Imgerut 9 - Labrador Inuttitut Heritage Bible

Davidib imgerutâ ᴋujalinelik piulijaunek ômisuktunit pivlugo, tuksiarnerlo ikajortauganeromavlune.

Davidib imgerutâ innuosuktunnut imgertauᴋovlugo.

¹ Nalegak ᴋujagijomavara ômamut illunânut, tattamnartullinitillo tamaita unipkauserilugit.

² ᴋuviasugomavunga serrijomavlungalo illingne, attillo nertorlugo imgerutigijomavara ᴋotsingnerpângôjotit.

³ Omigijikka ungomalaurangne, ochosimavut asserorsimalutiglo sângne.

⁴ Igvit idluarnera illiorneralo âᴋiksorangne; igvit iksivavotit iksivautame, erᴋartuijôvlutit idluartok.

⁵ Nallojut suarpâttit, Gudeᴋangitullo toᴋᴋopâttit; attingit nungupattit issoᴋangitomut.

⁶ Omisuktut saviksoangit nungusimavut; iglugasaksuit pussitilaukpâttit; erᴋaumajauninget nungutaumavok, tapᴋoa illagilugit.

⁷ Nâlegak issoᴋangitomut îtsainarpok, iksivautane âᴋikpa erᴋartuijomavlune;

⁸ Tâpsomalo nunamiut erᴋartoromârpait idluartomik, innuillo aulatitsomârpait namaktomik.

⁹ Nâlegarlo sappulutauvok aklujunnut, sappulutak nangiarnartomê.

¹⁰ Taimaimât tattigivâtit atternik illitarksijut; igvit ᴋemalunginangne illingnik Nâlegak ᴋennertut.

¹¹ Nâlegak nertorsiuk, Zionemê inneᴋartok; pinniarningit oᴋautigissigik innuᴋattigêksuit akkorngane!

¹² Tâpsoma tapᴋoa aungit erᴋaromangmagit apperᴋutigilaitalo; aklujut niplianingit puigorlungilait.

¹³ Nâlegak nâpkigilaunga, ânianikka ômigijimnut takkonârkit, ᴋagvertitsijotit uvamnik toᴋᴋub itterviksoanginnit.

¹⁴ Unipᴋârᴋovlunga nertornarnernik tamât Zionib panniata itterviksoanginne, ᴋuviasorᴋovlunga ikajornît pivlugo.

¹⁵ Nallojut kivisimavut ittersame sannalauktamingne; ittiggangit pijauvut nullutjannut ningitilauktamingnut.

¹⁶ Nâlegak illitarijauvok, idluarnermik sakᴋêmat. Gûdeᴋangitok illakutjauvok aggame pinniarninginnut. Higgajon, Sêla.

¹⁷ Gûdeᴋangitut kappianartovingmut torârtitaujuksauvut, nallojullo tamaita Gûdemik puigortut.

¹⁸ Tâpsoma aklujok puigormaringniangimago, pattangajullo neriungninget assioniangilak issoᴋangitomut.

¹⁹ Nâlegak makkitit, Inuit attanniolerᴋonagit; nallojut illunaita erᴋartortaulît sângne.

²⁰ Nâlegak ᴋoaᴋsârtikit, nallojut illitarksilerᴋovlugit innôgamik. Sêla.