Imgerut 97 - Labrador Inuttitut Heritage Bible

Nâlekab ajugaᴋangitub nâlegauvinga.

¹ Nalegak attanniovok, nunaksub tamanna ᴋuviasutigiliuk ᴋikkertallo unnurningit tamaita serrilerlît.

² Nuvujat, târniublo illumavât idluarnerlo idluarsainerlo iksivautavît aulajuijutigivak.

³ Ikkomab sivurlerivâ ikkitsilunelo avatâne ômigijinginik.

⁴ ᴋaumalakutingita nunaksoak ᴋaumarpât; nuna takkovok tamattominga ᴋoaksârlunelo.

⁵ ᴋakᴋat auksilerput igupsaujârtut orksungita tangititut, Nâlekab sângane, nunab illunât attannertangata sângane.

⁶ ᴋillait idluarninga oᴋautigivât, inuᴋattigêksuillo illûnatik opinarninga takᴋovât.

⁷ Kangusugariaᴋarput illûnatik adsingoanik kivgartortut, Gûdingoaniglo nertuteᴋartut. Gûdiojose illûnase tâmna tuksiarvigissiuk!

⁸ Zione tussarpok tamattominga, ᴋuviasuklunelo; Judablo panningit serridlarput Nâlegak attanniotinît pitjutigellugo.

⁹ Igvit Nâlegak ᴋotsingnerpângôgavit nunanit tamainit, angijororsimanerpauvotit Gûdinnit tamainit.

¹⁰ Nâlekamik naglingniktose, idluinek ômigissiuk! Tâpsoma ivsornaiᴋotime tarningit udsertorpait; Gûdeᴋangitub agganginnit piulijomârpait.

¹¹ Idluartok nuiviotsainariaᴋarivok ᴋaumajomut ᴋuviasungnermullo ômattit idluitailijut.

¹² Idluartose Nâlegak ᴋuviasutigissiuk, ᴋujaliluselo, ivsornainingalo nakorissiuk.