Imgerut 78 - Labrador Inuttitut Heritage Bible

Gûdib tassiorningninganik nertornartomik innugasaksoaᴋotiminik tappatôjunik.

Assafib illisaininga.

¹ Innugasaksoaᴋotikka malligaksauᴋojakka tussarsigik, siutise mannisigik oᴋama oᴋausinginnut.

² ᴋannera angmaromavara issumaksarsiorutiksannut; nallaupsarutiksannik itsaksoarnitanik nallonaijaijomavunga;

³ Tussalauktaptingnik, tukkisilauktaptingniglo, atâtagijaptalo unipᴋâlauktanginik uvaptingnut.

⁴ ᴋittorngangit unipkautitaililugit tamakkoninga pijuksaunginapta, kinguvârêllo nallojungnaititaksarigaptigik Nâlekab nertornarninganik, pitsartuninganiglo, tattamnartullininginniglo, pinnialauktanginnik.

⁵ Tâpsoma kigligiudsinek âᴋiᴋsulaukpa Jakokune malligaksallo tunnivait Israeleme, perᴋolauktangit atâtagijaptingnut, ajochertorutigilugit ᴋittorngamingnut perᴋovlugit.

⁶ Kinguvât ᴋaujimaᴋovlugit tamakkoninga, sorrutsillo innuleromârtuksat sulle; inumariolerunik ᴋittorngatiktauk nallojungnaitilugit tamakkoninga perᴋovlugit.

⁷ Tattiksamingnik tungaᴋovlutik Gûdemut, puigornatiglo Gûdib pinniarninginnik, perᴋojanginniglo naleᴋovlugit.

⁸ Atâtagijangititullo îlerᴋonagit, ᴋittorngarêngolauktutitut ᴋemaijut Nâlekamik, tappatojullo; ômatteᴋalaungitut soᴋᴋosijuitunik, anerneᴋalaungitullo nertornartomik ungajomik Gûdemik.

⁹ Efraimib ᴋittorngangititut sakkolijarlutik pittikselijarlutiglo ᴋemaijut sorsungnerub nalliuningane,

¹⁰ Gûdib angersimaningit nâlelaungilait, malligaksauᴋojanginnelo arvertaromalaungilet.

¹¹ Pinniarningillo tattamnartulliningillo puigorpait, saᴋᴋertilauktangit tâpkonunga.

¹² Atâtagilauktangita sânginne tattamnartullilaukpok Egiptenib nunangane, Zoanib naternangane.

¹³ Imarbik avikpâ pissuᴋolugillo tagvûna, imaklo ᴋaᴋᴋârulaktitun îtipâ.

¹⁴ Uvlôtillugo tassiulaukpait nuvujakut, unnuarmelo ikkomakut ᴋaumajokut.

¹⁵ ᴋairtut ᴋoppilaukpait sunaᴋajuitome, imertipaillo kôngnut sorlo, amigangitomik.

¹⁶ Kôgut kôlertilaukpait ᴋairtunnit, immiksuillo ᴋajumiktilaukpait unnunga, kôksoatut îtut.

¹⁷ Sulle idluitulliganilaukput tâpsomunga, ᴋotsingnerpâk ningaksarlugo sunaᴋajuitome.

¹⁸ Gûdelo ôktorpât ômattimikut, nerᴋiᴋsaᴋarᴋojinermut tarnemingnut.

¹⁹ Gûdelo akkerartorlugo oᴋautigivât oᴋarlutiglo: Gûde nerrimaraksamik âᴋiᴋsuijungnaralloarᴋâ sunaᴋangitome?

²⁰ Ahâk, ᴋairtok annaulauralloarpâ imiksuit kôlerᴋovlugit, kôgullo iggerᴋovlugit, kissianele innuᴋotine ᴋaᴋᴋôjanik nerᴋemiglo sakkêvigijungnaralloarivagît?

²¹ Nâlekablo mâna tamanna tussaramiuk illungertulerpok ikkomaᴋalerporlo Jakokut akkerartorlugit ningarnerlo ᴋongmualerpok Israelekut akkerartorlugit:

²² Gûde okperilungimatsuk, ikajorningalo sungertutiginago pingmatta.

²³ Nuvujallo takpâne perᴋovait, ᴋillaublo upkuanga angmarpâ;

²⁴ Sillalugvioᴋovaillo Mananik, nerᴋiᴋsanginut illingajunnik, tunnitsivigivaillo ᴋillaub ᴋaᴋᴋôjanginnik.

²⁵ Illunatik Engelit ᴋaᴋᴋôjanginnik nerrilaukput, tilliklervigivait nerᴋiᴋsannik amigangitunnik.

²⁶ Unangâk unangârᴋovâ ᴋillaub attâne, pitsartunerminullo uarngnerluak annordlertipâ.

²⁷ Nerᴋemiglo sillalugviotipait sanniktitut tingmianiglo merkolingnik siorkatitut imarbiksub sikjanganêtutitut îtunnik.

²⁸ Kattaktipaillo tâpkoa tangmârvingeta ᴋerᴋanut iglungita avatânut illunane.

²⁹ Tagva nerrilaukput namaksimaridlarlutiglo, ikligosungningit namaktomik attortauᴋovait tâpkonunga.

³⁰ Ikligosungnitiglo attorêrlaungimatsuk sulle, nerᴋitiglo ᴋanninginnêtillugit:

³¹ Tagva Cûdib ningarningata makkitavigivait naktertitsilunelo ᴋuinijunginit ochotilaitalo Israelib angutingit innuosuktut.

³² Taimailauralloarmat, idluitulliganerput sulle, okperatiglo tattamnartullininginnut.

³³ Tamanna pivlugo maungatuinak toᴋᴋolaukpait, sunamik anguserᴋonagit, inôtsitiglo nâvlugit kappiasugariaᴋalaukput.

³⁴ Naktertilaurangagit tagva apperᴋutigivât, sâlerlutiglo, Gûdelo ᴋennerpât.

³⁵ Erᴋailerlutiglo Gûde ᴋairtorigamitsuk, Gûdelo ᴋotsingnerpâk piulijigigamitsuk.

³⁶ Takkomôrvigivâllo ᴋannermingnut, sagloᴋilugolo oᴋamingnut.

³⁷ Omattingille soᴋᴋoseratik tâpsomanêlaungilat, nertornarlutiglo angersimaninga kamagilaungilât.

³⁸ Tâmnale nâpkigosulaukpok, idluitullinerillo issumagijungnaipait, nungutailivailo; ningarninelo allartiᴋattarpâ, ᴋaningajarninelo illunât tuppaᴋolaungilâ.

³⁹ Erᴋaigame, uviniôngmatta, annore ingergausadlartok, utterniatsangitorlo.

⁴⁰ ᴋannok unnuktoêrtorlutik ningaksalaukpât sunaᴋajuitome, illuluktilugolo innuᴋajuitome!

⁴¹ Gûdelo ôktutsainalaurivât, sannikteritilugolo Hailigeôjok Israeleme.

⁴² Tâpsoma aggangit erᴋaumalaungilait uvlorme taipsomane piulilaungmagit ômisuktunnit;

⁴³ Kanok nallonaikutane pinnialauramigit Egipteneme, tattamnartullininelo Zoanib naternangane;

⁴⁴ Taipkoa kôngit ablatsângortilaungmagit aungmut, immerungnarᴋonagit kôngmingnit;

⁴⁵ Omajokulluit pagvisartokulluit tillilaungmagit tâpkoa akkornganut nerrijut tâpkoninga, narnâjillo asseroijut tâpkoninga;

⁴⁶ Perortoᴋotingillo tunningmagit aubvinnut, ᴋângasuteᴋotingillo piglertaujârtunnut;

⁴⁷ Nappârtoᴋotingit Weineliksat annaulermagit nattarᴋonarnut, nappârtoᴋotingillo Maulberigit nattarᴋonâlungnut;

⁴⁸ Nergjuteᴋotingit tunnilaungmagit nattarᴋonarnut, kattimgajoᴋotingit ᴋaumalangnut.

⁴⁹ Ningarnime aumauninga, ᴋanningajârnek, saimajuinek, kappiasungnerlo tillilaungmagit akkornganut, Engelit idluitut kattimgajut illaliudlugit;

⁵⁰ Ningarnine apᴋosineliortimago, tarningillo ivlerilaungimagit toᴋᴋomit, nergjuteᴋotingillo tunnilaungmagit nussilingnartomut;

⁵¹ Erniangoᴋârtut illunaita Egipteneme annaulilaungmagit, pitsartunerub sivurlingit Hamib iglunginne;

⁵² Innugasaksoaᴋotinnelo aulartimagit saukatitut, tessiulaungmagillo kattimgajutitut sunnaᴋajuitome.

⁵³ Ussornarnartomik tassiulaukpait, erksilerᴋonagit; ômigijingille ullutsaumalaukput imânut.

⁵⁴ Alaukpaillo kiglilerveᴋotime ivsornaitut illuanut, ᴋaᴋᴋamut ômunga, tallerpingame piniarnerilauktanganut.

⁵⁵ Aulartilaukpait, tâpkoa sivurngane innuᴋattigêksuillo kingormgutijaᴋartilugillo imeraut malliklugo, taipkoalo iglunginne Israelib kinguvârêngit inneᴋarᴋovait.

⁵⁶ Kissianele Gûde ᴋotsingnerpâk ôktorlugolo ningaksarpât kigligiutsiningillo nâlelaungilait;

⁵⁷ Tunnulaukpullo, nertornartaililutiglo atâtamiktut, katsungainatiglo, pittiksetut ᴋassungajotut;

⁵⁸ Ningaksarlaukpâllo pôktojoᴋotimingnut, illungertortilugolo Gûdingoaᴋotimingnut.

⁵⁹ Gûdiblo tamana tussaramiuk illungertudlalaukpok egidlarpaillo angijomik Israelitit;

⁶⁰ Iglune Silome ipperaramiuk, tuppek, inuit akkorngane inneᴋarutigijane;

⁶¹ Pitsartuningallo tunnivâ parngnanairsimavingmut, ânanauningalo ômisuktub agganginnut;

⁶² Innugasaksoaᴋotinelo tunnivait saviksoarmut, kingormgutijanelo ikkoâlajutigivâ.

⁶³ Ikkomab angutingit innuosuktut nerrilaukpait, uigasuᴋotingillo aipaᴋarungnalaungilat.

⁶⁴ Ajochertuijungit ochotitauvut saviksoarmut, uigarningillo ᴋêajungnalaungilat.

⁶⁵ Nâlegarle tuppalaukpok sinniktotut; sorlo sôngojok igiaᴋomijarmat Weinetulauktok.

⁶⁶ Omigijinelo anaulerpait tunuanit, kangusungneᴋartipaillo soraijuitomik.

⁶⁷ Josefiblo tuppinga ipperarpâ, kinguvârêllo Efraimekut annerilaungilait;

⁶⁸ Annerilaukpaille kinguvârêt Judakut, ᴋaᴋᴋak Zion nagligijane.

⁶⁹ Sannavâlo ivsornaitoveᴋotine ᴋillaub pôktoningatut, nunatut tunganilitilauktamitut soraijuitomik.

⁷⁰ Annerilaukpâlo kivgane Davide, tiguvâlo saukat iglunginnit.

⁷¹ Sauᴋanit sârliartunnit ailaukpâ, innuᴋotingit Jakokut pairilugit pijuksaungmat, kingormgutijangalo Israelitit.

⁷² Tâpsomalo pairilaukpait ômamut idluitailijomut, tassiorlaitalo aggangnut sillatojunnut.