Imgerut 86 - Labrador Inuttitut Heritage Bible

Tuksiarnek siorniornerme.

Dâvidib tuksiarninga.

¹ Nalegak siut manilauruk, tussalungalo, pattangagama aklulungalo.

² Tarniga sapputiuk ivsornainama. Igvit Gûdîk kivgaᴋotit ikajolauruk, illingnik sungertuteᴋartok.

³ Nâlegak saimarviginga; uvlut tamaita nipliavigigapkit.

⁴ Kivgavît tarninga ᴋuviasuktilauruk; igvit Nâlegak ᴋajungervigigapkit.

⁵ Igvit Nâlegak ajunginavit illanaksârlutillo; saimarveᴋarlutit angijomik, illûnainut nipliavigijingnut.

⁶ Tussalauruk tuksiarnera Nâlegak, ᴋennunermalo nippinga kamagilauruk.

⁷ Siorniornima uvlungane nipliavigivagit; igvit tussaramga.

⁸ Nâlegak illiktut-assiᴋangilak Gûdit akkorngane, pittaᴋangilarlo illiktut piniarungnartomik.

⁹ Nallojut illunatik pingortilauktattit tikkitsomârput, tuksiaromârlutiglo sângne Nâlegak, attîllo opigilugo;

¹⁰ Angijoksôgavit taimak tattamnartullilutillo, Gûdeojotôgavillo.

¹¹ Unertutilaunga Nâlegak apᴋosinernik, agvertarᴋovlunga mikseᴋârnerne; ômattiga pituarijamêtitsainaruk atternik sivuraᴋovlunga.

¹² ᴋujagivagit Nâlegak Gûdiga, ômamut tamânut, attîllo opigivara issoᴋangitomut,

¹³ Pitsiarnît angidlarmat uvamnut, tarnigalo piulilaukpat kappianartovingmit ittijomit.

¹⁴ Gûde piojorijut akkerartorpânga, attanniâluillo unnurningita tarniga unangmivât, illingniglo peᴋangilat ijimik sânginê.

¹⁵ Igville Nâlegak Gûd, nâpkigosukpotit, saimarvekarosuklutillo, ᴋennuêlutillo takopsoajoksôlutillo nertornartoksôlarpillo.

¹⁶ Sâviginga, saimarvigilungalo; pitsartunît tunnilauruk kivgaᴋotingnut, ikajorlugolo kivgavît arnab erninga.

¹⁷ Nallonailiviginga, ᴋanoêngitsiarᴋovlunga, takkuksauᴋovlugo ômigijimnut, kangusugariaᴋarᴋovlugillo, igvit illilertoramga Nâlegak, manigoramgalo.