Imgerut 84 - Labrador Inuttitut Heritage Bible

Gûdib iglungata ᴋuvianarningit.

Kôrab ᴋittorngangita imgerutingat noakseralingnut imgerutigilugo.

¹ ᴋannok iglotit ânanauvaksôvut Nâlegak Zebaot!

² Tarnima Nâlekab iglorusingit tussugivait, kêmitigvigilugillo; timimalo tarnimalo Gûde ômatsainartok igiaᴋomijarvigivâk.

³ Tingmiabtauk iglo nachvârpâ, tullugarnaublo uvloᴋarvine ivavigijane piarᴋaminik; Altareᴋotitit Nâlegak Zêbaot, attanerijara Gûdigalo.

⁴ Pillorikput iglungne igloᴋartut, tâpkoa nertutsainarpâtit, Sela.

⁵ Pillorikput inuit pitsartuneartut illingnik; tâpkoa ômattingine apᴋosineᴋarpok sannamatsiartunnik.

⁶ Naksakôrtut ᴋugvinelikut, puailaveᴋartipât unnuktunnik; sillalungnerublo okkiaksanitab pitsornartipâ.

⁷ Arvertarput pitsartunermit pitsartunermut, illûnatik attunît saᴋᴋerᴋâratik Gûbib sângane Zioneme.

⁸ Nâlegak Gûde Zêbaot, tuksiarnera tussaruk; timeroleruk Jakob Gûdinga, Sêla.

⁹ Gûde sappulutarijavut, takkosarittôk; mingoartavît kênanga takkonâlauruk.

¹⁰ Uvlok attausek iglorosingnêdlune namanersaungmat uvlunnit assinginit tausendinnit. Upkuamik udsertorteôjomangârpunga. Gûdima iglungane, akkunît inneᴋarnermit Gûdeᴋangitut iglunginne.

¹¹ Gûde Nâlegak seᴋᴋiniôngmat, sappulutaungmallo; Nâlegak saimarveᴋarnermik, nertornarnermiglo tunnijivok; idluitailijut ajoksarᴋoniangilait ajungitomik.

¹² Nâlegak Zêbaot, pillorikpok innuk sungertuteᴋartok illingnik.