluse Jerusalemut, ahâk, Israelitiôjose tagva Gûdise aularutjilauktut illipsingnik Egiptenemit.

²⁹ Aipangalo nappava Betheleme, aipalo Daneme.

³⁰ Tamânnalo idluitullijutaulaukpok; inugasaksuit aipa sângeriartormatsuk (opigilugo) Dane tikkidlugo.

³¹ Iglomiglo igloliorpoktauk poktôjune, ajuᴋertuijungortitsivorlo inugasaksoarnit erᴋanangitonerpaujunit, Levib ᴋitornganginit pingitunik.

³² Uvloksiorvingmiglo âᴋiksoivok takᴋit 8 ingata uvlungita 15 ingane, uvloksiorviub Judame adsinganik, tunnergutiniglo tunnijivok Altareme. Taimailiorpok Betheleme, tunnergutit tunnijauᴋovlugit nochangoangnut sanalauktangangnut; âᴋiksoilunelo Betheleme ajuᴋertuijunik poktôjunut sanalauktaminut.

³³ Tunnergutiniglo tunnijivok Altarib sanalauktame ᴋângane Betheleme, takᴋit 8 ingata uvlungita 15 ingane, omatiminut isumertorlauktangane; âᴋiksoilunelo taimâk uvloksiorvingnik Israelib ᴋitornganginut; tunnijilunelo tunnergutinik Altarib ᴋângane, isserluanititsilunelo.