Imgerut 79 - Labrador Inuttitut Heritage Bible

Arusungnek ômisuktut pivlugit, Gûdemik mittauteᴋartut, idluitullijullo tâpsoma innuᴋotinginut.

Assafib imgerutâ.

¹ Gude nallojut ittârsimavut kingormgutijarnut, Tempeleᴋotillo ivsornaitok ivsornartilaukpât, Jerusalemelo ujarangortilaukpait ᴋallerêktunnik patsalungajunik.

² Kivgaᴋotivit timingit annernangertut tunnilaukpait tingmitsanut ᴋillaub attânêtunut nerᴋiᴋsauᴋovlugit tâpkonunga, ivsornaitoᴋotivîllo uviningit ômajunnut nunamêtunnut.

³ Tâpkoa aungit kovilaukpait imektut Jerusalemib avatâne; illuverksijoᴋalaungilarlo.

⁴ Sillaliptingnut kangusuktitaksangorpogut, mittautiksangorlutalo, allêᴋutiksangorlaptalo avatiptingnêtunnut.

⁵ Nâlegak ᴋannok sivitutigijomik ningaromamariᴋît, illungertornîllo ikkomatut ikkoalaᴋojomaviûk?

⁶ ᴋaningajârnît nâviuk nallojunnut illitarksingitunnut illingnik, attaniovingnullo niplialungitunut atternut.

⁷ Tâpkoa Jakokut nerrilugit nungulaungmagit, iglungillo asserormagit.

⁸ Idluitullinerilauktavut issumagitailikit, pârtauᴋosârtigut nâpkiningnernut; akkutôjungorapta.

⁹ Ikajortigut Gûde, ikajortivut atterpît nertornauta pivlugo; piulitigut ajornivullo ullapᴋoserkit attit pivlugo.

¹⁰ Sôg nallojut oᴋartuksauvât: Gûdingat nanêᴋa mânna? Nallojut akkorngane ijipta sângine, nallonairtaule kivgaᴋotivît aungita kovijaumajut akkiniartauningat.

¹¹ Parngnanairsortat annersauminingit tikkilaulît sângnut tallivît angininga malliklugo, ᴋittorngat toᴋᴋotaksat sapputikit.

¹² Sillalivullo akkiniarkit ikkianginut 7 ertorlugit, mamailisainingit, mamailisaijutigilauktangit illingnik Nâlegak.

¹³ Uvagulle innuᴋotitit pairksinivîllo saugangit ᴋujagijomavaptigit issoᴋangitomut, nertornarnîllo oᴋautigijomavavut soraijuitomik.