Imgerut 73 - Labrador Inuttitut Heritage Bible

Gûdib nallonarninga idluartut idluitullo pivlugit.

Assafib imgerutâ.

¹ Israelib sulle Gûde mannigorneriva, ômatteᴋartuinarpat ivsornaitomik.

² Uvangale akpalektorkasalaukpunga ittikamnut, ablornera siargikasalaukpok.

³ Nertortinasuartut sinaungalaungmatta uvamnut, takkolaurama Gûdeᴋangitut ᴋannoêngitsiarlaungmatta.

⁴ Serleᴋilungimatta toᴋᴋotik tikkidlugit, pitsartuningello nukkiksasimatsiarpok.

⁵ ᴋannoêtomêlungilet innuktitut assingititut, innuktitullo assingititut pagvisartaulungilat.

⁶ Taimaimat tappatonitik pinnarnarutigivât, uivênitiglo annorâritsiarpât.

⁷ Kênangit singomavut ᴋuinimut; ômattib issumagituinartangit pinniarpait.

⁸ Tamainik asseroivut, kassêlutiglo oᴋauseᴋarput aksorornermik; sôngojunnik oᴋauseᴋarput.

⁹ Oᴋarningat ᴋillangmit pijotut ituksauvok; oᴋausingillo nâlektaujuksauvut nuname.

¹⁰ Tamana pivlugo innuᴋotingit tagvunga sâlerput, tavanelo imiksoatik amigangitomik nachvârpât;

¹¹ Oᴋarlutiglo: ᴋannok Gûde ᴋaujijuksauva sunamik? ᴋotsingnerpâglo nallojungnaituksauvâ?

¹² Ahâk, tagva Gûdeᴋangitôvut, tâpkoa pillorikput sillaksoarme, kattersoilutiglo akluinermik.

¹³ Sullinanga ômattiga ivsornaitipara, ubvarlugillo aggakka passijaksaunginerme.

¹⁴ Pagvisartaulungalo uvlut tamaita, pitlartaunera uvlâne illunaine tagvanêpok.

¹⁵ Taimak oᴋaromanajalaurumatauk, ahâk, tagva ᴋittorngavit kinguvârêngit erᴋartorajarpakka.

¹⁶ Issumaksarsiorutigilaukpara ipaksijomavlugo; ajurlaukparale.

¹⁷ Itterᴋârtinnanga Gûdib ivsornaitoveᴋotinganut, tâpkoalo nâningit kamagilugit.

¹⁸ Siarginartomulle pitituinarpâttit, ochotilugillo serᴋomerᴋovlugit.

¹⁹ Ila tagvainak nungutauvut! Sutairput naggateᴋarlutiglo kappianadlartomik.

²⁰ Sinaktomanertut tuppaksimanerub kingorngane, taimak igvit Nâlegak tâpkoa tautungit nachonartipâttit iglugasaksoarne.

²¹ Omattimne taimak ᴋaivitillugo, ᴋaᴋᴋitilugolo taktumne:

²² Tagva sillaitôlaukpunga, ᴋaujimalaungilangalo sunamik; ômajotun-ilaukpunga sângne.

²³ Sulle illingnêtuatsainalaukpunga; igvit tigumilauramga aggangnut tallerpingnut.

²⁴ Igvit tassiorparma attanertuinît malliklugo illaliorsinarniarparma nertornauserlunga.

²⁵ Igvit pigituinarupkit, tagva ᴋillak nunalo ᴋujanarutigivâka.

²⁶ Timigalo tarnigalo perleralloarpannik, tagva igvit Gûde sulle ômattima mannigornerivâtit illangiusiarivagillo.

²⁷ Ahâgle, illingnit nûlertut nungujomârmatta, illunaita idluitullivigijitit nungupâttit.

²⁸ Tamanale ᴋuviasutigivara, Gûde ungagilugo pigama, sungertuteᴋarlungalo Nâlekamik Nâlekamik piniarnitit tamaita oᴋautigilugit.