I Atannit 11 - Labrador Inuttitut Heritage Bible

Salomob nulliangit; kivgartorningalo Gûdingoanik, toᴋungalo.

¹ Atanniuble Salomob arnat unuktut Judit nunangata asinginit pijut nagligivait, Faraob paniata saniane arnat Moabiterinit, Amoniterinillo, Edomiterinillo, Zidonemiunillo, Hethiterinillo,

² Inuᴋatigêksoarnit taimaitunit Nâlekab oᴋautigilauktanginit: Aiviginiarasigik, tikkitailitissigiglo illipsingnut; nellonangitomik omatise sangutiniarpait, Gûdingoakotimingnut. Taimaitut Salomob ungagivait naglingnermut.

³ Nulliakalaukporlo 700 dinik atannît paninginik, Pannervgaᴋalarmelo 300 dinik. Nulliangitalo omatinga sangutipât.

⁴ Salomolo inutuᴋaulermat nulliakotingita omatinga sangutipât Gûdingoanut, omatingalo illuêngardlune illingalaungilak Nâlekamut Gûdiminut, sorlo atâtangata Davidib omatinga pilaungmat.

⁵ Taimâk Salomo agvertarpok Astorete, Zidonemiut Gûdingat, Milkomelo Amoniterit makkojungnartoᴋotingat malliklugik.

⁶ Salomoblo Nâlekab ᴋuviagingitanga pinniarpa, mallingnanelo illuêngardlune Nâlekamik, sorlo atâtanga Davide pinniarlaungmat.

⁷ Taipsomane Salomob poktojok sanavâ Kamos Moabiterit makkojungnartokotingat pivlugo, ᴋakᴋame Jerusalemib nellânetome, Molechelo Amoniterit makkojungnartoᴋotingat pivlugo.

⁸ Taimailiorlaukpok Salomo nulliane takkorngartanit pijut ilûnnaita pivlugit, Gûdingoaᴋotimingnut isserluanititsijut, tunnijijullo tunnergutinik.

⁹ Tagva Nâlekab Salomo ningarilerpa, omatinga Nâlekamik Israelib Gûdinganik allaingmat, maggoêrtorlune Sakᴋerlauktomik tapsomunga,

¹⁰ Perᴋojilauktomiglo tapsomunga, Gûdib asingit malliklugit agvertartuksaungimat; mallilaungilaille perᴋojaunine Nâlekamut.

¹¹ Tamânna pivlugo Nâlegak oᴋarpok Salomomut: Taimailiortoᴋalaungmat illingnut, angernera, perᴋojakkalo, perᴋolauktakka illingnut, mallilaunginangne, atanniovik aksarnigarijomagivara illingnit, tunnijomalugolo kivgakotingnut.

¹² Inôtillutille taimailioromalungilanga atâtait Davide pivlugo; ernivîlle agganginit aksarnigarijomavara.

¹³ Atanniovigle illuêngardlune aksarnigarijomangilara, kinguvarêt atautsit tunnijomavakka ernernut, Davide kivgara pivlugo, Jerusalemelo pivlugit annerilauktakka.

¹⁴ Nâlekablo Salomo akkerartorteᴋartipa Hadademik Edomiomik, atanniub Edomeme kinguvanganit pijomik.

¹⁵ Davidele Edomemêlauktillugo Joabelo sorsuktuksaksoaᴋatigêt angajoᴋangat takpaungarame ullimarsimajut illijartoromavlugit, angutaujut Edomeme ilûnnamasiatik ullimarpait.

¹⁶ Joabe takᴋit 6 it nâlugit Edomemêtuarame, Israelitillo illuêngardlutik, nungutsikârtinane angutaujunik ilûnnainik Edomeme.

¹⁷ Tagva Hadade ᴋemâvok illagillugolo Edomiut angutingita, atatangata kivgangita illangit, Egiptenemut tikkitsomavlutik. Hadadele nukapiangolaukpok sulle.

¹⁸ Aularpullo Midianemit, tikkilutiglo Paranemut, neksarpullo inungnik Paranemit, tikkilutiglo Egiptenemut Faraomut Egiptenemiut atanninganut. Tapsoma tunnitsivigiva iglomik, inugutiksamiglo, nunamiglo.

¹⁹ Hadadelo napᴋoaneksivok angijomik Faraome, nulliamiglo tunnitsivigiva, nulliame Tachpenesib nukkanganik.

²⁰ Tachpenesiblo nukâ ernivok tapsomunga erninganik Genubathemik; Tachpenesiblo inugoiva Faraub iglungane; Genubathelo Faraub iglunganetsainarlaukpok, atanniub erningita akkorngane.

²¹ Hadadelo Egipteneme tusarame, Davide atâtagijangit illagillugit sinnisimangmat, Joabelo sorsuktuksaksoangita angajoᴋangat toᴋungmat, Faraomut oᴋarpok: Aularᴋolaunga, nunakotimnut aimiᴋovlunga.

²² Faraub oᴋautiva: Sunamik kingumaklerᴋît uvamne nunakotingnut nûtsomagavit? Tamna oᴋarpok: kingumaklerlungilanga sunamik, aularᴋolaungale.

²³ Gûdiblo akkerartorteᴋartipa sulle asianik, Resonemik, Eljadab erninganik, angajoᴋaminit Hadadeseremit Zobamiut atanninganit ᴋemâlauktomik.

²⁴ Angutiniglo katersoivok ingminut, angajoᴋaulaukporlo sorsuktuksat illanginut, Davide taipkoninga (Siriamiunik) salaᴋarlauktillugo; aularpullo Damaskusemut, nunagivâllo ataniôtilutiglo Damaskuseme.

²⁵ Tamnalo ᴋanoêtoᴋartitsinine tappilugo akkerartortêolaukpok Israelitinut Salomob inosingata nâninga tikkidlugo; atanniolaukporlo Siriamiunut.

²⁶ Jerobeamelotauk Nebatib erninga Efratemiok Zaredamit, Salomob kivganga, (anânangalo Zerugaulaukpok uigarnek) tamna aggangminik ᴋongmuartitsivok atannermut akkerartorlune.

²⁷ Tamânnalo pitjutauvok aggane ᴋongmuartimagit atanek akkerartorlugo: Salomob Millo sanalaungmago, kingek Davidib atâtame iglugasaksoangane simmikpa.

²⁸ Jerobeamelo angutaulaukpok erkinaitok. Salomoblo inosuktok takkogamiuk sullidlarmat, aulatsijungortipa sanajuksanik Josefib iglunganit pijunik ilûnnainik.

²⁹ Pijoᴋalaukporlo nelliutome taipsomane, Jerobeame aulartillugo Jerusalemit, Ahiab Silomiub nellautaijub naipipa apᴋosinerme, ulliksoalijarporlo nutâmaringmik, tapᴋoalo maggûk inutolaukpuk tagvane.

³⁰ Ahiablo ullik nutâk attortane tiguva alliktorlâlo, allingningit 12 ôlivlugit,

³¹ Oᴋarlunelo Jerobiamut: Alliktut tallimaujortut tigukit illingnut. Imâk Nâlegak Israelib Gûdingat oᴋarmat: Ahâk atanniovik aksarnigarijomavara Salomob agganginit, kinguvarêllo tallimaujortut tunnijomavakka illingnut.

³² Kinguvarêt atautsit pigênaraksarivait kivgara Davide pivlugo, iglugasaksuillo Jerusalem pivlugit, annerilauktakka Israelib kinguvarênginit ilûnnainit.

³³ Tamânna pivlugo allarlaungmanga, Astarote Zidonemiut Gûdingoangat, Kamoselo, Moabiterit Gûdingoangat, Milkomelo, Amoniterit Gûdingoangat tuksiarvigilaungmagit; agvertarlaungimattalo apᴋosinimne, pinniaratiglo ᴋuviagijamnik, perᴋojamnik, idluarijamniglo Davidetut atâtangatut.

³⁴ Atanioviuble illûnanga tigujomangilara agganginit, atanniotsainarkojomavara inosinga nâlugo, Davide kivgara annerilauktara pivlugo, perᴋojamnik idluarijamniglo mallilauktok.

³⁵ Erningata agganginit ataniovik tigujomavara, illingnullo kinguvarêt tallimaujortut,

³⁶ Erninganullo kinguvarêt atautsit tunnijomavakka, Davide kivgara ᴋaumauteᴋatsainarᴋovlugo sâmne iglugasaksoarne Jerusaleme annerilauktamne atera pitilugo tagvunga.

³⁷ Igvillo tigujomavagit mânna, atanniotilerᴋovlutit tamainut omativit tussugijanginut, atanniojuksaulutillo Israelitinut.

³⁸ Nâletsiarniaruvillo mânna tamainik perᴋoniartamnik illingnut, agvertarniaruvillo apᴋosinimne, pinniarlutillo ᴋuviagijamnik, idluarijakka perᴋojakkalo malliklugit piguvit, sorlo kivgara Davide pinniarlaungmat; tagva aiparijomavagit, iglolioromavlutillo soᴋosijuitomik, sorlo Davide igloliorlaurapᴋo, tunnitsivigijomavlutillo Israelemik;

³⁹ Davidiblo kinguvângit nikkanarsartitsomavakka tamânna pivlugo, soraijuitomigleungitok.

⁴⁰ Salomoble pijugakpa. Tagva Jerobeame parngnailerpok ᴋemâlunelo Egiptenemut, Sisakemut, Egiptenemiut ataninganut. Egiptenemêtuarporlo Salomob toᴋunga tikkilugo.

⁴¹ Unipᴋautsille tamakkoa asingit sulle Salomo pivlugo, pinniarlauktangit tamaita, ilisimaningalo, aglaksimavut Salomob pinniarningita aglangine.

⁴² Salomoblo atannioningata Jerusaleme Israelitit ilûnnamasianginut, nelliuninga jâriovut 40 git.

⁴³ Salomolo sinnisilerpok ailune atatagijaminut, illijartortaulunelo atâtame Davidib iglugasaksoangine. Erningalo Rehabeame innangêrlugo atanningorpok.