Imgerut 94 - Labrador Inuttitut Heritage Bible

Tuksiarnek okpertut ômigijingit akkerartortauᴋovlugit.

¹ Nalegak Gûde, akkiniarnermik pilik, Gûde akkiniarnermik pilik, sakᴋijârittôk.

² Nikkovilerit idluarsaijôjotit sillaksoarmiunik; piojorijut akkiniarkit pijuksauningit malliklugit.

³ ᴋannok sivitutigijomik Gûdeᴋangitut, Nâlegak, ᴋannok sivitutigijomik oᴋâlagallaktuksauvât?

⁴ Oᴋauseᴋartuksaulutiglo ᴋeppêsertunnik, idluitullijullo illûnatik nertotijuksauvât?

⁵ Nâlegak inugasaksoaᴋotitit annaulerlugit serᴋomipait, kingormgutijâllo oᴋumaiksartipait.

⁶ Uigarnerit, tujormijallo naktertipait, illiarsuillo toᴋᴋopait.

⁷ Oᴋarlutiglo: Nâlekab takkolungilâ, Jakoblo Gûdingata kamagingilâ.

⁸ Illissimaitose Inuit akkorngane mallugosuleritsetôk; sillaitoselo, ᴋanga sillatuleromavisê?

⁹ Siutemik illijilauktok, tâmna tussarungnarajangilâk? ijimik sannalauktok, tâmna tautugajangilâk?

¹⁰ Nallojunik sugiarte, tâmna pitlarnigajangilâk? Innungnik ajochertuije ᴋaujimajanginnik.

¹¹ Nâlekab Inuit issumangit ᴋaujimavait sunautsangimatta.

¹² Pillorikpok tâmna, igvit Nâlegak sugiartat, ajochertortallo malligaksauᴋojarnut;

¹³ ᴋennuêrsarᴋovlugo idluitullivioneᴋarangat Gûdeᴋangitok âᴋiksimavioᴋârtinago ittersâlungmik.

¹⁴ Nâlekab innugasaksoaᴋotine ajaktorniangimagit, ᴋemangniatsanagillônêt kingormgutijane.

¹⁵ Idluarnek idluarniotsainariaᴋarmat; ômattillo idluitailijut illûnatik tamana ungagilerniarpât.

¹⁶ Kia illilertorpânga kassêtut akkerartorlugit? kia ablorvigivânga idluitullijut akkerartorlugit?

¹⁷ Nâlekab ikajorajangipanga, tarniga nallanajarmarikpok tussarviᴋangitome.

¹⁸ Oᴋalaukpunga: Ittigakka akpalektulaukput, saimarveᴋarnivîlle Nâlegak najumilaukpânga.

¹⁹ Issumajârneᴋalaukpunga unnuktunnik ômattimne; manigoinivîlle tarniga erᴋiêrtortilaukpât.

²⁰ Iksivautak ᴋanoênartok angerᴋattigijungnarniatsangilat, ᴋanoêtoᴋartitsijok illusitsiaᴋartuksauningane.

²¹ Kippalilutik kattimalerput idluartub tarninga akkerartoromavlugo, auglo passijaksaungitok passijaksaunerarpât.

²² Nâlegarle sappulutijigivara, Gûdiga sungertuteᴋarnima ᴋairtorivâ.

²³ Tâpsomalo namangitulliningit akkiniarutigijomârpait tâpkoninga, kassêninginnullo nungutsomârpait; Nâlekab Gûdipta nungutsomârpait.