Imgerut 85 - Labrador Inuttitut Heritage Bible

Tuksiarnek saimavionek nutângortitauᴋojomavlugo.

Kôrab ᴋittorngangita imgerutât imgerutigilugo.

¹ Nalegak nunaᴋotit saimarvigilaukpet, parngnanairsortaumajullo Jakokut piulilaukpâttit.

² Inuᴋotitit issumagijungnaivigilaukpâttit idluitullinermit, ajorningillo illûnaita ullilaukpâttit, Sêla;

³ ᴋaningajârnît tamât sorailaukpat, allarlutillo ningarnivit aumauninganit;

⁴ Mannigortigut, Gûde, piulijivut, saimarveᴋajuinerlo uvaptingnik ipperaruk.

⁵ Issoᴋangitomut ningarijomavittigût, ningarnîllo soraijuerᴋojomaviûk?

⁶ Nakkoksititsomanginivitigût, inuᴋotitit ᴋuviasugungnarᴋovlugit pivlutit?

⁷ Nâlegak saimarveᴋarnît saᴋᴋijârle uvaptingnut, tunnitsivigilutalo piuliklernernik.

⁸ Tussaromavunga Gûdib Nâlekab oᴋauserijanganik; innuᴋotine ivsornaitoveᴋotinelo ullapirsaumik angervigingmagit, amalo sillainartomut illingajuksaungilat.

⁹ Ila ikajorninga ᴋannipok sivôrajunnut tâpsominga; nunaptingne opinarneᴋarᴋovlugo;

¹⁰ Pitsiarnek nertornarnerlo pârtigêᴋovlugik, idluarnerlo ullapirsaullo kunniktigêᴋovlugik;

¹¹ Mikseᴋârnek nuilerᴋovlugo nunamit, idluarnerlo takkosarᴋovlugo ᴋillangmit.

¹² Ilâ Nâlekab ajungitomik tunnitsiviginiarpâtigut; tagva nunavut tunijiniarpok perortuminik.

¹³ Idluarnek arvertarniarpok tâpsoma kênangata sângane, tutininelo pitiniarpait apᴋosinermut.