Imgerut 88 - Labrador Inuttitut Heritage Bible

Tuksiarnek, tukkisiveᴋartune oᴋumaitomik.

Kôrab ᴋittorngangita imgerutingat imgerutigilugo, nelleᴋârlutik Machalatemut. Hemanib Esrahiteôjub illisaininga.

¹ Nalegak Gûde; piulijiga, nipliadlarpunga sângne, uvlotillugo unnuamelo:

² Tuksiarnera sângnut tikkilerle, siut manniuk nipliadlarnimnut.

³ Tarniga tattamat kappianarnermik, innôseralo ᴋannidlarpok kappianartovingmut.

⁴ Taipᴋotitunak înasugijauvunga ittersamut ijuᴋartutitut; angutitut îpunga nukkeᴋangitotut.

⁵ Nallavunga ᴋemaktauvlungalo toᴋᴋungajut akkorngane, annaulertauvlutik toᴋᴋotaumajutitut, illuverme nallajutitut erᴋaumajungnaitaktut, aggangnillo avisimajutitut.

⁶ Ittersamut atsingnerpâmut illilaukparma, tâktomut ittinermullo.

⁷ ᴋaningajârnivît nênerpânga, tattivarmalo ullinernut tamainut.

⁸ Illannârijakka ungasiktilaukpâttit uvamnit, ᴋuinangnartungortilaukparma tâpkonunga. Parngnanairsortauvlunga nallavunga annijungnangilangalo.

⁹ Tautuga ogguarnarpok ajulernermut. Nâlegak uvlut tamaita nipliavigidlarpagit, aggakkalo issakpakka illingnut.

¹⁰ Toᴋᴋungajunnele tattamnartulliniarᴋît? ubvalo inôjungnaitut makkiniarᴋât ᴋujalivigilutillo? Sêla.

¹¹ Illuverne pitsiarnît unipkautigijauniarᴋâ, nertornarnîllo asserornartovingme?

¹² Tattamnartullinitit illitarijauniarᴋât tâktome idluarnîllonêt puigornerub nunangane?

¹³ Uvangale nipliadlarpunga illingnut Nâlegak, tuksiarnimalo uvlarârsukut sângerpâtit.

¹⁴ Nâlegak, sôg tarniga egipiûk, kênaillo ijerpiûk uvamnit?

¹⁵ Ajulerpunga nukkingêrotilungalo taimak ajâktortaumagama; ᴋoksanarnît attorpara mungomariklungalo.

¹⁶ ᴋaningajârnivît ᴋângagôrvigivânga, ᴋoksanarnivît nungupânga.

¹⁷ Uvlut tamaita illumavânga immektut, illagêklutiglo avatimnôrput.

¹⁸ Illanârijakka, illakkalo ungasiktilaukpâttit uvamnit; ᴋaujimajikka tâktomêput.