Imgerut 89 - Labrador Inuttitut Heritage Bible

Nallautainek Messiasemik nâlegauvinganiglo.

Etanib Esrahiteôjub illisaininga.

¹ Nalekab saimarvêᴋarninga imgervigijomavara issoᴋangitomut, mikseᴋârningalo, ᴋannimnut oᴋautigijomavara soraijunanga.

² Oᴋarama: Saimaveᴋarnek soᴋᴋosijuitsomârpok issoᴋangitomut, ᴋillangmelo mikseᴋârnît aulajuitiniarpet.

³ Anerijara angerᴋattigilaukpara; Davide kivgara angermarilaukpara:

⁴ Issoᴋangitomut kinguvâksatit naᴋᴋiteromavakka, iksivautaᴋotillo aulajuititsomatsainarpara, Sêla.

⁵ Killaillo Nâlegak tattamnartullinitit nertoromârpait, mikseᴋârnîllo ivsornaitut illagêngninginne.

⁶ Kiale nuvujanne Nâlegak adsigivaûk? kinalo Nâlegaktun itsungnarᴋa Gûdit ᴋittorngangita akkorngane?

⁷ Gûde sivôranadlarpok ivsornaitut kattimaniksangine, opinadlarlunelo illunainut illumajiminut.

⁸ Nâlegak Gûde Zebaot, kina illiktut Gûdeôva ajugaᴋangitok? mikseᴋârnîllo avatiptingnêpok.

⁹ Igvit attaniotivotit imarbingmut aulajadlartomut; igvit mallingit saimarpâttit makkitalerangata.

¹⁰ Igvit Rahabe serᴋalivat annaulertaumavlutik toᴋᴋotaumajutitut; igvit ômigijitit siamartipâttit tallernut sôngojomut.

¹¹ ᴋillaklo nunalo perᴋotigivakik; igvit nuna tunganektâlaukpat, tâpsomanêtullo.

¹² Tachâ seᴋᴋerngalo pingortilaukpakik; Tabor Hermonelo igiaᴋomijarpuk atterne;

¹³ Talleᴋarpotit sangijoksosoarmik; aggaktit pitsartovut, tallerpîllo poktovok.

¹⁴ Idluarnerub idluarsainerublo iksivautat aulajuitipâk; saimaveᴋarnek mikseᴋârnerlo kênavît sânganêpuk.

¹⁵ Pillorikput innuᴋattigêksuit igiaᴋomijarungnartut. Nâlegak, arvertarniarput kênavit ᴋaumaningane.

¹⁶ Kaut tamât attit pivlugo ᴋuviasugomârput, ᴋagveromârlutiglo idluarnerne.

¹⁷ Igvit pitsartuningata nertornarutigingmattit, saimaveᴋarnernullo naksuvut ᴋongmuartiniarpet.

¹⁸ Nâlegak sappulutarigaptigo, Hailigeôjorlo Israeleme attannerivavut.

¹⁹ Taipsomane takkotitjutikut oᴋalaukpotit ivsornaitoᴋotingnut oᴋalutillo: Ikajornermik pititsilaukpunga sôngojomut; annerimajok angijorortipara inugasaksoarnit.

²⁰ Kivgara Davide nachvârsimavara; mingoalaukpara orksoᴋotimnut ivsornaitomut.

²¹ Aggakka soᴋᴋosijuilutik tâpsomanêtuksauvut tallermalo pitsartutitaksarivâ.

²² Omisuktib tattijaksaringilâ, idluitublo noᴋartitaksaringilâ.

²³ Uvangale akkerartortingit annauleromavakka sivurngane; ômigijingillo oᴋumaiksartitsomavakka,

²⁴ Mikseᴋârnimalo, saimaviᴋarnimalo illagijaksarivâk; naksungalo attimne ᴋongmuartitaujuksauvok.

²⁵ Aggangit pititsomavakka imarbingmut, tallerpingalo kôksoarnut.

²⁶ Tâpsoma taijomârpânga: Igvit atâtagivagit, Gûdigilutillo, piulijaunimalo ᴋairtorivâtit.

²⁷ Uvangalo erniangoᴋârtungortitsomavara, anginersauvlune attannernit nunamêtunnit.

²⁸ Saimarvêᴋarnera tâpsominga soᴋᴋosijuitsainarᴋojomavara issoᴋangitomut, angerneralo aulajuitsainartuksauvok tâpsomunga.

²⁹ Kinguvângit soraijuititsomavakka issoᴋangitomut, iksivautangalo, ᴋillaᴋarningane.

³⁰ ᴋittorngangita, malligaksauᴋojakka ᴋemagalloarpagit, idluarnerijakkalo malliklugit arvertarlungipatta;

³¹ Illusioᴋojakka ivsornaijungnaitipagit, perᴋojakkalo mallilungipapit:

³² Tagva ajorningit nallipsaromavakᴋa issaᴋaumut, idluitulliningillo sugiarnermut.

³³ Saimarveᴋarnerale allartitsomangilara tâpsomangat, mikseᴋârnimniglo peᴋartailiᴋojomangilara.

³⁴ Angersimanera ivsornaijungnaititsomangilara, ᴋannimnillo annisimajut soᴋᴋoseromalungilakka.

³⁵ Sukkutsiane oᴋamarilaukpunga ivsornainera malliklugo: Davide sagloᴋitsomangilara;

³⁶ Kinguvâksanga issoᴋangituksauvok, iksivautangalo sâmne seᴋᴋinertut îtuksauvok;

³⁷ Takᴋertut soraijuituksauvok; sorlolo kigligiudsijok nuvujanne nallonangitôjuksauvok, Sêla.

³⁸ Mannale mingoalauktat ajaktorpat, egilugolo ningarivat.

³⁹ Kivgavît angervioninga attornarungnaitipat, niaᴋotingalo, ivsornaijungnaitilaukpat eginermut nunamut.

⁴⁰ Avalungit ujaraggit illunaita serᴋomipattit, igloksoangillo sôngojut serᴋomakungortipattit.

⁴¹ Sennerᴋotut illûnatik arktaivigivât, mittautiksangorpok sillalerminut.

⁴² Akkerartortingita tallerpingit ᴋongmuartipattit, ômigijingit illûnaita ᴋuviasuktipâttit.

⁴³ Saviksoangata kênanga ipkêtilaukpat najumitaililugolo sorsungnerme.

⁴⁴ Ivsornaininga sujukpat, iksivautangalo ochotipat nunamut.

⁴⁵ Inuosungningata uvlungit sivikitipâttit, ulliklugolo mittautaunermik, Sêla.

⁴⁶ Nâlegak ᴋannok akkunêrtigijomik ijeromamariᴋît taimak, ᴋaningajârnîllo ikkomatut ikkoalaᴋojomaviûk?

⁴⁷ Erᴋaigit inôtsima nalliuningata sunauninganik; ᴋannok erᴋanangitigijomik Inuit ᴋittorngangit illunaita pingortilaurangne.

⁴⁸ Nanêtoᴋarka innôjomik, toᴋᴋomiglo takkoniangitomik? tarniminik piulijomik kappianartoviub agganginnit? Sêla.

⁴⁹ Nâlegak saimarviᴋarnerilauktat sivurnganitak, angernerimarilauktat Davidemut mikseᴋârnerne, nanêᴋâ?

⁵⁰ Erᴋaigit Nâlegak kivgavit mamailisartauninginik, akjartamnik sâmne inuᴋattigêksoarnit unnuktunnit,

⁵¹ Omigijivît Nâlegak mamailisaijutigijanginnik, mamailisaijutigijanginik mingoarlauktavit tuminginnik.

⁵² Nâlegak nertortaule issoᴋangitomut, Amen, Amen.