Imgerut 72 - Labrador Inuttitut Heritage Bible

Nallautainek Kristusemik tâpsomalo nâlegauvinganik.

Salomomut.

¹ Gude, idluarsainît tunnilauruk attanermut, idluarnîllo attanniub erninganut.

² Idluarsaiᴋovlugo inugasaksoaᴋotingnik idluarnermut, ajulertoᴋotingniglo nâmanermut.

³ ᴋaᴋᴋat ullapirsaumik ᴋaitsilaulît inugasaksoarnut, ᴋaᴋᴋârulaillo idluarnermik.

⁴ Tâpsoma pattangajut inugasaksuit akkorngane idluarnermik saᴋᴋêviginiarpait, aklujullo ikajorniarpait, oᴋumaiksartitsijullo egilugit serᴋomitsomârpait.

⁵ Sivuragijaujomârpotit seᴋᴋineᴋartillugo taᴋᴋeᴋarninganelo, kinguvârênut illunainut.

⁶ Aᴋᴋaromârpok sillaluktut nunamut iviksukatalingmut nakkarsimaviojomut sorlo, kutititut nunamik kausertitsijutitut.

⁷ Tâpsoma nalliuningane idluartok nuvugolâtâromârpok ullapirsauteᴋaromârlunelo angijomik, taᴋᴋeᴋarungnaininga tikkilugo

⁸ Attanniotijomârpok imarbingmit imarbiksub aipâ tikkidlugo, kôksoarmillo nunaksub issungit tikkidlugit.

⁹ Sângane okkoleromârput sunaᴋajuitomêtut; ômigijingillo sanningnik alluktoromârput.

¹⁰ Attannît Tarsisemit, ᴋikkertennillo pilliutinnik ᴋaitsijomârput; attannîllo Arabiab, Sebablo attaniovingangnit tunnergutinik âtsijomârput.

¹¹ Attannît illunatik tuksiarvigijomârpât, nallojullo illunatik kivgartoromârpât.

¹² Piulijomârmago aklujok nipliajok, pattangajorlo ikajorteᴋangitok.

¹³ Erᴋanangitut aklujullo nikkagijomârpait, aklujullo tarningit ikajoromârpait.

¹⁴ Tâpkoa tarningit uivêrijaunermit namangitullivionermillo piulijomârpait; aungello akkitonasugijaujomârpok tâpsoma sângane.

¹⁵ Inôjomârpok, tunitsiviojomârlunelo Goldemik Arabiamib attaniovinganit pijomik. Tuksiarviotsainaromârporlo, uvlut tamaita nertortaujomârpok.

¹⁶ ᴋaᴋᴋôjaksallo akkulaitôjomârput nuname, ᴋaᴋᴋet ᴋemerdluangine; perorkterningillo aulajomârput Libanonetut; nuilerlutiglo tungujoksileromârput iglugasaksoarnit, iviksukatitut nunamit sorlo.

¹⁷ Attinga itsainaromârpok issoᴋangitomut; seᴋᴋineᴋarningane attinga kinguvângnut tôgomârpok, saimausertaujomârpullo tâpsomunga; nallojut illunatik nakorijomârpât.

¹⁸ Nertortaule Gûde Nâlegak Israelib Gûdinga, tattamnartullitotôjok!

¹⁹ Nertortaule attinga ânanaudlartok issoᴋangitomut; nunallo illunaita nâmalerlit nertortauninganik, Amen, Amen.

²⁰ Davidib Isaib erningata tuksiarningit sorairput.