Imgerut 96 - Labrador Inuttitut Heritage Bible

ᴋaiblainek Nâlegak nertorlugo, angininga, nâlegauvinga, idluarsainingalo pivlugit.

¹ Imgerusertamik Nâlegak imgervigissiuk; sillaksoarmiut illûnatik imgervigilitsuk.

² Nâlegak imgervigissiuk, attingalo nertorlugo pititse; uvlormit uvlormut piuliklerninga oᴋâlautigissiuk.

³ Nallojut akkorngane opinarninga unipkautigissiuk; innuᴋattigêksuit illûnatik akkorngane tattamnartulliningit.

⁴ Nâlegak angijôngmat, angijomiglo nertortaujuksauvok; sivuranarnersauvlune Gûdinnit tamainit.

⁵ Innuᴋattigêksuit Gûdingit Gûdingoangôvut; Nâlekable ᴋillak sannalaukpâ.

⁶ Pinnarnarnek, ânanaunerlo tâpsoma kênangata sânganêpuk, sôngonerlo innerᴋonadlarnerlo ivsornaitoveᴋotinganêpuk.

⁷ Nâlegak ᴋaitsivigissiuk, ᴋittorngarêktose innuᴋattigêksoarne, Nâlegak ᴋaitsivigissiuk opigijaunermik, pitsartunermiglo.

⁸ Nâlegak ᴋaitsivigissiuk attingata opigijauninganik; pilliutinik ᴋaitsileritse tikkiluselo iglorusinginnut!

⁹ Nâlegak tuksiarvigissiuk ivsornainerub pinnarnarsiningane; sillaksoarmiut illûnatik sivuragilitsuk.

¹⁰ Nallojut akkorngane oᴋaritse: Nâlegak attanniôvok; tamana pivlugo nuna pallangilak aularanelo. Tâpsoma inuᴋattigêksuit idluarsarpait namaktomik.

¹¹ ᴋillak ᴋuviasugit, nunalo serrilerit; imarbik tâpsomanêtullo iktullijârlit.

¹² Perorsêvît, tamaitalo tâpᴋonanêtut erᴋiêrtorlît; nappârtullo nappârtungit illûnatik nertorlît!

¹³ Nâlekab sângane, aggermat, aggermat nunaksoak erᴋartoromavlugo. Tâpsoma sillaksoak erᴋartoromârpâ idluarnermut, innuᴋattigêksuillo mikseᴋârnerminut.