I Atannit 10 - Labrador Inuttitut Heritage Bible

Arabiamiut atanningata arnab nellipsaininganik Salomomik.

¹ Arabiamiullo ataningata arnab Salomonib tusaumajanga, Nâlekab atinga pitjutigillugo tusaramiuk, ᴋaivok oktoromavlugo nellaupsarutiksanut.

² Jerusalemullo tikkipok unuktunik najorteᴋarlune, Kamelinik, mingoarutiksanik pivianartunik, Goldeniglo unuktunik, ujarkaniglo pivianartunik, nangmartunik. Salomomullo tikkipok, oᴋarvigivalo tamainik omamigijaminik.

³ Salomoblo oᴋautiva tamainik apperᴋutigijanginik; sumiglonêt nellonartoᴋalaungilak atannermut, oᴋauserilungitanganik tapsomunga.

⁴ Arabiamiullo ataningat arnak takkogame Salomob illisimaninganik tamât, iglomiglo igloliorlauktanganik.

⁵ Nerᴋiksaniglo tapsoma nerrimarvianut illingajunik, kivgangitalo iglunginik, naipertutsiarninginiglo, annoranginiglo, imiksalliortoᴋotinginiglo, tunnergutinginiglo ôtaksanik tunnijanginik Nâlekab iglungane; tagva uimamajotun-îlerpok,

⁶ Oᴋarlunelo atannermut: Miksekârtôvok tusalauktara Nunaᴋotimne, illinganît ilisimanîllo pivlugik.

⁷ Okperijomalaungilaralo tikkiᴋârtinnanga, takkolugolo ijimnut. Ahâglo, ᴋoppanganiglonêt oᴋautsaulaungilanga, ilisimanelionersauvotit ajunginelionersaulutillo tusaumajamnit tusarlauktamnit.

⁸ Pilloridlarput inuᴋotitit, nangitsainartut sângne, tusarlutiglo ilisimanernik.

⁹ Nertortaule Nâlegak Gûdît, ingitilaungmatit Israelib iksivautanganut, Nâlekab Israelitit nagligingmagit soraijuitomik, tamânna pivlugo igvit atanningortilaukpâtit, namanermik idluarnermiglo sakᴋertitsiᴋovlutit.

¹⁰ Tapsomalo atannek tunnitsivigiva Goldemik Tallentinik 120 ginik, mingoarutiksaniglo tippitsiariktunik unuktovaksoarnik ujarganiglo pivianartunik. Mingoarutiksat taimâk unuktigijut Arabiamiut ataningata tunnilauktangititut atannermut Salomomut tikkiutjaujungnailaukput.

¹¹ Hiramiblo umiaksoakotinga Goldetortok Ofiremit, ᴋaitsivoktauk Ofiremit napârtunik Sandelemik atelingnik unuktunik, ujarganiglo pivianartunik.

¹² Atanniublo sanakojivok ᴋejungmit Sandelemik atelingmit kattagêkutingnik tigumiarvingnik Nâlekab iglungane atanniublo iglungane; Harfeniglo, noᴋakseralingniglo imgerpaktunut. ᴋejuillo Sandeleojut taimaitut tikkiutjaujungnailaukput, takkojaujungnailutiglo taimangat, uvlok tamânna tikkidlugo.

¹³ Atanniublo Salomob Arabiamut atanningat arnak tunnitsivigiva tamainik tussugijanganik tuksiararijanganiglo, tunnijane tapsomunga pijarellune tappilugit. Allârporlo aulârlunelo nunakotiminut kivgaᴋotine illagilugit.

¹⁴ Goldele tikkiutjaulauktok Salomomut jâreme atautseme Oᴋumainingat Talenteôlaukput 666 git.

¹⁵ Tamânnalo niuvertinit niuveriarniartunillo, inugasaksuillo (angerlauktut Salomomut) atanninginit, aulatsijunillo nunnane pijok, taijaukasiutinago.

¹⁶ Atannerlo Salomo sanaᴋojilaukpok, sappulutaksanik 200 dinik Goldemit nâmanerpâmit; Sekelititut 600 ditut Oᴋumaitigijut Golde attorpa sappulutaksamut atautsemut.

¹⁷ Sappulutaksaniglo angijunik, Tartschenik atelingnik, 200 dinik; Paunditullo pingasutut oᴋumaitigijok Golde attorpa Tartschemut atautsemut. Atanniublo pitipait igloksoarmut, napârtut Libanonemit igloksoanganik atelingmut.

¹⁸ Atannerlo iksivautaksoarmik sanavok Elefantib tôganginit, sillapârpâlo Goldemik pivianarnerpangôjomik.

¹⁹ Iksivautaksoarlo tamna, tungmerakalaukpok pingasujortunik, iksivautablo tunnuata ᴋollâ ᴋatigoliungalaukpok. Iksivavingatalo saniragik iglugêngnik egangaviᴋalaukpuk tallingnut, Loewingoaglo nangerlaukpuk egangavikita tungangne.

²⁰ Loewingoallo 12 it nangerlaukput tumerangne pingasojortune ittivigêngne. Taimaitomik sanamajoᴋalautsengilak atanniovît nelliane.

²¹ Atanniublo Salomob illulerkotingit immiksaᴋautit Goldiolaukput, illulerkutillo ilûnnaita Libanonib napârtungita iglunganêlauktut Goldetuinaulaukput; Silbere Salomonib nelliuningane sunaunasugijautsengimat.

²² Atannek umiaksoaᴋalaungmat immarbingme, Hiramib umiaksoakotinga aiparellugo Tarsisemut umiaktortok; atausêardlune jârine pingasune umiaksoak utterᴋattarpok, tikkiutjilunelo Goldemik, Silberemiglo Elefantillo tôganginik, pisuktuniglo itjuartunik, tingmianiglo Fauenik atelingnik.

²³ Taimâk atannek Salomo akluinersaulaukpok, ilisimanersaulauklunelo atannernit ilûnnainit nunamêtunit.

²⁴ Nunaggillo ilûnnatik tussudlarput Salomo takkojomavlugo, sillatuninga, Gûdib tunnilauktanga tapsoma omatinganut tusaromavlugo.

²⁵ Ilûnnatiglo âtsivigivât pilliutinik, perᴋutinik Silbereôjunik Goldeôjuniglo, annorangniglo, sakkuniglo tauvlukutiksaniglo, horseniglo, horseojartuniglo, jârine tamaine.

²⁶ Salomolo katersoivok ᴋamutingnik aksalloalingnik, sorsuktuksaniglo horsit ᴋângine ablangajunik, peᴋalaukporlo ᴋamutingnik aksalloalingnik 1,400 dinik, sorsuktuksaniglo ablangajunik horsit ᴋângine 12,000 dinik, ineᴋarᴋovaillo iglugasaksoarne aksalloalingnut illingajune, Jerusalemelo atanniub najugâne.

²⁷ Ataniublo Silberit taimâk unuktigijotipait Jerusaleme ujargatitut, Cederillo napârtutitut Sikomorinik ateᴋartutitut, naksarne perortutitut.

²⁸ Salomolo âtsiviomavok horsenik Egiptenemit, niuviaksaniglo sunatuinarnik, atanniublo niuverteᴋotingita niuviaksat tamakkoa pissiarivait,

²⁹ ᴋaitsivullo Egiptenemit, aksalloalingmik atautsimik Sekelinut 600 dinut Silberemik; horsemiglo atautsemik Sekelinut 150 ginut. Taimaglo âtaulaurivuttauk Hethiterit ataninginut, Siriamiullo ataninginut, taipkoa aggangittigut.