Imgerut 81 - Labrador Inuttitut Heritage Bible

ᴋaiblainek uvloksiorvît uvloksiorutigillugit Gûdelo nâleklugo.

Assafib imgerutâ noᴋakseralingnut imgerutigilugo.

¹ ᴋuviasukluse Gûde pitsartutigijavut imgervigissiuk; Jakob Gûdinga igiaᴋomijarvigissiuk.

² Tuksiarutsit pigiarsigik, ᴋillautillo ᴋailersigik, Harfit tussarnertut, Psalterillo illagellugit.

³ Takkêlame tiptulausijaritse: taᴋᴋiub angmaloriksiningane, uvloksiorvipta uvlungane.

⁴ Taimaitomik illuseᴋarmat Israeleme, perᴋojangôlunelo Jakob Gûdinganit.

⁵ Taimaitomik pititsilaukpok Josefekut akkorngannut kigligiudsinermut, aulalaurame Egiptenib nunanga akkerartorlugo, oᴋautsinik tussarngârtanik tussalauktilluta.

⁶ Tuingit erksugakaêrutilaukpakka; aggangillo ukkusingêrutitaulaukput.

⁷ Kappiasungnerne nipliavigilauramga tagva iᴋajulaukpagit; tussalaukpagit sillarnerlungme, ôktulaukpagillo Meribab imingane, Sêla.

⁸ Okokse innuᴋotikka, akᴋonapsingne kigligiudsijomavunga; Israelitiôjose ᴋanoktôk nâleksinga!

⁹ Akᴋonapsingne Gûdeᴋartuksaungilak assianik, Gûdelo takkorngartak tuksiarvigijaksaringilasse.

¹⁰ Uvanga Nâlegauvunga Gûdise, aulartitsilauktok illipsingnik nunamit Egiptenemit. ᴋanise aitarsigik angijomik tattatilakka.

¹¹ Innuᴋotimale nippiga nâlelungilât, Israelitillo pijomalungilânga.

¹² Taimak issumainâᴋitilaukpakka, agvertarᴋovlugit attannertuinitik malliklugit.

¹³ Innuᴋotima nâlegomanajarpânga Israelitillo arvertaromakpatta apᴋosinimne.

¹⁴ Tagva ômigijingit nukingêrotisâromanajarpakka, aggakkalo torârtitsomavlugit akkerartôrtinginnut.

¹⁵ Nâlekamik ômisuktut ᴋenuvigijaksarinajarpait; tâpkoale nalliuninget sorainiatsanginajarpok issoᴋangitomut.

¹⁶ Uvangalo nerritinajarpakka ᴋaᴋᴋujaksanik namanerpânik, namaksitinajarlugillo igupsaujârtut orksuanut ᴋairtomit pijomut.