Imgerut 83 - Labrador Inuttitut Heritage Bible

Tuksiarnek ikajortaujomamut ômisuktut akkerartorungnarlugit.

Assafib imgerutâ.

¹ Gude nippangerniarnaktôk, niplingitaililutillo taimak; Gûde inilanganiarnak taimak.

² Ahâgle ômigijitit perajaludlarmatta, illuluktullo illingnik niaᴋotik ᴋagverpait.

³ Pingitsertortunik ᴋajusimaneliorput innuᴋotitit akkerartorlugit, ᴋachimioᴋattigêlutiglo ijersimajâttit akkerartorlugit.

⁴ Attê oᴋarput, nungulavut innuᴋattigêksoangojungnaiᴋovlugit, Israelib attinga erᴋaumajaujungnaiᴋovlugo.

⁵ Ila issumaᴋarᴋattigêkput angerᴋattigêngneᴋartitsilutigo akkerartorlutit.

⁶ Edomiterit iglungit, Ismaeliterillo, Moabiterillo Hagariterillo.

⁷ Gebaliterit, Amoniterit, Amalekiterillo, Filisterit Tirusemiut illagilugit;

⁸ Assiriamiut illauvuttauk tâpkonunga, ikajorlutiglo Lotib ᴋittornganginnik, Sêla.

⁹ Pinniarvigikit Midianiterititut, Siseratut, Jabinetut kôngme Kisoneme.

¹⁰ Nungutaulauktut Endoreme allorlungorlutiglo nuname.

¹¹ Attaningit Orebetut Seebetullo îtikit, angajoᴋângit illûnaita Sebatut, Zalmunatullo.

¹² Oᴋartut: Gûdib iglungit aksârnigarijomavavut.

¹³ Gûde ullajujaktut itikit, ivît kippangititut annordlerpât.

¹⁴ Sorlo ikkomab nappârtut ikkingmagit, sorlolo ikkoalanerub ᴋaᴋᴋat ikkingmagit;

¹⁵ Taimak unangmikit sillarnerluᴋotingnut, ᴋoaᴋsârtilugillo aᴋᴋonaksoaᴋotingnut.

¹⁶ Kênangit kangusungneᴋartikit illûnâne, attît apperᴋutigilugo pijuksauᴋovlugit, Nâlegak!

¹⁷ Kangusuktuksauvut, ᴋoaᴋsâtsainartuksaulutiglo kangusuktitaujuksaularmiglo, nungujuksaulutiglo.

¹⁸ Tagva illitarksiniarput, igvit attikkut atserartaumagavit Nâlegaujotôjomik, ᴋotsingnerpâmiglo, sillaksoarme illûnane.