Imgerut 99 - Labrador Inuttitut Heritage Bible

Ivsornainek saimarveᴋernerlo Nâlekab nâlegauvinganêpuk.

¹ Nalegak attanniôvok, tamanna pivlugo innuᴋattigêksuit sajukput; iksivavok Kêrubit ᴋângine, tamanna pivlugo sillaksoak aulavok.

² Nâlegak angijôvok Zioneme, ᴋotsingnerpângôvok innuᴋattigêksoarnit tamainit.

³ Attit angijok sivuranartorlo nakorijaule, ivsornaitôjok;

⁴ Attanniublo pitsartuninga, idluarnermik nagligosuktub. Illusitsiaᴋarnek aulajuitipat; idluarnermik idluarsainermiglo peᴋartitsivotit Jakokune.

⁵ Nâlegak Gûdivut angijorortissiuk, opigosugitse ittiggangita ikovrangane; ivsornaimat.

⁶ Mose Aronelo ajochertuijungita akkorngane, Samuelelo taipkoa akkorngane attinganut niplialauktut; Nâlekamut niplialaukput, tâpsomalo tussarpait.

⁷ Oᴋarᴋattigivait nappajome nuvujaujome; kigligiutsiningit perᴋojangillo tunnijangit tâpkonunga nâlakpait.

⁸ Nâlegak Gûdivut tussalaukpâttit; Gudeôlaukpotit tâpkonunga issumagijungnainiktok, akkiniartelo pinniarninginnik.

⁹ Nâlegak Gûdivut angijorortissiuk, opigosugitselo ᴋaᴋᴋangane ivsornaitome; Nâlegak Gûdivut ivsornaimat.