Imgerut 98 - Labrador Inuttitut Heritage Bible

Kajungersainek Nâlegak nertorlugo, nuname illûnâne nâlegauvingminik âᴋiksoijok.

Imgerut.

¹ Imgerusertamik Nâlegak imgervigissiuk, tâmna tattamnartullingmat. Sâlaᴋarpok tallerpingminut, tallerminullo ivsornaitomut.

² Nâlekab piuliklernine oᴋautigijauᴋovâ; innuᴋattigêksuit sânginne idluarnine nallonairpâ.

³ Saimarveᴋarnine, mikseᴋârninelo erᴋarpak Israelib iglunga pitjutigellugo. Sillaksub issungita tamaita Gûdipta piuliklerninga takᴋovât.

⁴ Sillaksoarmiojose illûnase Nâlegak igiaᴋomijarvigissiuk; imgeritse, nakorsarluselo, nertordlerluselo!

⁵ Nâlegak nertorsiuk, nertorsiuk Harfinnut, Harfit Psalterillo nippinginut.

⁶ Trompetit tiptulautillo nippinginut; igiaᴋomijaritse Nâlekab attanniub sângane.

⁷ Immarbik iktullijârle tâpsomanêtullo; nuna inneᴋartullo tâpsoma ᴋângane.

⁸ Imaksuit ingerganingit erᴋiêrtorlît; ᴋakᴋat ᴋuviasuglît ilunamasiatik.

⁹ Nâlekab sângane, aggermat nunaksoak erᴋartoromavlugo. Tâpsoma sillaksoak erᴋartoromârpâ idluarnermut, innuᴋattigêksuillo namanermut.