Imgerut 77 - Labrador Inuttitut Heritage Bible

Okpertut ôktortauninginnik manigorutiksanginiglo.

Assafib imgerutâ imgerutigilugo Jedutunemut.

¹ Nipliadlarpunga nippimnut Gûdemut; Gûdemut nipliadlarpunga, tâpsomalo tussarpânga.

² Kappiaktoadlarnima nalliuningane Nâlegak ᴋennerpara; aggakka unnuame issangavut katsunganatiglo, tarniga mannigortauᴋojomangimat.

³ Gûde erᴋaumavara uimajâdlarlungalo; issumaksarsiorpunga, annerneralo illungudlarpok, Sela.

⁴ Ijika taimailingatipakik pigârᴋovlugik; taimâk koksalangavunga oᴋarungnanginama.

⁵ Nalliutok itsanîtak, Jârillo ᴋângertut erᴋaumavakka.

⁶ Unnuarme noᴋakseralijarnera erᴋarpara, oᴋauseᴋarpunga ômattimnut, annernera issumaksarsiorpok.

⁷ Nâlegak tagva issoᴋangitomut ajâktuijomârᴋâ, illanérsarneᴋarungnailunelo?

⁸ Pitsiarninga soraimariᴋâ? angersimanerlo naggateᴋarᴋa soraijuitomik?

⁹ Gûdib saimarviᴋarnek puigoromavauk nâpkiningninelo ningarlune parngnanairᴋaûk? Sêla.

¹⁰ Sulle oᴋarpunga: Tamattominga tukkisijariaᴋarpunga; ᴋotsingnerpâb aggangita tallerpingita tamaita ablatsângortitsungnarpait.

¹¹ Tamanna pivlugo Nâlekab pinniarningit erᴋarpakka, ila tattamnartullinilauktâttit itsaksoarme erᴋaumavakka.

¹² Pingortitattit tamaita oᴋauserivakka, issumaksarsiorutigilugillo piniarnitit.

¹³ Gûde apᴋosinerijât ivsornaitôvok. Nane Gûdeᴋarᴋâ taimak angitigijomik, illiktut Gûdeôjotit îtomik?

¹⁴ Igvit Gûdeôvotit, tattamnartullijok; pitsartunît saᴋᴋertilaukpet innuᴋattigêksoarne.

¹⁵ Igvit innugasaksoaᴋotitit piulilaupâttit tallermut pitsartudlartomut, Jakob Josefiblo ᴋittorngangit, Sêla.

¹⁶ Immaksuit takkolaukpâtit, Gûde immaksuit takkolaukpâtit, kappiasulerlutiglo, ittinerillo iktullijâlaukput.

¹⁷ Nuvujat immermik kovisilaukput, nuvujat kallilaukput, ᴋarᴋjutillo ingergausadlalaukput tagvunga.

¹⁸ Kalluᴋotit tussaksaulaukpok ᴋilangme; ᴋaumalait sillaksoak ᴋaumartilaukpât; nuna ᴋoaᴋsâdlalaukpok sajukpiludlarlunelo.

¹⁹ Apᴋut imarbingmêlaukpok apᴋosinîllo imaksoarne, sullele ittikkatit mallugijaulaungilat.

²⁰ Inugasasoaᴋotitit tassiulaukpâttit saukatitut kattimgajutitut Mosekut Aronekullo.