Imgerut 90 - Labrador Inuttitut Heritage Bible

Inuit inôsingita sujusarainingit.

Môsesib Gûdib anguteᴋotingata tuksiarninga.

¹ Nalegak igvit uneksiorviksaritsainarpagit issoᴋangitomut. ᴋakᴋat pilerᴋârtinagit, nunalo sillaksoarlo pingortitauᴋârtinagik, igvit Gûde îpotit issoᴋangitomit issoᴋangitomut.

² Innungnik sanningortitsijotit, oᴋarlutillo: Utteritse inuit ᴋittorngangit.

³ Jârit tausendit sângne îmatta uvloktut ikpaksak annigulauktotut, unnuablo pigârvingatut attautsetut.

⁴ Sâptautipattit sorlo, siniktut îput; uvlârme nuilerput iviksukatitut;

⁵ Uvlâkut nuvugolâᴋartutitut, tungojoksijutitullo, unnuarmelo nakkartaujutitut, ᴋunnulertutitullo.

⁶ Ningarnît pitjutauvok taimak nungusarainapta, ᴋaningajârnîllo, taimak tagvainak nûtaujariaᴋarapta.

⁷ Idluitullinivut pitipâttit sângnut; ajornivut illitaringitavut kênarpit ᴋaumaninganut.

⁸ Uvluvut tamaita nungulermatta ningarnît pivlugo. Jârivut nâvavut oᴋâlagallânektitut.

⁹ Inôsivut Jârititut 70 tut sivitutigijôvut, unnuktôkpattalo Jârititut 80 tut; ânanautsialaukpattalo, tagva siorniorneliolaukput, sullijaksaᴋarneliolutiglo. Anigorsaraidlarmatta tinginajaraptatut sorlo.

¹⁰ Kialo ningarnivît pitsartuninga illitarivaûk? kialo ᴋaningajârnît taimaitok namaktomik sivôragivaûk?

¹¹ Tagva ajochertortigut issumaksarsiornermik toᴋᴋojuksauniptingnik, sillatulerᴋovluta.

¹² Uttilaurittôk Nâlegak! ᴋannok sivitutigijomik? Kivgaᴋotitit illapsugikit!

¹³ Uvlarârsukut namaksititigut saimarveᴋarnernik, nakorsarungnarᴋovluta ᴋuviasugungnarᴋovlutalo inôtsivut nâlugit.

¹⁴ ᴋuviasuktilaungmittigut, taimak akkunêrtigijomik oᴋumaiksartilauᴋârluta, taimak akkunêrtigijomik ᴋannoêtomik takkolauᴋârluta.

¹⁵ Pinniarnitit takᴋojautikit kivgarnut, opinarnillo ᴋittornganginnut.

¹⁶ Nâlekablo Gûdipta illanâᴋarningata ᴋollangiarlitigut; aggaptalo pinniarningit igvit sullitilaukittôk!